ഇരിങ്ങാലക്കുട : നഗരസഭയിലെ യു. ഡി. എഫ്. സ്റ്റാന്‍ഡിങ്ങ് ചെയര്‍മാന്മാര്‍, കോണ്‍ഗ്രസ്സംഗത്തിന്റെ സമ്മര്‍ദ്ദത്തെ തുടര്‍ന്ന് രാജിക്കൊരുങ്ങുന്നു. വികസനകാര്യ സ്റ്റാന്‍ഡിങ്ങ് കമ്മറ്റി ചെയര്‍മാന്‍ അഡ്വ വി. സി. വര്‍ഗീസ്, വിദ്യാഭ്യാസ സ്റ്റാന്‍ഡിങ്ങ് കമ്മറ്റി ചെയര്‍മാന്‍ എം. ആര്‍. ഷാജു എന്നിവരോടാണ് വികസനകാര്യ സ്റ്റാന്‍ഡിങ്ങ് കമ്മറ്റിയംഗമായ കോണ്‍ഗ്രസ്സ് അംഗത്തിന്റെ സമ്മര്‍ദ്ദത്തെ തുടര്‍ന്ന് പാര്‍ട്ടി നേത്യത്വം രാജി വക്കുവാന്‍ നിര്‍ദ്ദേശിച്ചിട്ടുള്ളതെന്നറിയുന്നു. ഈ അംഗത്തിന് വികസനകാര്യ സ്റ്റാന്‍ഡിങ്ങ് കമ്മറ്റി ചെയര്‍മാന്‍ സ്ഥാനം വേണമെന്ന ആവശ്യവുമായാണ് പാര്‍ട്ടി നേത്യത്വത്തെ സമ്മര്‍ദ്ദത്തിലാക്കിയിട്ടുള്ളത്. നഗരസഭയില്‍ യു. ഡി. എഫിന് 19, എല്‍. ഡി. എഫിന് 19, ബി. ജെ. പിക്ക് 3 എന്നതാണ് കക്ഷിനില. ഒറ്റക്കു ഭൂരിപക്ഷമില്ലാത്തതിനാല്‍ കൗണ്‍സിലിന്റെ ആരംഭത്തില്‍ ഭാരവാഹികളായവര്‍ അഞ്ചു വര്‍ഷം തുടരട്ടെയെന്നായിരുന്നു പാര്‍ലമെന്ററി പാര്‍ട്ടിയിലെ ധാരണ. എന്നാല്‍ സ്ഥാനം ആവശ്യപ്പെടുന്ന അംഗം തന്റെ ബൂത്ത് കമ്മറ്റി വിളിച്ചു ചേര്‍ത്ത്് സ്റ്റാന്‍ഡിങ്ങ് കമ്മറ്റി ചെയര്‍മാന്‍ സ്ഥാനം കിട്ടിയില്ലെങ്കില്‍ താന്‍ പാര്‍ട്ടി വിടുമെന്ന് പറഞ്ഞതോടെയാണ് കോണ്‍ഗ്രസ്സ് നേത്യത്വം സമ്മര്‍ദ്ദത്തിലായത്. അംഗം കൗണ്‍സിലര്‍ സ്ഥാനം രാജിവെച്ചാല്‍ ജില്ലയില്‍ തന്നെ അധികാരത്തിലിരിക്കുന്ന എക നഗരസഭ നഷ്ടപ്പെടുമെന്നതാണ് കോണ്‍ഗ്രസ്സ് നേത്യത്വത്തെ അലോസരപ്പെടുത്തുന്നത്. അഡ്വ വി. സി. വര്‍ഗീസും, എം. ആര്‍. ഷാജുവും കോണ്‍ഗ്രസ്സില്‍ എ വിഭാഗത്തെ പ്രതിനിധീകരിക്കുന്നവരാണ്. എ. വിഭാഗത്തില്‍ നിന്നു തന്നെയുള്ള ഒരംഗത്തിന്റെ സമ്മര്‍ദ്ദം മൂലമാണ് രാജിവക്കുവാന്‍ പാര്‍ട്ടി നേത്യത്വത്തിന് ആവശ്യപ്പെടേണ്ടി വന്നതും. വികസനകാര്യ സ്റ്റാന്‍ഡിങ്ങ് കമ്മറ്റി ചെയര്‍മാന്‍ സ്ഥാനത്തേക്ക് തിരഞ്ഞെടുപ്പു നടന്ന ദിവസം ഈ അംഗം വിദേശ പര്യടനത്തിലായതിനാല്‍ അന്ന് യു. ഡി. എഫിനെ പ്രതിനിധികരിച്ച അഡ്വ വി. സി. വര്‍ഗീസ് നറുക്കെടുപ്പിലൂടെയാണ് ചെയര്‍മാന്‍ സ്ഥാനത്തേക്ക് എത്തുന്നത്. സ്റ്റാന്‍ഡിങ്ങ് കമ്മറ്റി ചെയര്‍മാന്‍ തിരഞ്ഞെടുപ്പില്‍ പങ്കെടുക്കാതെ വിദേശ പര്യടനത്തിന് പോയ അംഗത്തിനു വേണ്ടി സ്റ്റാന്‍ഡിങ്ങ് കമ്മറ്റികളില്‍ സ്ഥാന ചലനം വരുത്തുന്നതിനെതിരെ എ. വിഭാഗം അംഗങ്ങള്‍ക്കിടയില്‍ പ്രതിഷേധം പുകയുന്നുണ്ട്. അതേ സമയം ഐ വിഭാഗത്തിന്റെ സ്റ്റാന്‍ഡിങ്ങ് കമ്മറ്റി ചെയര്‍മാന്‍ സ്ഥാനം പി. എ. അബ്ദുള്‍ ബഷീര്‍ തുടരുകയാണന്ന് അംഗങ്ങള്‍ ചൂണ്ടിക്കാട്ടുന്നു. ജില്ലയില്‍ തന്നെ അധികാരത്തിലിരിക്കുന്ന ഏക നഗരസഭയിലെ ഭരണം നഷ്ടപ്പെടാതിരിക്കുന്നതിനാണ് പാര്‍ട്ടി വിടുമെന്ന കോണ്‍ഗ്രസ്സ് അംഗത്തിന്റെ സമ്മര്‍ദ്ദത്തിന് പാര്‍ട്ടി നേത്യത്വത്തിന് വഴങ്ങേണ്ടി വന്നത്
മൂര്‍ക്കനാട് കോഴികൂട്ടില്‍ കയറിയ മലമ്പാമ്പിനെ പിടികൂടി.
