ഇരിങ്ങാലക്കുട: യുവാവിനെ തട്ടികൊണ്ടുപോയി പണം കവര്‍ച്ച ചെയ്ത കേസില്‍ പ്രതികളെ 12 വര്‍ഷം കഠിന തടവിനും 50,000 രൂപ വീതം പിഴയൊടുക്കാനും കോടതി ശിക്ഷ വിധിച്ചു. കേസിലെ പ്രതികളായ താന്ന്യം അയ്യാണ്ടി വീട്ടില്‍ കായ്കുരു എന്ന രാഗേഷ്, നാട്ടിക എസ്.എന്‍. കോളേജിന് സമീപം ആറുകെട്ടി വീട്ടില്‍ ഷൈജു, നാട്ടിക കൊടുപ്പുള്ളി വീട്ടില്‍ അരുണ്‍, കാട്ടൂര്‍ പര്‍ളിക്കാട്ടില്‍ വീട്ടില്‍ ബൂട്ടിയ ബൈജു എന്ന ബൈജു എന്നി നാല് പ്രതികളെയാണ് 12 വര്‍ഷത്തെ തടവിനും 50,000 രൂപ വീതം പിഴയൊടുക്കാനും ഇരിങ്ങാലക്കുട അഡിഷണല്‍ സെഷന്‍സ് കോടതി ശിക്ഷ വിധിച്ചത്. 2010 മെയ് മൂന്നിനാണ് കേസിനാസ്പദമായ സംഭവം നടന്നത്. കോഴിക്കോട്ടുകാരനായ പരാതിക്കാരനെ പണയ സ്വര്‍ണ്ണം എടുത്തുകൊടുക്കാനുണ്ടെന്ന് പറഞ്ഞ് വിളിച്ചുവരുത്തിയശേഷം വെള്ളാനിയില്‍ വെച്ച് പ്രതികള്‍ സ്‌കോര്‍പ്പിയോയില്‍ ബലമായി തട്ടികൊണ്ടുപോകുകയായിരുന്നു. തുടര്‍ന്ന് കത്തികാണിച്ചും ഭീഷണിപ്പെടുത്തിയും ദേഹോപദ്രവമേല്‍പ്പിച്ചും ഇയാളുടെ കൈവശമുണ്ടായിരുന്ന എ.ടി.എം. കാര്‍ഡും 35,000 രൂപയും ബലമായി പിടിച്ചെടുക്കുകയും പിന്‍നമ്പര്‍ വാങ്ങി ചാലക്കുടി എസ്.ബി.ടി. എ.ടി.എമ്മില്‍ നിന്നും അഞ്ചുതവണകളായി 50,000 രൂപ പിന്‍വലിച്ചെടുത്തും കവര്‍ച്ച ചെയ്യുകയുമായിരുന്നു. കാട്ടൂര്‍ പോലിസ് റജിസ്റ്റര്‍ ചെയ്ത കേസ് ഇരിങ്ങാലക്കുട പോലിസ് സി.ഐ.യായിരുന്ന സോണി ഉമ്മന്‍ കോശി, ടി.എസ്. സിനോജ് എന്നിവരുടെ നേതൃത്വത്തിലാണ് അന്വേഷണം നടത്തി കുറ്റപത്രം സമര്‍പ്പിച്ചത്. കേസില്‍ 21 സാക്ഷികളെ വിസ്തരിക്കുകയും 30 രേഖകള്‍ ഹാജരാക്കുകയും ചെയ്തു.

