മാതൃഭാഷയ്ക്കുവേണ്ടി ഒരു ദിനം- ഫെബ്രുവരി 21. 1999ലാണ് യുനെസ്‌കോ ഫെബ്രുവരി 21നെ ലോകമാതൃഭാഷാദിനമായി പ്രഖ്യാപിച്ചത്. 2000 മുതല്‍ എല്ലാ വര്‍ഷവും ഫെബ്രുവരി ലോകമാതൃഭാഷാദിനമായി ആചരിച്ചു തുടങ്ങി. 2008നെ ലോക ഭാഷാ വര്‍ഷമായി പ്രഖ്യാപിച്ച പ്രസ്ഥാവനയിലൂടെ എക്യരാഷ്ട്രസഭയുടെ പൊതുസഭ ഈ ദിനാചരണത്തിന് ഔദ്യോഗിക അംഗീകാരം നല്‍കി. 1952ല്‍ ബംഗ്ലാദേശില്‍ ഉറുദു ഭരണഭാഷയായി അടിച്ചേല്‍പ്പിക്കുന്നതിനെതിരെ നടന്ന കലാപത്തില്‍ ഡാക്ക സര്‍വ്വകലാശാലയിലെ നാലു വിദ്യാര്‍ത്ഥികള്‍ പൊലീസിന്റെ വെടിവെയ്പ്പില്‍ കൊല്ലപ്പെട്ടു. ഇതിന്റെ സ്മരണയ്ക്കായാണ് ലോകമാതൃഭാഷാദിനം ആചരിച്ചു തുടങ്ങിയത്. എല്ലാ നാടുകളിലും സ്വന്തം ഭാഷയ്ക്കു വേണ്ടി മുറവിളി ഉയരുമ്പോള്‍ മലയാളം സംസാരിക്കുന്നത് തെറ്റാണെന്നും മോശമാണെന്നും കരുതുന്ന ഒരു തലമുറയിലൂടെയാണ് നമ്മള്‍ കടന്നു പോകുന്നത്. ജീവിതത്തിന്റെ സകലമേഖലകളിലും ഇംഗ്ലീഷ് ആഴത്തില്‍ സ്വാധീനം ചെലുത്തിയപ്പോള്‍ മലയാളം ‘വൃദ്ധസദന’ത്തിലായി. എന്നാല്‍ അതിനെ ശക്തമായി തിരിച്ചുപിടിച്ചുകൊണ്ട് ശ്രേഷ്ഠഭാഷാ പദവിയിലേക്കുയര്‍ത്തിയിട്ടും അകാല വാര്‍ദ്ധക്യത്തില്‍ പിടയുകയാണ് നമ്മുടെ ഭാഷ. നമ്മുടെ ഭാഷ നമ്മുടെ അവകാശമാണ്. അവകാശത്തെ ചോദിച്ചു വാങ്ങേണ്ട നമ്മള്‍ അറപ്പോടെ അവയെ അവഗണിക്കുകയാണ്. അതിനാണല്ലോ ‘അമ്മേ…’ എന്നു വിളിച്ച നാവുകൊണ്ടുതന്നെ മലയാളം പഠിപ്പിക്കുന്ന സ്‌കൂളിലേക്ക് ഞാന്‍ പോകില്ലായെന്ന് നമ്മുടെ പുത്തന്‍ തലമുറ പറയുന്നത്. സ്വന്തം ഭാഷയെ തിരിച്ചു കൊണ്ടുവരാന്‍ സ്വന്തം ദേശക്കാരില്‍ നിന്നു തന്നെ ഇത്രയോറെ വെല്ലുവിളി നേരിടുന്ന ഭാഷ ഒരുപക്ഷേ മലയാളം മാത്രമാകും. രാഷ്ട്രം അംഗീകരിച്ചിട്ടുള്ള അഞ്ച് ശ്രേഷ്ഠഭാഷകളില്‍ ഒന്നും, ലോകഭാഷകളില്‍ ഇരുപതാം സ്ഥാനവുമുള്ള നമ്മുടെ ഭാഷയുടെ അവസ്ഥയാണിത്. മൂന്നരക്കോടിയോളം വരുന്ന വലിയൊരു