മൂര്‍ക്കനാട് : കോഴികൂട്ടില്‍ കയറി കോഴിയെ പിടിച്ച മലമ്പാമ്പിനെ പിടികൂടി.മൂര്‍ക്കനാട് കട്ടിലത്ത് ഭാവദാസന്റെ വീട്ടിലാണ് കഴിഞ്ഞ ദിവസം രാത്രി കോഴികൂട്ടില്‍ മലംപാമ്പ് കയറിയത്.പുലര്‍ച്ചെ കോഴികളുടെ ശബ്ദം കേട്ട് വീട്ടുക്കാര്‍ നോക്കിയപ്പോഴാണ് പാമ്പിനെ കണ്ടത്.ഉടന്‍ തന്നെ ഫോറസ്റ്റ് ഓഫീസില്‍ വിവരമറിയിച്ചതിനെ തുടര്‍ന്ന് ഫിലിപ്പ് കൊറ്റനെല്ലൂര്‍ എത്തിയാണ് പാമ്പിനെ പിടികൂടിയത്.മൂന്ന് കോഴികളെ പാമ്പ് കൊന്നിരുന്നു.ആറ് കിലോ തൂക്കമുള്ള പാമ്പിന് 7 അടിയോളം നീളം ഉണ്ടായിരുന്നു.
ഇരിങ്ങാലക്കുട ശാന്തിനികേതന്‍ പബ്ലിക്ക് സ്‌കൂളില്‍ ലഹരി വിരുദ്ധ ക്ലാസ് സംഘടിപ്പിച്ചു
ഇരിങ്ങാലക്കുട:ലഹരിവിരുദ്ധ ദിനാചരണത്തിന്റെ ഭാഗമായി ഇരിങ്ങാലക്കുട ശാന്തിനികേതന്‍ പബ്ലിക്ക് സ്‌കൂളില്‍ നന്മ ക്ലബിന്റെയും മലയാളം ക്ലബിന്റെയും സംയുക്താഭിമുഖ്യത്തില്‍ ഹൈസ്‌കൂള്‍ ,പ്ലസ് ടു വിഭാഗം വിദ്യാര്‍ത്ഥികള്‍ക്കായി ലഹരിവിരുദ്ധ ക്ലാസ് സംഘടിപ്പിച്ചു.മുന്‍ എസ് ഐ യും സൈക്കോളജിസ്റ്റുമായ സേവ്യര്‍ ലഹരിമുക്ത കുടുംബം എന്ന വിഷയത്തില്‍ ക്ലാസ് എടുത്തു.പ്രിന്‍സിപ്പല്‍ പി എന്‍ ഗോപകുമാര്‍ ,വൈസ് പ്രിന്‍സിപ്പല്‍ നിഷാ ജിജോ ,നന്മ കോ ഓര്‍ഡിനേറ്റര്‍മാരായ വി എസ് സോന ,വി സ്വപ്‌ന എന്നിവര്‍ നേതൃത്വം നല്‍കി
ചെമ്മണ്ട കായല്‍ കടും കൃഷി സഹകരണ സംഘത്തിന് ട്രാക്ടറും പവര്‍ ടില്ലറുകളും വിതരണം ചെയ്തു.
ഇരിങ്ങാലക്കുട : ബ്ലോക്ക് പഞ്ചായത്ത് 2017-18 വാര്‍ഷിക പദ്ധതിയില്‍ പ്പെടുത്തി ചെമ്മണ്ട കായല്‍ കടും കൃഷി സഹകരണ സംഘത്തിന് ഒരു ട്രാക്ടര്‍ & ബെയ്‌ലറും തൃശൂര്‍ _ പൊന്നാനി കോള്‍ വികസന പദ്ധതിയില്‍പ്പെടുത്തി പത്ത് പവര്‍ ടില്ലറും ബ്ലോക് പഞ്ചായത്ത് പ്രസിഡണ്ട് വി.എ .മനോജ് കുമാര്‍ അധ്യക്ഷത വഹിച്ച യോഗത്തില്‍ വച്ച് തൃശൂര്‍ പാര്‍ലമെന്റ് മണ്ഡലം എം .പി.സി .എന്‍ .ജയദേവന്‍ വിതരണം ചെയ്തു. ബഹു .ഇരിങ്ങാലക്കുട എം.എല്‍.എ പ്രൊഫ .കെ .യു. അരുണന്‍ മാസ്റ്റര്‍ മുഖ്യാതിഥിയായ ചടങ്ങില്‍ ജില്ലാ പഞ്ചായത്ത് അംഗം എന്‍.കെ.ഉദയപ്രകാശ് ,കാറളം പഞ്ചായത്ത് പ്രസിഡണ്ട്‌കെ.എസ്.ബാബു. ,ബ്ലോക് പഞ്ചായത്ത് വൈസ് പ്രസിഡണ്ട് . നളിനി ബാലകൃഷ്ണന്‍ , ADA .ടി .സുശീല, ബ്ലോക് പഞ്ചായത്ത് അംഗം .രാജന്‍ കരവട്ട് ,കാറളം വികസന സ്റ്റാന്‍ഡിങ്ങ് കമ്മറ്റി ചെയര്‍മാന്‍ .ടി.പ്രസാദ് ,ചെമ്മണ്ട കായല്‍ സംഘം പ്രസിഡണ്ട് .വി.എന്‍.ഉണ്ണികൃഷ്ണന്‍ ,കാറളം കൃഷി ഓഫീസര്‍.കുര്യാക്കോസ് എന്നിവര്‍ ആശംസകള്‍ നേര്‍ന്ന് സംസാരിച്ചു.