പുല്ലൂര്‍ : പുല്ലൂര്‍ ചേര്‍പ്പ്കുന്ന് സ്വദേശി കൂടത്തറ വീട്ടില്‍ പ്രഭാകരന്‍ (72) നെയാണ് വീട്ടില്‍ നിന്നും ബദ്ധുക്കള്‍ മര്‍ദ്ധിച്ച് ഇറക്കിവിട്ടതായി പറയുന്നത്.ശനിയാഴ്ച്ച പുല്ലുര്‍ ആശുപത്രി പരിസരത്ത് അവശനിലയില്‍ കണ്ട പ്രഭാകരനേ സമൂഹ്യപ്രവര്‍ത്തകനായ പിന്റോ ചിറ്റിലപ്പിള്ളിയാണ് ഇരിങ്ങാലക്കുട താലൂക്കാശുപത്രിയില്‍ എത്തിച്ചത്.ആശുപത്രിയില്‍ നിന്നും വിടുതല്‍ നല്‍കിയ പ്രഭകാരന്‍ പോകാന്‍ ഇടമില്ലാത്തതിനാല്‍ ആശുപത്രിയില്‍ തന്നേ കഴിയുകയാണ്.ഏറെ നാളായി മുബൈയില്‍ പാര്‍ളേ ബിസ്‌ക്കറ്റ് കമ്പനിയില്‍ താല്‍ക്കാലിക ജീവനക്കാരനായി പ്രവര്‍ത്തിച്ചിരുന്ന പ്രഭാകരന്‍ നാട്ടില്‍ തിരിച്ചെത്തിയിട്ട് അധികനാളുകളായിട്ടില്ല.വയോധികനായ തന്നേ സംരക്ഷിക്കുന്നതിന് ബുദ്ധിമുട്ടായതിനാലാണ് മകളുടെ ഭര്‍ത്താവ് തന്നേ മര്‍ദ്ധിച്ചതെന്ന് പ്രഭാകരന്‍ പറയുന്നു.മാനസിക തകരാറിലായ ഭാര്യയും ഈ വീട്ടില്‍ തന്നേയാണ് താമസം.മര്‍ദ്ധനത്തേ തുടര്‍ന്ന് വീട് വിട്ടിറങ്ങിയ പ്രഭാകരന്‍ പുല്ലൂര്‍ പരിസരത്ത് വിശന്ന് വലഞ്ഞ് നടക്കുന്നതിനിടെയാണ് നാട്ടുക്കാരുടെ ശ്രദ്ധയില്‍പെടുന്നത്.ആശുപത്രിയില്‍ എത്തിച്ച് പ്രഭാകരന്റെ ആശുപത്രി ചിലവുകളടക്കം എല്ലാം പിന്റോയുടെ നേതൃത്വത്തില്‍ നിറവേറ്റി ബദ്ധുക്കളെ വിവരമറിയിച്ചെങ്കില്ലും ഏറ്റെടുക്കാന്‍ ബദ്ധുക്കള്‍ ആരും എത്താത്ത സാഹചര്യത്തില്‍ ആശുപത്രി അധികൃതര്‍ വിവരം പോലിസില്‍ അറിയിക്കുകയായിരുന്നു.സാമൂഹ്യക്ഷേമ വകുപ്പിന് വിവരം നല്‍കാം എന്നാണ് പോലിസില്‍ നിന്നും മറുപടി ലഭിച്ചത്.

ഇരിങ്ങാലക്കുട :നാലമ്പല തീര്‍ത്ഥാടനത്താല്‍ പ്രസിദ്ധമായ പായമ്മല്‍ ശ്രീ ശത്രുഘ്നസ്വാമി ക്ഷേത്രത്തിലെ തിരുവുത്സവം ഫെബ്രുവരി 27 മുതല്‍ മാര്‍ച്ച് 4 വരെ ആഘോഷിക്കുന്നു. ഫെബ്രുവരി 27 ചൊവ്വാഴ്ച്ച രാത്രി 7:30ന് തന്ത്രി സതീശന്‍ നമ്പൂതിരിപ്പാട് കൊടിയേറ്റം നടത്തും തുടര്‍ന്ന് ഹരിശങ്കര സ്‌കൂള്‍ ഓഫ് മ്യൂസിക് ആന്‍ഡ് ഡാന്‍സ് അവതരിപ്പിക്കുന്ന നൃത്തനൃത്ത്യങ്ങള്‍. മാര്‍ച്ച് 2 തിരുവുത്സവദിനത്തില്‍ രാവിലെ 8 മണിക്ക് ശ്രീഭൂതബലിയും ആനകളോട് കൂടിയ കാഴ്ച്ച ശീവേലിയും കലാമണ്ഡലം ശിവദാസന്‍ ആന്‍ഡ് പാര്‍ട്ടിയുടെ മേളവും നടത്തുന്നു.