ജനവിഭാഗത്തിന്റെ മാതൃഭാഷയായ മലയാളത്തെ മാനിക്കേണതും ഉയര്‍ത്തേണ്ടതും നമ്മുടെ കടമയാണ്. വീട്ടുമൊഴിയും നാട്ടുമൊഴിയുമെല്ലാം അതിന്റെ ഈണത്തിലും താളത്തിലും മധുരമലയാളത്തിന്റെ കിളിക്കൊഞ്ചലിന് വഴിയാകട്ടെ…. ചരിത്രവീഥികളില്‍ തുഞ്ചന്റെ തത്തയുടെ തൂവലുകള്‍ ഇനിയും അടയാളപ്പെടുത്തപ്പെടട്ടെ. മലയാളഭാഷയുടെ സ്വത്വത്തിനുവേണ്ടി; നമുക്കും ഏറ്റു ചൊല്ലാം എം.ടി.യുടെ പ്രതിജ്ഞ: ‘എന്റെ ഭാഷ എന്റെ വീടാണ്, എന്റെ ആകാശമാണ്. ഞാന്‍ കാണുന്ന നക്ഷത്രമാണ്, എന്നെ തഴുകുന്ന കാറ്റാണ്, എന്റെ ദാഹം ശമിപ്പിക്കുന്ന കുളിര്‍ വെള്ളമാണ്, എന്റെ അമ്മയുടെ തലോടലും ശാസനയുമാണ്. എന്റെ ഭാഷ ഞാന്‍ തന്നെയാണ്. ഏതുനാട്ടിലെത്തിയാലും ഞാന്‍ സ്വപ്‌നം കാണുന്നത് എന്റെ ഭാഷയിലാണ്. എന്റെ ഭാഷ ഞാന്‍ തന്നെയാണ്.’

കാട്ടൂര്‍ : കാട്ടൂര്‍ എസ് എന്‍ ഡി പി യോഗം അമേയകുമാരേശ്വര ക്ഷേത്രമഹോത്സവം ഫെബ്രുവരി 22ന് കൊടികയറി മാര്‍ച്ച് 1ന് ആറാട്ടോട് കൂടി സമാപിയ്ക്കുന്നു.22ന് രാത്രി 7.50നും 8.20 നും മദ്ധ്യേ പറവൂര്‍ രാകേഷ് തന്ത്രികളുടെ മുഖ്യകാര്‍മ്മികത്വത്തില്‍ കൊടിയേറ്റം നടക്കും.തുര്‍ന്ന് കലാപരിപാടികളുടെ ഉദ്ഘാടനം മുകുന്ദപുരം എസ് എന്‍ ഡി പി യൂണിയന്‍ പ്രസിഡന്റ് സന്തോഷ് ചെറാക്കുളം നിര്‍വഹിക്കും.പൂയ്യ ദിവസമായ ഫെബ്രുവരി 27ന് രാവിലെ മുതല്‍ 9 ശാഖകളില്‍ നിന്നായി പൂക്കവടികളും പീലിക്കാവടികളും വാദ്യഘോഷങ്ങളുടെ അകമ്പടിയോടെ ക്ഷേത്രത്തിലേയ്ക്ക് പുറപ്പെടും.വൈകീട്ട് 4.30 തോടെ ഏഴ് ഗജവീരന്‍മാര്‍ അണിനിരക്കുന്ന കൂട്ടിഎഴുന്നള്ളിപ്പ് നടക്കും.101 മേളകാലക്കാരന്‍മാര്‍ അണിനിരക്കുന്ന മേളവിസ്മയത്തിന് കലാമണ്ഡലം ശിവദാസന്‍മാരാര്‍ നേതൃത്വം നല്‍കും.28-ാം തിയ്യതി രാത്രി 9 മണി മുതല്‍ പള്ളിവേട്ട.മാര്‍ച്ച് 1ന് രാവിലെ 9ന് നടക്കുന്ന ആറാട്ടോടെ പൂയ്യമഹോത്സവത്തിന് സമാപനം കുറിയ്ക്കും.