ജീവിതത്തോടാണെന്റെ ലഹരി : ഇരിങ്ങാലക്കുട സെന്റ്.ജോസഫ്‌സ്
ഇരിങ്ങാലക്കുട : ലഹരിവിരുദ്ധ സന്ദേശമുണര്‍ത്തി ഇരിങ്ങാലക്കുട സെന്റ്.ജോസഫ്‌സ് കോളേജിലെ NCC നടത്തിയ ലഹരി വിരുദ്ധ ദിനാഘോഷം ശ്രദ്ധേയമായി. കുരുന്നുകളിലാണ് നന്മയുടെയും ബോധവല്‍ക്കരണത്തിന്റെയും സന്ദേശമെത്തിക്കേണ്ടതെന്നു തിരിച്ചറിഞ്ഞാണ് വിവിധ പരിപാടികള്‍ ഇവര്‍ നടത്തിയത്.ഇരിങ്ങാലക്കുട ബോയ്‌സ് സ്‌കൂളില്‍ 5മുതല്‍ 8 വരെയുള്ള ക്ലാസ്സുകളിലെ കുട്ടികളുമായി സംവദിച്ച NCC കേഡറ്റുകള്‍ ഒഴിവു സമയങ്ങളില്‍ ക്രിയാത്മക പ്രവര്‍ത്തനങ്ങള്‍ക്കായി അവരെ സജ്ജരാക്കി. വിവിധ പേപ്പര്‍ ക്രാഫ്റ്റ് നിര്‍മ്മാണ വിദ്യകള്‍ പഠിപ്പിച്ച് നിര്‍മ്മാണ സാമഗ്രികളും കുട്ടികള്‍ക്ക് സമ്മാനിച്ചു. പാട്ടും മോണോ ആക്ടും മറ്റും ചെയ്യിപ്പിച്ച് പ്രോത്സാഹനം നല്‍കുകയും ഒഴിവു സമയങ്ങള്‍ ഇത്തരം കാര്യങ്ങള്‍ക്കായി മാറ്റി വയ്ക്കാന്‍ അവരെ പ്രചോദിപ്പിക്കുകയും ചെയ്തു. ഫുട്‌ബോള്‍ കിക്കോഫ് നടത്തി കുട്ടികളില്‍ ലോകകപ്പ് ആവേശം നിറച്ച കേഡറ്റ്‌സ് ആരോഗ്യകരമായ കായിക വിനോദങ്ങളിലേക്കും അവരെ നയിച്ചു. ലഹരിയില്‍ തകര്‍ന്നടിയുന്ന ആരോഗ്യത്തെക്കുറിച്ച് കോളേജിലെ ഫിസിക്കല്‍ എഡ്യുക്കേഷന്‍ മേധാവി നയിച്ച ബോധവല്‍ക്കരണ ക്ലാസും സംഘടിപ്പിച്ചു.തൃശൂര്‍ 7 കേരള ബറ്റാലിയന്‍ കമാന്റിംഗ് ഓഫീസര്‍ കേണല്‍ H.പദ്മനാഭന്റെ നിര്‍ദ്ദേശ പ്രകാരം അസോസിയേറ്റ് N CC ഓഫീസര്‍ ലഫ്റ്റനന്റ് ലിറ്റി ചാക്കോയാണ് പരിപാടികള്‍ക്ക് ചുക്കാന്‍ പിടിച്ചത്. അണ്ടര്‍ ഓഫീസര്‍ തമീമ ടി.എം, Q M S നേഹ വര്‍ഗീസ് എന്നിവര്‍ നേതൃത്വം നല്‍കി.
അന്താരാഷ്ട്രലഹരിവിരുദ്ധ ദിന സെമിനാര്‍
അന്താരാഷ്ട്ര ലഹരി വിരുദ്ധ ദിനാചരണത്തിന്റെ ഭാഗമായി, തൃശൂര്‍ ജില്ലാ എക്സൈസ് വകുപ്പിലെ ഇന്‍സ്‌പെക്ടറായ ശ്രീ കെ ആര്‍ ഗിരീശന്‍ ,താണിശ്ശേരി വിമലാസെന്‍ട്രല്‍ സ്‌കൂളിലെ ഹൈസ്‌കൂള്‍ വിദ്യാര്‍ത്ഥികള്‍ക്കായി ,ലഹരി വിരുദ്ധ ബോധവത്കരണ സെമിനാര്‍ നടത്തി. തുടര്‍ന്ന് വിദ്യാര്‍ഥികള്‍ ലഹരി വിരുദ്ധ പ്രതിജ്ഞ എടുത്തു.