വൈകീട്ട് 4ന് പ്രദീപ് ആറാട്ടുപുഴ അവതരിപ്പിക്കുന്ന ഓട്ടന്‍തുള്ളല്‍ രാത്രി 8 മണിക്ക് വിളക്കിന് എഴുന്നള്ളിപ്പും ദാസന്‍ തൊടൂര്‍ ആന്‍ഡ് പാര്‍ട്ടിയുടെ നാദസ്വരവും ഉണ്ടായിരിക്കും.മാര്‍ച്ച് 3 ശനിയാഴ്ച്ച പള്ളിവേട്ട വൈകീട്ട് നിറമാല ചുറ്റുവിളക്ക്. രാത്രി 8 മണിക്ക് ആനയോടുകൂടിയ പള്ളിവേട്ട എഴുന്നള്ളിപ്പ്. മാര്‍ച്ച് 4 ഞായറാഴ്ച്ച ആറാട്ട് തുടര്‍ന്ന് കൊടിക്കല്‍ പറ, കൊടിയിറക്കം, രാത്രി 8 മണിക്ക് കൊല്ലം ഭാരതമിത്ര അവതരിപ്പിക്കുന്ന ‘ബ്രഹ്മശ്രീ വിശ്വാമിത്രന്‍’ എന്ന ബാല ഉണ്ടായിരിക്കും. പത്രസമ്മേളനത്തില്‍ പായമ്മല്‍ ദേവസ്വം ഭരണ സമിതി അംഗം മനോജ് തുമ്പരത്തി, സുനില്‍ കുമാര്‍, പായമ്മല്‍ ക്ഷേത്ര സേവാസമിതി പ്രസിഡന്റ് സുലേഷ് അയോദ്ധ്യ, സെക്രട്ടറി വിനീത് കെ.യു, ഉത്സവാഘോഷ കമ്മിറ്റി കണ്‍വീനര്‍ ധില്ലന്‍ അണ്ടിക്കോട്ട് എന്നിവര്‍ സന്നിഹിതരായിരുന്നു.

ഇരിങ്ങാലക്കുട : കൂടല്‍മാണിക്യം ക്ഷേത്രം പ്രതിഷ്ഠാദിനത്തോടനുബന്ധിച്ച് കലശപൂജകള്‍ തിങ്കളാഴ്ച്ച രാവിലെ 5:30ന് ആരംഭിച്ചു . എതൃത്തപൂജ 6 മണിക്കും 9 മണിക്ക് കലശാഭിഷേകങ്ങളും നടന്നു.രാവിലെ 10 മണിക്ക് പെരുവനം പ്രകാശന്‍ മാരാര്‍ നയിക്കുന്ന പാഞ്ചാരിമേളവും ഉണ്ടായിരുന്നു. ഉച്ചപൂജക്കു ശേഷം അന്നദാനവും നടന്നു. വൈകീട്ട് 5.15ന് കുമാരി അഖില ആന്റ് പാര്‍ട്ടിയുടെ തായമ്പക. വൈകീട്ട് 6.15 മുതല്‍ സോപാനലാസ്യം മോഹിനിയാട്ടവും തുടര്‍ന്ന് അത്താഴപൂജയും. പ്രതിഷ്ഠാദിനത്തോടനുബന്ധിച്ച് ഭക്തജനങ്ങള്‍ക്ക് ബ്രഹ്മകലശം (നെയ്യ്), ബ്രഹ്മകലശം (തേന്‍), ബ്രഹ്മകലശം (പാല്‍), ബ്രഹ്മകലശം (തൈര്) തീര്‍ത്ഥകലശം, കുംഭകലശം, പഞ്ചഗവ്യം, നാല്‍പ്പാമരകഷായാഭിഷേകം, ദ്രവ്യകലശം അഭിഷേക വഴിപാടുകള്‍ എന്നിവ നടത്താവുന്നതാണ്

