പുല്ലൂര്‍ :പോട്ട-മൂന്ന്പീടിക സംസ്ഥാന പാതയില്‍ പുല്ലൂര്‍ മിഷന്‍ ആശുപത്രിയ്ക്ക് സമീപമുള്ള ഉരിയച്ചിറയില്‍നിന്നും അനധികൃതമായി ലോറിയില്‍ വെള്ളമെടുക്കുന്നു.അന്യസംസ്ഥാന തൊഴിലാളികളാണ് ലോറിയിലെത്തി അപകട വളവില്‍ വാഹനം പാര്‍ക്ക് ചെയ്ത് മോട്ടോര്‍ ഉപയോഗിച്ചു വെള്ളം ടാങ്കറില്‍ നിറച്ച് കൊണ്ടുപോകുന്നത്.സ്വകാര്യ മെബൈല്‍ കമ്പനികള്‍ക്ക് റോഡില്‍ കുഴിയെടുത്ത് ഒപ്റ്റിക്കല്‍ ഫെബര്‍ കേബിളുകള്‍ വലിക്കുന്നതിനായാണ് ഇത്തരത്തില്‍ അധികൃതരുടെ അറിവില്ലാതെ ജലചൂക്ഷണം നടത്തുന്നത്.മാധ്യമങ്ങളുടെ ക്യാമറകള്‍ കണ്ടതോടെ മോട്ടോര്‍ അഴിച്ച് മാറ്റി ഇവര്‍ ലോറിയുമായി കടന്ന്കളഞ്ഞു.ഇരിങ്ങാലക്കുട നഗരസഭയുടെയും മുരിയാട് പഞ്ചായത്തിന്റെയും അതിര്‍ത്തി പങ്കിടുന്ന ഇടമാണിത്. ഇത്തരം ജല സ്രോതസ്സുകളില്‍ നിന്നും വെള്ളം മറ്റു ആവശ്യങ്ങള്‍ക്ക് കൊണ്ടുപോകരുത് എന്ന നിയമം നിലനില്‍ക്കുമ്പോളാണ് ഇവിടെ ജലചൂഷണം നടക്കുന്നത്.

ഇരിങ്ങാലക്കുട : 58- ാംമത് കേരള സ്‌കൂള്‍ കലോത്സവ സമാപനദിനമായ 10-01-2018 ബുധനാഴ്ച്ച കലോത്സവം നടക്കുന്ന തൃശ്ശൂര്‍ ജില്ലയിലെ വിദ്യഭ്യാസ സ്ഥപനങ്ങള്‍ക്ക് അവധിപ്രഖ്യാപിച്ചതായി ജില്ലാകളക്ടര്‍ അറിയിച്ചു.തൃശൂര്‍ റവന്യൂ ജില്ലയിലെ സര്‍ക്കാര്‍,എയ്ഡഡ്,അംഗീകൃത അണ്‍എയ്ഡഡ് മേഖലകളിലെ പ്രൈമറി,സെക്കന്ററി,ഹയര്‍ സെക്കന്ററി,വൊക്കേഷണല്‍ ഹയര്‍ സെക്കന്ററി സ്‌കൂളുകള്‍ക്കാണ് അവധി പ്രഖ്യാപിച്ചിരിക്കുന്നത്.സി ബി എസ് സി,ഐ സി എസ് വിഭാഗത്തിലെ സ്‌കൂളുകള്‍ക്ക് അവധി ബാധകമല്ല.