ഓണത്തിനൊരുങ്ങാന്‍ വിളവിറക്കി ഗ്രീന്‍പുല്ലൂര്‍
പുല്ലൂര്‍ ; ഓണത്തെ ജൈവപച്ചക്കറിയുമായി സ്വീകരിക്കാനൊരുങ്ങി ഗ്രീന്‍പുല്ലൂര്‍.പുല്ലൂര്‍ സര്‍വ്വീസ് സഹകരണ ബാങ്കിന്റെ ഗ്രീന്‍പുല്ലൂര്‍ പദ്ധതിയുടെ ഭാഗമായി ഓണത്തിന് വിളവെടുപ്പ് പ്രതീക്ഷിച്ച് ജൈവപച്ചക്കറി കൃഷിയുടെ വിളവിറക്കി.ആനുരുളിയിലെ പച്ചക്കറി തോട്ടത്തില്‍ ബാങ്ക് പ്രസിഡന്റ് ജോസ് ജെ ചിറ്റിലപ്പിള്ളി ആദ്യ തൈ നട്ട് ഉദ്ഘാടനം നിര്‍വഹിച്ചു.ബാങ്ക് വൈസ് പ്രസിഡന്റ് എന്‍ കെ കൃഷ്ണന്‍ അദ്ധ്യക്ഷത വഹിച്ചു.ബാങ്ക് സെക്രട്ടറി സ്വപ്‌ന സി എസ് ,ഭരണസമിതി അംഗങ്ങളായ ചന്ദ്രന്‍ കിഴക്കേവളപ്പില്‍,സജന്‍ കാക്കനാടന്‍,ശശി ടി കെ,മണി പി ആര്‍,അനില്‍ വര്‍ഗ്ഗീസ്,ജാന്‍സി ജോസ്,രേഖ പനേങ്ങാടന്‍,ഷീല ജയരാജ്,ബിന്ദു മണികണ്ഠന്‍,കോഡിനേറ്റര്‍ കെ എന്‍ ഗീരീഷ് എന്നിവര്‍ നേതൃത്വം നല്‍കി.ബീന്‍സ്,കുറ്റിഅമര,പയര്‍,വെണ്ട,പാവല്‍,മുളക്,ചീര,വഴുതന,കൊത്തമര തുടങ്ങി ഇരുപതില്‍പരം ഇനങ്ങളിലാണ് മൂന്നര ഏക്കറില്‍പരം വരുന്ന കൃഷിഭൂമിയില്‍ വിളവിറക്കിയിരിക്കുന്നത്.
അവിട്ടത്തൂര്‍ ലാല്‍ ബഹദൂര്‍ ശാസ്ത്രി മെമ്മോറിയല്‍ ഹയര്‍സെക്കന്ററി സ്‌കൂള്‍ ലഹരി വിരുദ്ധ ദിനമാചരിച്ചു
അവിട്ടത്തൂര്‍ ലാല്‍:അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് അവിട്ടത്തൂര്‍ ലാല്‍ ബഹദൂര്‍ ശാസ്ത്രി മെമ്മോറിയല്‍ ഹയര്‍സെക്കന്ററി സ്‌കൂളിലെ ഹയര്‍ സെക്കണ്ടറി വിഭാഗം ഗൈഡ്‌സ് യൂണിറ്റ് ഫ്‌ളാഷ് മോബ് അവതരിപ്പിച്ചു.കോ-ഓര്‍ഡിനേറ്റര്‍ ടി എന്‍ പ്രസീദ നേതൃത്വം നല്‍കി.തുടര്‍ന്ന് നടന്ന ലഹരി വിരുദ്ധ ക്ലാസ്സ് പ്രിന്‍സിപ്പാള്‍ ഡോ.എവി രാജേഷ് ഉദ്ഘാടനം ചെയ്തു
അന്താരാഷ്ട്ര ലഹരി വിരുദ്ധ ദിനം: ക്രൈസ്റ്റ് കോളേജ് എന്‍ എസ് എസ് യൂണിറ്റും ഇരിഞ്ഞാലക്കുട എക്സൈസ് ഡിപ്പാര്‍ട്‌മെന്റും ലഹരി വിരുദ്ധ പ്രവര്‍ത്തനങ്ങള്‍ സംഘടിപ്പിച്ചു.
ഇരിഞ്ഞാലക്കുട:അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ചു ക്രൈസ്റ്റ് കോളേജ് എന്‍ എസ് എസ് യൂണിറ്റും ഇരിഞ്ഞാലക്കുട എക്സൈസ് ഡിപ്പാര്‍ട്‌മെന്റും സംയുക്തമായി ലഹരി വിരുദ്ധ പ്രവര്‍ത്തനങ്ങള്‍ സംഘടിപ്പിച്ചു.