ഇരിങ്ങാലക്കുട : തിയേറ്റര്‍ ഒളിമ്പിക്‌സിലേക്ക് തെരഞ്ഞെടുക്കപ്പെട്ട 5 മലയാള നാടകങ്ങളിലൊന്നായ ‘ചക്ക,’ ഫെബ്രുവരി 27 ചൊവ്വാഴ്ച വൈകിട്ട് 7 മണിക്ക് മണ്ണാത്തിക്കുളം റോഡിലെ ‘വാള്‍ഡ’നില്‍ ഇന്നര്‍സ്‌പേസ് ലിറ്റില്‍ തിയേറ്ററിന്റെ ആഭിമുഖ്യത്തില്‍ അരങ്ങേറുന്നു. മാര്‍ച്ച് 3ന് ഡല്‍ഹി നാഷണല്‍ സ്‌കൂള്‍ ഓഫ് ഡ്രാമയിലെ തുറന്ന വേദിയിലെ അവതരണത്തിനു മുമ്പുള്ള ‘ചക്ക’യുടെ ആദ്യാവതരണമാണു ചൊവ്വാഴ്ച വൈകിട്ട്് ് ഇരിങ്ങാലക്കുടയില്‍ നടക്കുന്നത് . പാഞ്ഞാള്‍ സ്വദേശിയായ പ്രശസ്ത നാടകകൃത്ത് തുപ്പേട്ടന്‍ പതിറ്റാണ്ടുകള്‍ക്കു മുമ്പ് രചിച്ച ‘ചക്ക,’ 2002ലാണു തൃശൂര്‍ നാടകസംഘം ആദ്യമായവതരിപ്പിക്കുന്നത്. കേരള സംഗീതനാടക അക്കാദമിയുടെ ടൂറിങ്ങ് തിയേറ്റര്‍ പദ്ധതിയുടെ ഭാഗമായി തഞ്ചാവൂര്‍ സൗത്ത് സോണ്‍ കള്‍ച്ചറല്‍ സെന്ററിന്റെ ധനസഹായത്തോടെയായിരുന്നു അന്ന് ‘ചക്ക’ രൂപം കൊണ്ടത്. കോര്‍പ്പറേറ്റ് ശക്തികളും അധികാരകേന്ദ്രങ്ങളും ഒത്തൊരുമിച്ചു കൊണ്ട് മണ്ണിനെയും മനുഷ്യനെയും ചൂഷണം ചെയ്യുന്ന കഥ പറയുന്ന ‘ചക്ക’യുടെ പ്രമേയത്തിനു വര്‍ത്തമാനലോകത്തില്‍ പ്രസക്തിയേറി വരുന്ന സാഹചര്യത്തിലാണു നാടകം വീണ്ടും അരങ്ങുകളിലെത്തുന്നത്. ടൂറിങ്ങ് തിയേറ്റര്‍ പദ്ധതിയുടെ ഭാഗമായി കേരളത്തിലുടനീളം പര്യടനം നടത്തിയ ‘ചക്ക’ പിന്നീട് 2012-ല്‍ കൊച്ചിന്‍- മുസിരിസ് ബിനാലെയുടെ ഭാഗമായി രണ്ടാം വട്ടവും അരങ്ങിലെത്തുകയായിരുന്നു. അതിനു ശേഷം, അന്തര്‍ദ്ദേശീയ നാടകോത്സവവും, പബ്‌ളിക് റിലേഷന്‍ വകുപ്പിന്റെ ദേശീയ നാടകോത്സവവും സൂര്യ ഫെസ്റ്റിവലും അടക്കം ഒട്ടേറെ വേദികളില്‍ ‘ചക്ക’ അവതരിപ്പിക്കപ്പെട്ടു. രണ്ടു വര്‍ഷത്തെ ഇടവേളയ്ക്കു ശേഷം, എട്ടാമത് തിയേറ്റര്‍ ഒളിമ്പിക്‌സിലേക്ക് തെരഞ്ഞെടുക്കപ്പെട്ടതോടെ ‘ചക്ക’ വീണ്ടും അരങ്ങേറിത്തുടങ്ങുകയാണ്. നാഷണല്‍ സ്‌കൂള്‍ ഓഫ് ഡ്രാമയുടെ ആതിഥ്യത്തോടെ ഇക്കുറി ഇന്ത്യയിലെത്തുന്ന അന്തര്‍ദ്ദേശീയ നാടകോത്സവമായ തിയേറ്റര്‍ ഒളിമ്പിക്‌സ് ഫെബ്രുവരി 17 മുതല്‍ ഏപ്രില്‍ 8 വരെ നടന്നു കൊണ്ടിരിക്കുകയാണ്. ഇരുപതിലേറെ വര്‍ഷമായി തൃശൂര്‍ കേന്ദ്രീകരിച്ച് നാടകപ്രവര്‍ത്തനത്തിലേര്‍പ്പെട്ടു കൊണ്ടിരിക്കുന്ന നാടകപ്രവര്‍ത്തകരും ചിത്രകാരന്മാരും അടക്കം വിവിധ മാധ്യമങ്ങളില്‍ പ്രവര്‍ത്തിക്കുന്ന കലാകാരന്മാരുടെ കൂട്ടായ്മയില്‍ നിന്നാണു തൃശൂര്‍ നാടകസംഘം രൂപം കൊണ്ടത്. കെ.