ഇരിങ്ങാലക്കുട..ഇരിങ്ങാലക്കുട രൂപത റൂബി ജൂബിലിയുടെ ഭാഗമായി രൂപതാ സോഷ്യല്‍ ആക്ഷന്‍ ഫോറം രൂപം നല്‍കിയ ലിറ്റില്‍ ഹാര്‍ട്ട് പദ്ധതിയുടെ ഭാഗമായി ഹ്യദയസംബന്ധമായ രോഗമുള്ള കുട്ടികള്‍ക്കുവേണ്ടി സോഷ്യല്‍ ആക്ഷന്‍ ഫോറം ഓഡിറ്റോറിയത്തില്‍ വച്ച് ജനുവരി 20ന് ശനിയാഴ്ച്ച രാവിലെ 9.30 മുതല്‍ വൈകിട്ട് 4വരെ സൗജന്യ പീഡിയാട്രിക് കാര്‍ഡിയോളജി ക്യാമ്പ് നടത്തുന്നു.ക്യാമ്പില്‍ ആസ്റ്റര്‍ മെഡിസിറ്റിയിലെ ഡോക്ടര്‍മാര്‍ ഒരുവയസു മുതല്‍ 18 വയസു വരെയുളള കുട്ടികളുടെ ഹ്യദയസംബന്ധമായ എല്ലാ അസുഖങ്ങളും ഇ.സി.ജി.എക്കോ ടെസറ്റ് തുടങ്ങിയ പരിശോധനകള്‍ നടത്തി ശസ്ത്രക്രിയ ആവശ്യമായവര്‍ക്ക് (ഹ്യദയത്തിന് ദ്വാരം,വാല്‍വിന് ദ്വാരം) കൊച്ചി ആസറ്റര്‍ മെഡിസിറ്റിയില്‍ വച്ച് സര്‍ക്കാരിന്റെ ആര്‍.ബി.എസ്.കെ. ഹ്യദയപ്രോജക്ടിലൂടെ സൗജന്യശസ്ത്രക്രിയ നടത്തി കൊടുക്കും.ക്യാമ്പില്‍ പങ്കെടുക്കുവാന്‍ ആഗ്രഹിക്കുന്നവര്‍ ജനുവരി പത്തിനകം ഇരിങ്ങാലക്കുട സോഷ്യല്‍ ആക്ഷന്‍ ഫോറം ഓഫീസിലോ, 0480-2834144,0480-2626990 എന്ന നമ്പറുകളിലോ ബന്ധപ്പെടണമെന്ന് ഫാ.വര്‍ഗീസ് കോന്തുരുത്തി അറിയിച്ചു.

ഇരിങ്ങാലക്കുട : കൂടല്‍മാണിക്യം ക്ഷേത്രത്തിന് സമീപത്ത് നിന്ന് കെ.എസ്.ആര്‍.ടി.സി ബസ് സ്റ്റാന്‍ഡിലേയ്ക്ക് പോകുന്ന റോഡില്‍ വാഹനങ്ങളില്‍ നിന്നും ഡീസല്‍ ചോര്‍ന്നതിനെ തുടര്‍ന്ന് നിരവധി ഇരുചക്ര വാഹനങ്ങള്‍ അപകടത്തില്‍ പെട്ടു.തിങ്കളാഴ്ച്ച രാത്രിയാണ് റോഡില്‍ ഡിസല്‍ ചോര്‍ച്ച ഉണ്ടായിട്ടുള്ളത്.കെ എസ് ആര്‍ ട്ടി സി ബസ് സ്റ്റാന്റ് മുതല്‍ എല്ലാ വളവുകളിലും ഡിസല്‍ റോഡില്‍ ചോര്‍ന്ന നിലയിലാണ്.ചെവ്വാഴ്ച്ച പുലര്‍ച്ചേ ഇത് വഴി വന്ന നിരവധി ബൈക്ക് യാത്രക്കാരാണ് അപകടത്തില്‍പ്പെട്ടത്.വാഹനങ്ങള്‍ റോഡില്‍ പരന്നു കിടക്കുന്ന ഡീസലില്‍ തെന്നി വീഴുകയായുന്നു.ജനങ്ങള്‍ പരാതിപ്പെട്ടതിനെ തുടര്‍ന്ന് അഗ്നിശമന സേനാവിഭാഗം എത്തി റോഡ് വെള്ളമെഴിച്ച് വൃത്തിയാക്കി.സമാപത്ത് നിന്ന് മണ്ണ് വാരിയിട്ട് റോഡിന്റെ വഴുക്കല്‍ ഇല്ലാതെയാക്കി.കെ.എസ്.ആര്‍.ടി.സി ബസില്‍ നിന്നാണ് ഡീസല്‍ ചോര്‍ന്നതെന്നു നാട്ടുകാര്‍ പരാതിപ്പെട്ടിരുന്നു എന്നാല്‍ കെ.എസ്.ആര്‍.ടി.സി അധികൃതര്‍ ഇത് നിഷേധിച്ചു.ഡിസല്‍ ചോര്‍ച്ച നടന്നിട്ടുണ്ടെങ്കില്‍ ബസ് ഡ്രെവര്‍മാര്‍ റിപോര്‍ട്ട് ചെയ്യുമെന്നും ബസ് സ്റ്റാന്റില്‍ ഡിസല്‍ ചോര്‍ച്ചയൊന്നും ശ്രദ്ധയില്‍പ്പെട്ടിട്ടില്ലെന്നും കെ.എസ്.ആര്‍.ടി.സി അധികൃതര്‍ വ്യക്തമാക്കി.അഗ്‌നിശമനസേനാ വിഭാഗത്തിന്റെ സ്റ്റേഷന്‍ ഓഫീസര്‍ പി. വെങ്കിട്ടരാമന്‍, ലീഡിങ് ഫയര്‍മാന്‍ എം.എസ് രമേഷ്, ഫയര്‍മാന്‍മാരായ സനൂപ് പി.ബി, രഞ്ജിത്ത്. ആര്‍, മനോജ്.എം, ഫയര്‍മാന്‍ ഡ്രൈവര്‍ അജയന്‍.ടി.എസ് എന്നിവരുടെ നേതൃത്വത്തിലാണ് റോഡ് സഞ്ചാരയോഗ്യമാക്കിയത്.