ലഹരി വിരുദ്ധ പ്രവര്‍ത്തനങ്ങളുടെ ഭാഗമായി ഇരിഞ്ഞാലക്കുട പ്രദേശത്തുള്ള സെന്റ്.ജോസഫ് ആനന്ദപുരം, എസ് എന്‍ ഇരിഞ്ഞാലക്കുട,ഗവ.ഹയര്‍ സെക്കന്ററി സ്‌കൂള്‍ നടവരമ്പ്,ഗവ.ഗേള്‍സ് ഹയര്‍ സെക്കന്ററി സ്‌കൂള്‍ ഇരിഞ്ഞാലക്കുട,ഗവ.മോഡല്‍ ബോയ്‌സ് ഹയര്‍ സെക്കന്ററി സ്‌കൂള്‍ ഇരിഞ്ഞാലക്കുട,നാഷണല്‍ ഹയര്‍ സെക്കന്ററി സ്‌കൂള്‍ ഇരിഞ്ഞാലക്കുട എന്നിവിടങ്ങളില്‍ എന്‍ എസ് എസ് വോളണ്ടിയേര്‍സ് തെരുവ് നാടകം,ബോധവല്‍ക്കരണ ക്ലാസ് എന്നിവ സംഘടിപ്പിച്ചു. മദ്യം,മയക്കുമരുന്ന് പോലുള്ള ലഹരി വസ്തുക്കള്‍ സമൂഹത്തില്‍ ഉണ്ടാക്കുന്ന വിപത്തുകള്‍,അവ എങ്ങനെ ഒഴിവാക്കാം എന്നീ ആശയങ്ങളാണ് ബോധവല്‍ക്കരണ ക്ലാസ്സുകളിലും തെരുവുനാടകത്തിലും അവതരിപ്പിക്കപ്പെട്ടത്. ക്രൈസ്റ്റ് കോളേജ് എന്‍ എസ് എസ് വോളണ്ടിയേര്‍സ്സായ അര്‍ജുന്‍,ഹിരണ്മയ്, ജെന്‍സണ്‍,രജഷാ എന്നിവരും എന്‍ എസ് എസ് പ്രോഗ്രാം ഓഫീസറായ പ്രൊഫ.അരുണ്‍ ബാലകൃഷ്ണനും ഇരിഞ്ഞാലക്കുട എക്സൈസ് ഇന്‍സ്പെക്ടര്‍ എം.ഒ വിനോദും ലഹരിവിരുദ്ധ പ്രവര്‍ത്തനങ്ങള്‍ക്ക് നേതൃത്വം നല്‍കി.
ക്രൈസ്റ്റ് ഓട്ടോണമസ് കോളേജില്‍ ലഹരിവിരുദ്ധ സന്ദേശം പ്രചരിപ്പിക്കാന്‍ രക്തദാന മഹോല്‍സവം
ഇരിങ്ങാലക്കുട :ലോക ലഹരിവിരുദ്ധദിനമായ ഇന്ന്് തൃശൂര്‍ ഐ.എം.എ. യുടെ സഹകരണത്തോടെ ക്രൈസ്റ്റ് ഓട്ടോണമസ് കോളേജിലെ തവനീഷ് പ്രവര്‍ത്തകര്‍ രക്തദാനമഹോല്‍സവം സംഘടിപ്പിച്ചു.കോളേജ് പ്രിന്‍സിപ്പല്‍ ഡോ.മാത്യു പോള്‍ അടക്കം 71 പേര്‍ രക്തം പരിശോധിച്ച് രക്തദാനം നടത്തിയതായി തവനീഷ് കോര്‍ഡിനേറ്റര്‍ പ്രൊഫ.മൂവീഷ് മുരളി അറിയിച്ചു. പി.ആര്‍.ഒ. ഡോ.സെബാസ്റ്റ്യന്‍ ജോസഫ്, ഐ.എം.എ. പ്രതിനിധി ഡോ.എസ്.എം.ബാലഗോപാലന്‍, ജെറീന്‍ പോള്‍, ജാസ്മിന്‍ ലില്ലി മറിയം, ജെസ്‌ന അജിത്ത്, സൂരജ് പി.എ.,സയന ഷംസുദീന്‍ എന്നിവര്‍ നേതൃത്വം നല്‍കി.
പാറയില്‍ കുഞ്ഞുവാറു മകന്‍ ദേവസ്സിക്കുട്ടി നിര്യാതനായി(80)
പാറയില്‍ കുഞ്ഞുവാറു മകന്‍ ദേവസ്സിക്കുട്ടി നിര്യാതനായി(80).സംസ്‌ക്കാരകര്‍മ്മം 27-06-2018 ബുധനാഴ്ച വൈകീട്ട് 4 മണിക്ക് സെന്റ് സെബാസ്റ്റ്യന്‍സ് ദേവാലയ സെമിത്തേരിയില്‍
മക്കള്‍- ഷാജു,ബിജു,മിനി
മരുമക്കള്‍-ലിജി വിതയത്തില്‍ വെണ്ണൂര്‍,ലിമി തളിക്കുളം വല്ലച്ചിറ,സണ്ണി മാളിയേക്കല്‍ ചെതലന്‍ അവിട്ടത്തൂര്‍
നടവരമ്പ് ഗവ.എല്‍.പി.സ്‌കൂളിലെ ആറാം ദിനത്തിലെ മാതാപിതാക്കളുടെ കഥകളും കവിതകളും ആകര്‍ഷണീയമായി
നടവരമ്പ് :നടവരമ്പ് ഗവ.എല്‍.പി.സ്‌കൂളിലെ വായനാ പക്ഷാചരണത്തിന്റെ ആറാം ദിനത്തില്‍ മാതാപിതാക്കള്‍ കഥകളും കവിതകളും അവതരിപ്പിച്ചത് കുട്ടികള്‍ക്ക് കൗതുകവവും ആകര്‍ഷകവുമായി. പി.ടി.എ. പ്രസിഡണ്ട് സി.പി. സജി, ജിഷ സി.പി.എന്നിവര്‍ കഥാ- കാവ്യാവതരണത്തിന് നേതൃത്വം നല്‍കി. പുസ്തകപ്പെട്ടിയില്‍ പുസ്തകം നിക്ഷേപിച്ച കുട്ടികളില്‍ നിന്നും തെരഞ്ഞെടുക്കപ്പെട്ട അന്‍ജിത്തിന് പ്രധാന അധ്യാപിക എം.ആര്‍. ജയസൂനം പാരിതോഷികം നല്‍കി അനുമോദിച്ചു.
ഇരിഞ്ഞാലക്കുട വെസ്റ്റ് ലയണ്‍സ് ക്ലബ്ബിലെ 2018-19 വര്‍ഷത്തെ ഭാരവാഹികളുടെ സ്ഥാനാരോഹണം നടന്നു.
ഇരിഞ്ഞാലക്കുട: ഇരിഞ്ഞാലക്കുട വെസ്റ്റ് ലയണ്‍സ് ക്ലബ്ബിലെ 2018-19 വര്‍ഷത്തെ പ്രസിഡന്റ് ആയി ലയണ്‍ ആന്റോ ചിറ്റിലപ്പിള്ളി, സെക്രട്ടറി, ഷാജു കണ്ടംകുളത്തി, ട്രഷറര്‍ സതീശന്‍ നീലങ്കാട്ടില്‍ എന്നിവരെ തിരഞ്ഞെടുത്തു. ഡിസ്റ്റിക്ള്‍ട് സെക്കന്‍ഡ് വൈസ് ഗവര്‍ണര്‍ ലയണ്‍ സാജു പാത്താടന്‍, ഭാരവാഹികള്‍ക്ക് ചുമതലകള്‍ കൈമാറി. പ്രസ്തുത യോഗത്തില്‍ വച്ച് PLUSTWO, SSLC വിദ്യാര്‍ത്ഥികളെ അനുമോദിച്ചു. നിര്‍ധന കുടുംബത്തിന് ഡയാലിസിനുള്ള തുക കൈമാറി.
മുരിയാട് -ഗ്രാമപഞ്ചായത്തിലെ 12-ാം വാര്‍ഡില്‍ കുടുംബശ്രീ -വാര്‍ഷികം നടത്തി.
മുരിയാട്:മുരിയാട് ഗ്രാമപഞ്ചായത്തിലെ 12-ാം വാര്‍ഡില്‍ ‘തുഷാര കുടുംബശ്രീയുടെയും ,പുല്ലൂര്‍ സര്‍വ്വീസ് സഹകരണ ബാങ്കിന്റെ കീഴിലുള്ള സ്വയം സഹായ സംഘത്തിന്റെയും സംയുക്ത വാര്‍ഷികാഘോഷം ഗ്രാമപഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മറ്റി ചെയര്‍മാന്‍ അജിത രാജന്‍ ഉദ്ഘാടനം ചെയ്തു.പുല്ലൂര്‍ സര്‍വ്വീസ് സഹകരണ ബാങ്ക് പ്രസിഡന്റ് ജോസ് ജെ ചിറ്റിലപ്പിള്ളി ,ഭരണസമിതി അംഗങ്ങള്‍ പി ആര്‍ മണി ,സി ഡി എസ് അംഗം അംബിക മാധവന്‍ ,പി വി രാജേഷ്,തുടങ്ങിയവര്‍ സംബന്ധിച്ചു.ഇന്ദിര ശശി ,ബിജി മോള്‍ ബിജു എന്നിവര്‍ റിപ്പോര്‍ട്ടുകള്‍ അവതരിപ്പിച്ചു.പത്മിനി ഭയാനന്ദന്‍ ,വിനോദിനി വാസുദേവന്‍ തുടങ്ങിയവര്‍ സംസാരിച്ചു
കേരളവും മാറി ചിന്തിക്കുന്നു മേരിക്കുട്ടിയിലൂടെ….