പൂമംഗലം : സാമ്പത്തിക വര്‍ഷാവസാനത്തിന് രണ്ടു മാസങ്ങള്‍ക്കു മുന്‍പ് തന്നെ 100% നികുതികളും പിരിച്ചെടുത്തതിന് സംസ്ഥാന സര്‍ക്കാരിന്റെ പ്രത്യേക സമ്മാനം പൂമംഗലം പഞ്ചായത്തിന് തദ്ദേശ വകുപ്പ് മന്ത്രി കെ ടി ജലീല്‍ നല്‍കി. കഴിഞ്ഞ ദിവസം പെരിന്തല്‍മണ്ണയില്‍ പഞ്ചായത്ത് ദിനഘോഷ വേദിയില്‍ വെച്ചായിരുന്നു പുരസ്‌കാര സമര്‍പ്പണം.കഴിഞ്ഞ 6 വര്‍ഷങ്ങളിലും പൂമംഗലം പഞ്ചായത്ത് 100% നികുതി പിരിവു നേടിയിരുന്നു. തുടര്‍ച്ചയായ 5 വര്‍ഷങ്ങളിലും 100% പദ്ധതി വിനിയോഗവും,4 വര്‍ഷം ജില്ലയിലെ മികച്ച പഞ്ചായത്തിനുള്ള സ്വരാജ് ട്രോഫിയും പൂമംഗലത്തിനായിരുന്നു, 2017 ഡിസംബര്‍ 31നകം 92% നികുതികളും പിരിച്ചെടുത്തിരുന്നു. ഇക്കഴിഞ്ഞ 31നു അത് 100%ആക്കി. 2012 മുതല്‍ ആറു വര്‍ഷകാലം ഹരി ഇരിഞ്ഞാലക്കുടയായിരുന്നു പൂമംഗലം ഗ്രാമപഞ്ചായത്തിന്റെ സെക്രട്ടറി.പഞ്ചായത്ത് പ്രസിഡന്റ് വര്‍ഷ രാജേഷ് സ്റ്റാന്റിംഗ്കമ്മിറ്റി ചെയര്‍മാന്മാരായ ഈനാശു പല്ലിശ്ശേരി, കവിത സുരേഷ്, പഞ്ചായത്ത് സെക്രട്ടറി എന്‍. ജി ദിനേശ് തുടങ്ങിയവര്‍ ചേര്‍ന്നാണ് പുരസ്‌ക്കാരം ഏറ്റുവാങ്ങിയത്.

എടതിരിഞ്ഞി : എച് ഡി പി സമാജം ശ്രീ ശിവകുമാരേശ്വര ക്ഷേത്രത്തില്‍ പൂയമഹോത്സവം ആഘോഷിച്ചു.നടുമുറി വിഭാഗം,പടിയൂര്‍ വിഭാഗം,പടിയൂര്‍ ജനകീയ വിഭാഗം,വടക്കുമുറി വിഭാഗം,കാക്കത്തുരുത്തി സൗത്ത്,കാക്കത്തുരുത്തി വടക്ക് എന്നിവിടങ്ങളില്‍ നിന്നായി പ്രാദേശിക കാവടി സെറ്റുകള്‍ ഉച്ചയോട് കൂടി താള വാദ്യ അകമ്പടിയോടെ ക്ഷേത്രത്തില്‍ എത്തിചേര്‍ന്നു.ഉച്ചതിരിഞ്ഞ് പെരുവനം കുട്ടന്‍മാരാര്‍,കലാമണ്ഡലം ശിവദാസ് എന്നിവരുടെ മേളപ്രമാണത്തില്‍ വിവിധ ദേശങ്ങില്‍ നിന്ന് വന്ന ചെറുപൂരങ്ങള്‍ ക്ഷേത്രത്തില്‍ വാദ്യവിസ്മയം തിര്‍ത്തു.തിരുവുത്സവദിനത്തില്‍ രാവിലെ 4 ന് നിര്‍മാല്യ ദര്‍ശനവും തുടര്‍ന്ന് ഗണപതിഹവനവും 5 ന് അഭിഷേകങ്ങള്‍, വിശേഷാല്‍ പൂജകള്‍ എന്നിവയുണ്ടായിരുന്നു.വൈകീട്ട് 7 .30 ന് ദീപാരാധന, അത്താഴപൂജ എന്നിവയുണ്ടാകും.ബുധനാഴ്ച്ച രാവിലെ 8ന് ആറാട്ട് പുറപ്പാട് തുടര്‍ന്ന് എടതിരിഞ്ഞി വടക്കും മുറി കോതറ ആറാട്ട് കടവില്‍ ആറാട്ട് നടക്കും.വൈകീട്ട് 3 മണിയോടെ വാദ്യഘോഷങ്ങളോടെ ആറാട്ട് കഴിഞ്ഞ് തിരിച്ചെത്തി കൊടിയിറക്കത്തോടെ പൂയ്യം സമാപിയ്ക്കും.