ഇരിങ്ങാലക്കുട: ബൈപ്പാസ് റോഡ് തുറന്ന് കൊടുത്തെങ്കിലും ആവശ്യത്തിന് വഴി വിളക്കുകള്‍ ഇല്ലാത്തത് ഇതുവഴിയുള്ള രാത്രിയാത്ര ദുഷ്‌ക്കരമാക്കുന്നു. നേരത്തെ റോഡില്‍ പലയിടത്തും സോളാര്‍ ലൈറ്റുകള്‍ സ്ഥാപിച്ചിട്ടുണ്ടെങ്കിലും ഒന്നും കത്താത്ത അവസ്ഥയിലാണ്. ഇതുമൂലം റോഡരുകില്‍ മാലിന്യ നിക്ഷേപം തുടരുന്നതായി പ്രദേശവാസികള്‍. പുതുവത്സര സമ്മാനമായിട്ടാണ് ഇരിങ്ങാലക്കുട നഗരസഭ ബൈപ്പാസ് റോഡ് പൊതുജനങ്ങള്‍ക്കായി തുറന്ന് നല്‍കിയത്. എന്നാല്‍ വര്‍ഷങ്ങള്‍ക്ക് മുമ്പ് ബൈപ്പാസ് റോഡില്‍ സ്ഥാപിച്ചിരുന്ന സോളാര്‍ വഴിവിളക്കുകള്‍ കത്തിക്കാനോ കൂടുതല്‍ വിളക്കുകള്‍ സ്ഥാപിക്കാനോ നഗരസഭ ഇനിയും നടപടിയെടുത്തിട്ടില്ല. ബൈപ്പാസ് റോഡിലെ സോളാര്‍ വിളക്കുകള്‍ ഭൂരിഭാഗവും അറ്റകുറ്റപണികള്‍ നടത്താതെ നാശോന്മുഖമായി കഴിഞ്ഞു. വേണ്ടവിധം ശ്രദ്ധിക്കാതെ നിരവധി ലൈറ്റുകള്‍ നോക്കുകുത്തികളായി. പല വിളക്കുകളും ഒടിഞ്ഞുവീണു. ചിലത് കാടുകയറി. പലതിന്റേയും ബാറ്ററികള്‍ മോഷ്ടിക്കപ്പെട്ടു. ലക്ഷങ്ങളാണ് ഇതിന്റെ പേരില്‍ നഗരസഭയ്ക്ക് നഷ്ടപ്പെട്ടത്. കഴിഞ്ഞ ഭരണസമിതിയുടെ കാലത്താണ് ഒന്നിന് 27, 400 രൂപ നിരക്കില്‍ 100 സോളാര്‍ വിളക്കുകള്‍ ഇരിങ്ങാലക്കുട മുനിസിപ്പാലിറ്റി പരിധിയില്‍ സ്ഥാപിച്ചത്. എന്നാല്‍ നാല് വര്‍ഷം കഴിഞ്ഞിട്ടും ഇവയുടെ അറ്റകുറ്റപണികള്‍ ഇതുവരേയും നഗരസഭയ്ക്ക് കഴിഞ്ഞീട്ടില്ല. വഴി വിളക്കുകള്‍ കത്താത്തതിന്റെ പേരില്‍ കൗണ്‍സില്‍ യോഗത്തില്‍ പ്രതിഷേധിക്കുന്ന പ്രതിപക്ഷവും ബൈപ്പാസിലെ ലൈറ്റുകളുടെ കാര്യത്തില്‍ മൗനത്തിലാണ്. ബൈപ്പാസ് റോഡില്‍ അത്യാവശ്യം വേണ്ടതാണ് വഴി വിളക്കുകള്‍. വഴിവിളക്കുകള്‍ ഇല്ലാത്ത ഈ റോഡില്‍ മാലിന്യ നിക്ഷേപം വര്‍ദ്ധിച്ചതായി നാട്ടുകാര്‍ പറയുന്നു. ചാക്കുകളിലും കവറുകളിലുമായി റോഡിന്റെ പലഭാഗങ്ങളിലും മാലിന്യങ്ങള്‍ വലിച്ചെറിയുകയാണ്. ഇതിന് പുറമെ മെഡിക്കല്‍ അടക്കമുള്ള മറ്റ് മാലിന്യങ്ങളും തള്ളുന്നുണ്ട്. റോഡിന്റെ മൂന്നാംഘട്ട ഭാഗത്ത് ഒരു വിളക്കുപോലും നഗരസഭ സ്ഥാപിച്ചിട്ടില്ല. ഇതുമൂലം രാത്രികാലങ്ങളില്‍ ഇതുവഴിയുള്ള യാത്ര ദുഷ്‌ക്കരമാണെന്ന് ജനം പറയുന്നു. നഗരത്തിന്റെ ഹൃദയഭാഗത്ത് സ്ഥിതി ചെയ്യുന്ന ഈ റോഡില്‍ എത്രയും വേഗം വിളക്കുകള്‍ സ്ഥാപിക്കാന്‍ നഗരസഭ തയ്യാറാകണമെന്നാണ് ജനത്തിന്റെ ആവശ്യം. ഇതിലൂടെ മാലിന്യ നിക്ഷേപത്തിന് ഒരു പരിധിവരെ തടയിടാനാകുമെന്നാണ് ജനം കരുതുന്നത്.

ഇരിങ്ങാലക്കുട : നമ്പൂതിരീസ് കോളേജ് ഓഫ് ടീച്ചര്‍ എഡ്യൂക്കേഷന്‍ 2017-18 വര്‍ഷത്തെ കോളേജ് യൂണിയന്‍ ഉദ്ഘാടനം കാലടി സംസ്‌കൃത സര്‍വകലാശാല വൈസ് ചാന്‍സലര്‍ ഡോ.ധര്‍മരാജ് അടാട്ട് നിര്‍വഹിച്ചു . ആര്‍ട്‌സ് ക്ലബ് ഉദ്ഘാടനം സുപ്രസിദ്ധ സിനിമ സീരിയല്‍ താരം ഫിറോഷും വോള്‍ മാഗസിന്‍ ഉദ്ഘാടനം കോളേജ് ഡയറക്ടര്‍ കെ.പി. കൃഷ്ണനുണ്ണിയും നിര്‍വഹിച്ചു. പ്രിന്‍സിപ്പാള്‍ മല്ലിക രാജഗോപാല്‍ സ്വാഗതവും യൂണിയന്‍ ചെയര്‍മാന്‍ ജെസില്‍ ജോണ്‍സന്‍ അദ്ധ്യക്ഷത വഹിച്ചു. കൃഷ്ണപ്രസാദിന്റെ നേതൃത്വത്തില്‍ പുതിയ സ്റ്റുഡന്റസ് യൂണിയന്‍ ഭാരവാഹികള്‍ ചുമതലയേറ്റു.