കേരളവും മാറി ചിന്തിക്കുന്നു മേരിക്കുട്ടിയിലൂടെ .നമ്മളിലൊരാളായി ജീവിക്കുന്ന ട്രാന്സ്ജെന്ഡര് സമൂഹത്തിനോടുള്ള കേരള സമൂഹത്തിന്റെ കാഴ്ചപ്പാടിനെ മാറ്റാന്‍ ‘ഞാന്‍ മേരിക്കുട്ടി’ എന്ന ചിത്രത്തിന് കഴിഞ്ഞു.മിമിക്രിയുടെ അതിഭാവുകത്വം ഇല്ലാതെ ജയസൂര്യ എന്ന നടന്‍ തന്റെ ആത്മാര്‍ത്ഥത നിറഞ്ഞ അഭിനയത്തിലൂടെ കഥാകൃത്തും സംവിധായകനും ഉദ്ദേശിച്ച സന്ദേശം ജനങ്ങളിലേക്കെത്തിച്ചു.ഇതുവരെ എന്നും കളിയാക്കാനും മാറ്റി നിര്‍ത്താനും അവശേഷിക്കപ്പെട്ട സമൂഹം -ട്രാന്സ്ജെന്ഡര് .ബാല്യകാലത്തില്‍ നിന്ന് കൗമാരത്തിലേക്ക് കടക്കുമ്പോള്‍ തന്നിലെ സ്വത്വം മത്തായി എന്ന ആണ്‍കുട്ടി മനസ്സിലാക്കുകയും പിന്നീടങ്ങോട്ട് താനായി ജീവിക്കാന്‍ മത്തായി നടത്തുന്ന അതിജീവനത്തിന്റെയും കഥയാണ് മേരിക്കുട്ടി
മാത്തുകുട്ടി, മേരിക്കുട്ടിയാകാന്‍ തയ്യാറെടുക്കുന്നതാണ് സിനിമയുടെ തുടക്കം. ട്രാന്സ്ജെന്ഡര് ആയ മേരിക്കുട്ടിയെ സ്വന്തം മാതാപിതാക്കളും നാട്ടുക്കാരും അപമാനിക്കുകയും അവഹേളിക്കുകയും ചെയ്യുന്നു. വിപ്രോയില്‍ ഒരു നല്ല ജോലി ഉപേക്ഷിച്ച് നാട്ടിലെത്തിയ അവളുടെ ആഗ്രഹം പോലീസുകാരിയാകുക എന്നതാണ്. അതിനായി എല്ലാ പ്രതിബന്ധങ്ങളെയും പ്രയാസങ്ങളെയും അതിജീവിച്ച് അവള്‍ മുന്നോട്ട് പോകുന്നു.യഥാര്‍ത്ഥത്തില്‍ ഏതു വിഭാഗത്തില്‍പ്പെട്ടവരും കണ്ടിരിക്കേണ്ട സിനിമ.എന്നും കോമാളികളായും വെറുക്കപ്പെട്ടവരായും നാം സമൂഹത്തില്‍ കാണുന്ന ട്രാന്‍സ്ജെന്‍ഡേഴ്സും മനുഷ്യനാണ് എന്ന് കാട്ടി തരുന്ന സിനിമ.ഇതിനു മുന്‍പും ഇത്തരം പ്രമേയങ്ങള്‍ സിനിമയില്‍ അവതരിപ്പിച്ചിട്ടുണ്ടെങ്കിലും അവര്‍ക്കും സ്വപ്നങ്ങളുണ്ട് അവര്‍ക്കും ജീവിക്കണം എന്ന് പച്ചയായ കഥാവതരണത്തിലൂടെ കാട്ടിതരുന്നു.കഥാപാത്രങ്ങളെല്ലാവരും ഒന്നിനൊന്ന് മികച്ച പ്രകടനം കാഴ്ച വച്ചു.ജയസൂര്യ എന്ന നടന്റെ കാലിബര്‍ ശരിക്കും കാണാം കഥയിലുട നീളം .
മികച്ച അഭിനയ മൂഹൂര്‍ത്തങ്ങളുള്ള ഒരു സിനിമയാണ് ‘ഞാന്‍ മേരിക്കുട്ടി’. ഒരു കഥയെക്കാള്‍ നിരവധി രംഗങ്ങള്‍ മേരിക്കുട്ടിയുടെ ജീവിതത്തെ ചുറ്റിപറ്റി കോര്‍ത്തിണക്കി അവതരിപ്പിച്ചിരിക്കുന്നു. തമാശ രംഗങ്ങള്‍ അധികം ഇല്ലെങ്കിലും രസകരമായി കഥ ഒഴുകുന്നുണ്ട്. രഞ്ജിത്ത് ശങ്കര്‍ സിനിമകളില്‍ പതിവുള്ള പ്രചോദനാത്മക ഉദ്ധരണികളുടെ തിളക്കം ഇവിടെയും ഉണ്ട് . എങ്കിലും ആദ്യമധ്യാന്തം അമിത നാടകീയത കടന്നുകൂടുന്ന ചില സന്ദര്‍ഭങ്ങളുമുണ്ട്. നന്മ നിറഞ്ഞ കഥാപാത്ര സൃഷ്ടിക്കിടയില്‍ ചില മേഖലകള്‍ അവഗണിക്കപ്പെട്ടിട്ടുമുണ്ട്.
പോംപൈ സെന്റ് മേരീസ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ ലഹരിവിരുദ്ധ ദിനം ആചരിച്ചു
കാട്ടൂര്‍- കാട്ടൂര്‍ പോംപൈ സെന്റ് മേരീസ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ എന്‍ എസ് എസ് യൂണിറ്റിന്റെ നേതൃത്വത്തില്‍ ലഹരിവിരുദ്ധ ദിനം ആചരിച്ചു.കുട്ടികളെല്ലാവരും ലഹരിവിരുദ്ധ പ്രതിജ്ഞയെടുത്തു.ഇരിഞ്ഞാലക്കുട റേഞ്ച് എക്സൈസ് ഉദ്യോഗസ്ഥ സതി കുട്ടികള്‍ക്കും അധ്യാപകര്‍ക്കും വേണ്ടി ക്ലാസ് എടുത്തു.പ്രോഗ്രാം ഓഫീസര്‍ രശ്മി സ്വാഗതം പറഞ്ഞു.പ്രിന്‍സിപ്പല്‍ ബാലകൃഷ്ണന്‍ ആമുഖപ്രസംഗവും വോളണ്ടിയര്‍ ക്രിഷ്ണിക തമ്പി നന്ദിയും രേഖപ്പെടുത്തി
പ്രദീപ് കല്ലട അന്തരിച്ചു.