ആളൂര്‍: മാനാട്ടുകുന്നില്‍ അയ്യന്‍പട്കയില്‍ തടയണ കെട്ടി കനാല്‍ വെള്ളം തടഞ്ഞു നിര്‍ത്തുന്നത് അനധികൃതമായാമെന്ന് ആക്ഷേപം. കഴിഞ്ഞ ദിവസമാണ് വടിയന്‍ചിറ കെട്ടിയത്. ചിറ കെട്ടുന്നതോടെ ഒരു ഭാഗത്തെ സ്വകാര്യവ്യക്തികളുടെ ഭൂമികളില്‍ വെള്ളം നിറയുന്നതാണ് ആക്ഷേപത്തിനിടയാക്കിയത്. വര്‍ഷങ്ങള്‍ക്ക് മുമ്പ് ചിറ കെട്ടിയിരുന്നെങ്കിലും കുറെക്കാലമായി ഇവിടെ ചിറ കെട്ടാറില്ല. ഇതോടെ ഈ പ്രദേശത്ത് കൃഷിയും നടത്തിയിരുന്നു. എന്നാല്‍ കഴിഞ്ഞ മൂന്ന് വര്‍ഷമായി ഏതാനും പേര്‍ വീണ്ടും ചിറ കെട്ടിത്തുടങ്ങിയതോടെ തങ്ങളുടെ കൃഷി വെള്ളക്കെട്ടില്‍ നശിക്കുന്ന സ്ഥിതിയായെന്ന് കര്‍ഷകര്‍ പറഞ്ഞു. ഇതിനെതിരെ കര്‍ഷകര്‍ കോടതിയെ സമീപിച്ചിരുന്നു. പ്രദേശം തല്‍സ്ഥിതിയില്‍ തുടരാനുള്ള സാഹചര്യം നിലനിര്‍ത്തണമെന്ന കോടതി നിര്‍ദ്ദേശത്തെ അവഗണിച്ചാണ് ഇപ്പോള്‍ വീണ്ടും തടയണ കെട്ടുന്നതെന്ന് അയ്യപ്പന്‍പട്ക കര്‍ഷക സമിതി ചെയര്‍മാന്‍ രാമന്‍ എമ്പ്രാന്തിരി ആരോപിച്ചു. ഇതിനെതിരെ പരാതി നല്‍കിയിട്ടും പഞ്ചായത്ത് അധികൃതരോ പോലീസോ നടപടിയെടുക്കുന്നില്ലെന്നും ഇവര്‍ ആരോപിച്ചു.

പത്മഭൂഷണ്‍ ഡോ.പി കെ വാരിയരെ ഉപകാരം നല്‍കി ആദരിച്ചു.ടോംയാസ് അഡ്വര്‍ടൈസിംഗ് കേരളത്തിലെ വിശിഷ്ട വ്യക്തികളെ ആദരിക്കുന്നതിന്റെ ഭാഗമായി കോട്ടക്കല്‍ ആര്യവൈദ്യശാലയുടെ മാനേജിംഗ് ട്രസ്റ്റിയും ചീഫ് ഫിസ്ഷ്യനുമായ പത്മഭൂഷണ്‍ ഡോ പി കെ വാരിയരെ (96) ടോംയാസ് മാനേജിംഗ് ഡയറക്ടര്‍ തോമസ് പാവറട്ടി ഉപകാരം നല്‍കി ആദരിച്ചു