ഇരിങ്ങാലക്കുട : ഉദ്യോഗര്‍ത്ഥികള്‍ക്ക് സുവര്‍ണ്ണാവസരമായി ഇന്ത്യന്‍ അഡ്മിനിസ്ട്രേറ്റീവ് സര്‍വീസിനു (IAS) സമാനമായി കേരളത്തിലും സംസ്ഥാനത്തിന്റതായ അഡ്മിനിസ്ട്രേറ്റീവ് സര്‍വീസ് ആയ കേരള അഡ്മിനിസ്‌ട്രേറ്റീവ് സര്‍വീസിലേക്കുള്ള (കെ.എ.എസ്.) തസ്തിക നിര്‍ണയം പൂര്‍ത്തിയാകുന്നു. ആദ്യഘട്ടത്തില്‍ 115 തസ്തികകള്‍ ഉള്‍പ്പെടെ 3000 ത്തില്‍ പരം ഒഴിവുകള്‍ ഉണ്ടെന്നാണ് വിലയിരുത്തല്‍.ഇതില്‍ പകുതിയോളം ഒഴിവുകളില്‍ നേരിട്ടുള്ള നിയമനം നടത്തും. ബിരുദമായിരിക്കും അടിസ്ഥാന യോഗ്യത.സര്‍ക്കാര്‍ ജോലിയുള്ളവര്‍ക്കും ബിരുദധാരികള്‍ക്കുമാണ് ഈ അവസരം.ജനറല്‍ വിഭാഗത്തില്‍ 32 വയസും സര്‍ക്കാര്‍ ജോലിക്കാര്‍ക്ക് 40 വയസും എസി എസ് ടി വിഭാഗക്കാര്‍ക്ക് 37 വയസുമാണ് പ്രായപരിധി.കെ എ എസിനെ കുറിച്ച് കൂടുതല്‍ അറിയാന്‍ സൗജന്യ സെമിനാര്‍ 2018 ജനുവരി 15ന് തിങ്കളാഴ്ച്ച രാവിലെ 9.30ന് ജ്യോതിസ് കോളേജില്‍ സംഘടിപ്പിക്കുന്നു.ഫോണ്‍ : 0480 2822449 , 7736000407

ഇരിങ്ങാലക്കുട : പിണ്ടിപെരുന്നാളിന്റെ സമാപനദിനമായ തിങ്കളാഴ്ച്ച മരിച്ചവരുടെ ഓര്‍മ്മദിവസമായി ആചരിക്കുന്നു.രാവിലെ നടന്ന വിശുദ്ധ കുര്‍ബാനയ്ക്ക് ശേഷം വിശ്വാസികള്‍ സെമിത്തേരിയില്‍ പൂക്കളും തിരികളുമായി പ്രര്‍ത്ഥന നടത്തി.തിങ്കളാഴ്ച്ച വൈകിട്ട് ഇടവകയിലെ ബാക്കിയുള്ള അമ്പുകള്‍ കൂടി പള്ളിയില്‍ എത്തുന്നതോടെ ഈ വര്‍ഷത്തേ പിണ്ടിപെരുന്നാളിന് സമാപനം കുറിയ്ക്കും.ബുധനാഴ്ച്ച ഉച്ചതിരിഞ്ഞ് 3.30ന് പ്രവാസി സംഗമം നടക്കും.തിരുന്നാള്‍ തത്സമയം www.irinjalakuda.com ല്‍ കാണാവുന്നതാണ്.

ഇരിങ്ങാലക്കുട: ഗതാഗതത്തിനായി തുറന്ന് കൊടുത്തിട്ടുള്ള ബൈപ്പാസില്‍ കാട്ടൂര്‍- സിവില്‍ സ്റ്റേഷന്‍ റോഡ് ജംഗ്ഷനിലെ അപകടങ്ങള്‍ ഒഴിവാക്കാന്‍ ഹമ്പ് ഉള്‍പ്പടെയുള്ള സുരക്ഷാ സംവിധാനങ്ങള്‍ ഏര്‍പ്പെടുത്തണമെന്ന് മുകുന്ദപുരം താലൂക്ക് വികസന സമിതി