കാറളം :ഗ്രാമപഞ്ചായത്ത് മുന്‍ മെമ്പറും കാട്ടൂര്‍ ബ്ലോക്ക് കോണ്‍ഗ്രസ് എക്‌സിക്യുട്ടീവ് മെമ്പറുമായ താണിശ്ശേരി കല്ലട രാമന്‍ മകന്‍ പ്രദീപ്,(51) അന്തരിച്ചു.സംസ്‌ക്കാരം നാളെ(26 06 2018) രാവിലെ 9.30ന് വീട്ടുവളപ്പില്‍. ഭാര്യ ഷൈനി പ്രദീപ്.സഹോദരന്‍- ശശികുമാര്‍
ഇരിങ്ങാലക്കുട സ്‌പെഷ്യല്‍ സബ്ബ് ജയിലില്‍ ഗുണ്ടാവിളയാട്ടം
ഇരിങ്ങാലക്കുട : ഠാണവില്‍ പ്രവര്‍ത്തിക്കുന്ന ഇരിങ്ങാലക്കുട സ്‌പെഷ്യല്‍ സബ്ബ് ജയിലില്‍ ഗുണ്ടാവിളയാട്ടം നടക്കുന്നതായി വിവരം.കൊടകര പോലിസ് സ്‌റ്റേഷന്‍ പരിധയിലെ മയക്ക് മരുന്ന് അബ്കാരി കേസുകളില്‍ അകപ്പെട്ട് സബ്ബ് ജയില്‍ എത്തിയ പ്രതി ജീവനക്കാരെ ഭീഷണിപെടുത്തുകയും വധഭീഷണി മുഴക്കി അനര്‍ഹമായ സൗകര്യങ്ങള്‍ നേടാന്‍ ശ്രമിക്കുകയും ചെയ്തിട്ടുണ്ട്.ജയില്‍ ഉദ്യോഗസ്ഥരുടെ നിര്‍ദേശങ്ങള്‍ അനുസരിക്കാത്ത പ്രതി ഭക്ഷണത്തിന്റെ പേരിലും മറ്റും സ്ഥിരമായി ബഹളം തുടര്‍ന്നതിനെ തുടര്‍ന്ന് സെല്ലിന് പുറത്തിറക്കി നിര്‍ത്തിയതില്‍ പ്രതിഷേധിച്ച് ഗ്ലാസും നഖവും ഉപയോഗിച്ച് സ്വന്തം ശരിരത്തില്‍ മുറിവേല്‍പ്പിച്ചതിനെ തുടര്‍ന്ന് താലൂക്കാശുപത്രിയില്‍ പ്രവേശിപ്പിച്ചു.ജയിലിലെ സമാധാന അന്തരീക്ഷത്തിന് ഭീഷണിയായതിനാല്‍ ഇയാളെ വീയൂരിലേയ്ക്ക് മാറ്റുകയായിരുന്നു.ജയില്‍ ജീവനക്കാര്‍ മര്‍ദ്ദിച്ചെന്നാരോപിച്ച് തൃശ്ശൂര്‍ മെഡിയ്ക്കല്‍ കോളേജില്‍ ചികിത്സ തേടിയിരിക്കുകയാണ്.നിലവില്‍ 35 തടവുക്കാരെ പാര്‍പ്പിക്കാന്‍ സൗകര്യമുള്ള ജയിലില്‍ 70 ല്‍ കൂടുതല്‍ തടവുക്കാരെയാണ് പാര്‍പ്പിച്ചിരിക്കുന്നത്.ആകെ 5 സെല്ലുകള്‍ മാത്രമുള്‌ല സബ്ബ് ജയിലില്‍ അക്രമാസക്തരായ തടവുക്കാരെയും മദ്യം,മയക്ക്മരുന്ന് എന്നിവയ്ക്ക് അടിമകളായ തടവുക്കാരെയും പകര്‍ച്ചവ്യാധികളില്‍പ്പെട്ട തടവുക്കാരെയും വേര്‍തിരിച്ച് പാര്‍പ്പിക്കുന്നതിനുള്ള സെല്ലുകളുടെയും കുറവുണ്ട്.പ്രതികളെ നിയന്ത്രിക്കുന്നതിന്റെ ഭാഗമായി ജയില്‍ ജീവനക്കാര്‍ നിയമനടപടി നേരിടെണ്ട സാഹചര്യമാണിപ്പോള്‍.
സെന്റ് ജോസഫ്‌സ് കോളേജിന് കായിക അവാര്‍ഡ്
ഇരിങ്ങാലക്കുട:2017-18 വര്‍ഷത്തെ കാലിക്കറ്റ് യൂണിവേഴ്‌സിറ്റിയിലെ കായിക മികവിനുള്ള മികച്ച രണ്ടാമത്തെ വനിതാ കോളേജായി ഇരിങ്ങാലക്കുട സെന്റ് ജോസഫ്‌സ് കോളേജ് തിരഞ്ഞെടുക്കപ്പെടുകയും അവാര്‍ഡ് ലഭിക്കുകയും ചെയ്തു.കാലിക്കറ്റ് യൂണിവേഴ്‌സിറ്റിയില്‍ വച്ച് നടന്ന അവാര്‍ഡ്ദാന ചടങ്ങില്‍ മന്ത്രി ഡോ .കെ ടി ജലീല്‍ സമ്മാനം നിര്‍വ്വഹിച്ചു.
കാലിക്കറ്റ് യൂണിവേഴ്‌സിറ്റി 2017-18 വര്‍ഷത്തെ അഖിലേന്ത്യാ ഇന്റര്‍ യൂണിവേഴ്‌സിറ്റി ബാസ്‌ക്കറ്റ് ബോള്‍ ചാമ്പ്യന്‍ഷിപ്പില്‍ കിരീടം ചൂടിയപ്പോള്‍ സെന്റ് ജോസഫ്‌സ് കോളേജിന്റെ സംഭാവന വലുതായിരുന്നു.