ആവശ്യപ്പെട്ടു. നാല് റോഡുകള്‍ കൂടിചേരുന്ന ഈ ഭാഗത്ത് അപകടങ്ങള്‍ സ്ഥിരം സംഭവമാണ്. അപകടങ്ങള്‍ ഒഴിവാക്കാന്‍ അനുയോജ്യമായ സുരക്ഷാ സംവിധാനം ഏര്‍പ്പെടുത്തണമെന്നാണ് വികസന സമിതി ആവശ്യം. ഠാണ ബസ് സ്റ്റാന്റ് റോഡ് വികസനത്തിന്റെ ഭാഗമായി നിലനില്‍ക്കുന്ന പ്രശ്നങ്ങള്‍ നഗരസഭ, പൊതുമരാമത്ത് വകുപ്പ്, കെ.എസ്.ഇ.ബി, വാട്ടര്‍ അതോററ്റി അധികൃതര്‍ ഒത്തൊരുമിച്ച് പരിഹരിക്കണമെന്നും വികസന സമിതി ആവശ്യപ്പെട്ടു. അക്ഷയകേന്ദ്രങ്ങള്‍ നല്‍കുന്ന വിവിധ സേവനങ്ങള്‍ക്ക് സര്‍ക്കാര്‍ നിശ്ചയിച്ചിട്ടുള്ള ഏകീകൃത നിരക്ക് പ്രസ്തുത കേന്ദ്രങ്ങളില്‍ പ്രദര്‍ശിപ്പിക്കാന്‍ നടപടിയെടുക്കണമെന്ന് സമിതി നിര്‍ദ്ദേശിച്ചു. സാധാരണ ജനങ്ങളെ അക്ഷയകേന്ദ്രങ്ങള്‍ ചൂഷണം ചെയ്യുന്ന നടപടികള്‍ക്ക് തടയിടണമമെന്നും സേവനങ്ങള്‍ക്ക് സ്വീകരിക്കുന്ന തുകകള്‍ക്ക് രശീത് നല്‍കണമെന്നും സമിതി നിര്‍ദ്ദേശം നല്‍കി. ട്രിപ്പ് മുടക്കുന്ന വാഹനങ്ങള്‍ക്കെതിരെ മോട്ടോര്‍ വാഹനവകുപ്പ് കര്‍ശന നടപടി സ്വീകരിക്കണം. അധികൃതര്‍ക്ക് പരാതി സമര്‍പ്പിക്കുമ്പോള്‍ വാഹനങ്ങളുടെ നമ്പര്‍ സഹിതം വിശദാംശങ്ങള്‍ നല്‍കണമെന്നും വികസന സമിതി നിര്‍ദ്ദേശിച്ചു. പടിയൂര്‍ ഭാഗത്ത് ജലവിതരണത്തിനുള്ള അടിയന്തിരനടപടികള്‍ വാട്ടര്‍ അതോററ്റി, പൊതുമരാമത്ത്, കെ.എസ്.ഇ.ബി. അധികൃതര്‍ സ്വീകരിക്കണമെന്ന് വികസന സമിതി ആവശ്യപ്പെട്ടു. പുതുവത്സര സമയത്ത് ക്രമസമാധാനപാലനത്തിനും മയക്കമരുന്നുവേട്ടയ്ക്കും പോലിസ്, എക്സൈസ് വകുപ്പുകള്‍ നടത്തിയ പ്രവര്‍ത്തനങ്ങളെ സമിതി അഭിനന്ദിച്ചു. ബ്ലോക്ക് പഞ്ചായത്ത് പ്രസിഡന്റ് വി.എ. മനോജ് കുമാര്‍ അധ്യക്ഷനായിരുന്നു. നഗരസഭ ചെയര്‍പേഴ്സന്‍ നിമ്യാ ഷിജു, തഹസില്‍ദാര്‍ ഐ.ജെ. മധുസൂദനന്‍, പഞ്ചായത്ത് പ്രസിഡന്റുമാര്‍, മറ്റ് ജനപ്രതിനിധികള്‍, രാഷ്ട്രീയ നേതാക്കള്‍, വിവിധ വകുപ്പ് ഉദ്യോഗസ്ഥര്‍ എന്നിവര്‍ സംസാരിച്ചു.

ഇരിങ്ങാലക്കുട: ഐതീഹ്യങ്ങള്‍ പുനര്‍ജനിച്ചു, വിശുദ്ധന്‍ ഭഗവാനെ കണ്ടു മടങ്ങിയതോടെ ഇരിങ്ങാലക്കുട സെന്റ് തോമസ് കത്തീഡ്രലിലെ പിണ്ടിപെരുന്നാള്‍ പ്രദക്ഷിണം മതസൗഹാര്‍ദത്തിന്റെ സന്ദേശമായി മാറി. ഇന്നലെ ഉച്ചകഴിഞ്ഞ് മൂന്നിന് കത്തീഡ്രല്‍ ദേവാലയത്തില്‍ നിന്നാരംഭിച്ച പ്രദക്ഷിണം ഇരിങ്ങാലക്കുട ബസ് സ്റ്റാന്‍ഡിനു സമീപമുള്ള ആല്‍ത്തറക്കല്‍ എത്തിയപ്പോഴാണു ഐതീഹ്യങ്ങള്‍ പുനര്‍ജനിച്ചത്. കത്തീഡ്രലിലെ വിശുദ്ധ ഗീവര്‍ഗീസും കൂടല്‍മാണിക്യം ക്ഷേത്രത്തിലെ ഭരതനും സംഗമിക്കുന്ന വേദിയാണു ആല്‍ത്തറ എന്നാണു പഴമക്കാരുടെ വിശ്വാസം. അതുകൊണ്ടുതന്നെയാണ് കൂടല്‍മാണിക്യം ക്ഷേത്രോത്സവത്തില്‍ പള്ളിവേട്ടക്ക് ഭരതഭഗവാന്‍ ക്ഷേത്രത്തില്‍നിന്നും ആല്‍ത്തറക്കലേക്കു എഴുന്നള്ളുന്നതും അവിടെവെച്ച് പന്നിയെ അമ്പ് ചെയ്തു കൊല്ലുന്നതും. അധര്‍മത്തെയും ദുഷ്ടമൂര്‍ത്തിയെയും നിഗ്രഹിച്ച് ധര്‍മപ്രകാശം വിതറുക എന്നുള്ളതാണു ഇതുകൊണ്ട് അര്‍ത്ഥമാക്കുന്നത്. ഇതുപോലെയാണ് കത്തീഡ്രല്‍ ദേവാലയത്തിലെ പ്രസിദ്ധമായ പിണ്ടിപ്പെരുന്നാളും.പ്രദക്ഷിണം ആല്‍ത്തറക്കല്‍ എത്തുന്നതും ഭരതനോടു യാത്രചൊല്ലി മടങ്ങുന്നതും അധാര്‍മികതയുടെ അന്ധകാരം നീക്കി പ്രത്യാശയുടെ പൊന്‍വെളിച്ചം വീശുവാനും വിശ്വാസത്തിനായി രക്തസാക്ഷിത്വം വരിക്കുവാനും നഗരവാസികളോടു ആഹ്വാനം ചെയ്യുകയുമാണു ഈ പ്രതീകാത്മക ആവിഷ്‌കാരങ്ങളുടെ അന്തസത്ത. എല്ലാ വര്‍ഷവും ഇരിങ്ങാലക്കുട കത്തീഡ്രലിലെ പിണ്ടിപ്പെരുന്നാള്‍ പ്രദക്ഷിണം ആല്‍ത്തറക്കല്‍വന്ന് തിരിച്ചുപോകുമ്പോള്‍ വിശുദ്ധനും ഭഗവാനും തമ്മില്‍ ഉപചാരം ചൊല്ലി പിരിയുകയാണെന്നാണു ഐതീഹ്യം.
പ്രദക്ഷിണത്തിനു മുന്നില്‍ രണ്ടു കാളവണ്ടികളിലായി നകാരങ്ങളുടെ വരവും രൂപക്കൂടിനു മുന്നില്‍ തൂക്കുവിളക്കേന്തി രണ്ടുപേര്‍ നടന്നുനീങ്ങുന്നതും ചരിത്രത്തെ അനുസ്മരിപ്പിക്കുന്നതാണ്. ഇന്നലെ രാവിലെ നടന്ന തിരുനാള്‍ ദിവ്യബലിക്ക് രൂപത വികാരി ജനറാള്‍ മോണ്‍. ലാസര്‍ കുറ്റിക്കാടന്‍ മുഖ്യകാര്‍മികത്വം വഹിച്ചു. ദീപിക ഫ്രണ്ട്‌സ് ക്ലബ് സംസ്ഥാന ഡയറക്ടര്‍ ഫാ. റോയ് കണ്ണന്‍ചിറ സന്ദേശം നല്‍കി. ഇന്നു രാവിലെ 11 മുതല്‍ വിവിധ അങ്ങാടികളില്‍നിന്നുള്ള അമ്പു എഴുന്നള്ളിപ്പുകള്‍ നടക്കും.