ബി. ഹരി, സി. ആര്‍. രാജന്‍, പ്രബലന്‍ വേലൂര്‍ എന്നിവരുടെ സംവിധാനത്തില്‍ ഒരുങ്ങിയ ‘ചക്ക’യില്‍ ഇവര്‍ക്കു പുറമേ ജോസ് പി. റാഫേല്‍, സുധി വട്ടപ്പിന്നി, പ്രതാപന്‍, മല്ലു പി. ശേഖര്‍ എന്നിവരാണ് അഭിനേതാക്കള്‍. സംഗീതമൊരുക്കിയിരിക്കുന്നത് സുഗതനും ചിത്രകാരനായ ഒ.സി. മാര്‍ട്ടിനും ചേര്‍ന്നാണ്. ചിത്രകാരനും സമകാലീന നാടകവേദിയിലെ ശ്രദ്ധേയനായ രംഗോപകരണഡിസൈനര്‍ ആന്റോ ജോര്‍ജാണു രംഗോപകരണങ്ങള്‍ തയ്യാറാക്കിയിരിക്കുന്നത്. പ്രകാശവിന്യാസം നിര്‍വ്വഹിക്കുന്നത് ഡെന്നി. ‘ചക്ക’യ്ക്ക് അരങ്ങൊരുക്കാന്‍ താല്പര്യമുള്ളവര്‍ 9846466970 / 9847049393 എന്നീ നമ്പറുകളില്‍ ബന്ധപ്പെടണമെന്ന് തൃശൂര്‍ നാടക സംഘം പ്രവര്‍ത്തകര്‍ അറിയിച്ചു.

ഇരിങ്ങാലക്കുട : (ISRO) മുന്‍ ചെയര്‍മാന്‍ പദ്മഭൂഷണ്‍ ഡോ .കെ രാധാകൃഷ്ണന്‍ കൂടല്‍മാണിക്യം ക്ഷേത്ര ദര്‍ശനം നടത്തി. കൂടല്‍മാണിക്യം ക്ഷേത്രത്തിലെ തിരുവുത്സവത്തിന്റെ ഭാഗമായുള്ള സംഭാവനകളും വഴിപാടുകളും സ്വീകരിച്ചു തുടങ്ങിയത്തില്‍ ആദ്യ സംഭാവന ഡോ .കെ രാധാകൃഷ്ണന്നില്‍ നിന്ന് ഒരു ലക്ഷത്തി ഇരുപത്തയ്യായിരം രൂപ സ്വീകരിച്ചു കൊണ്ടായിരുന്നു കഴിഞ്ഞ മാസം മുതല്‍ ആരംഭിച്ചിരുന്നത്. അതിനു ശേഷം ആദ്യമായാണ് അദ്ദേഹം ഇപ്പോള്‍ ഇരിങ്ങാലക്കുടയിലെത്തുന്നത്.ദര്‍ശനത്തിനു ശേഷം കൂടല്‍മാണിക്യം ക്ഷേത്രനടയില്‍ ദേവസ്വം ചെയര്‍മാന്‍ യു. പ്രദീപ് മേനോനില്‍ നിന്നും ആദ്ദേഹം സംഭാവന രസീതി ഏറ്റുവാങ്ങി. മാനേജിങ് കമ്മിറ്റി അംഗം അഡ്വ. രാജേഷ് തമ്പാന്‍, ക്ഷേത്രം മാനേജര്‍ രാജി സുരേഷ് എന്നിവര്‍ സന്നിഹിതരായിരുന്നു. ഉത്സവ വഴിപാടുകള്‍ Koodalmanikyam Administrator, Account number : 151715500006167. IFSC : KVBL0001517. Bank: Karur Vaisya Bank Irinjalakuda Branch അയക്കേണ്ടതാണ് എന്ന് അഡ്മിനിസ്‌ട്രേറ്റര്‍ എ.എം സുമ അറിയിച്ചു. കൂടല്‍മാണിക്യം ക്ഷേത്രത്തിലെ ഈ വര്‍ഷത്തെ തിരുവുത്സവം 2018 ഏപ്രില്‍ 27 വെള്ളിയാഴ്ച (1193 മേടം 14 ) കൊടികയറി മെയ് 7 തിങ്കളാഴ്ച (1193 മേടം 24 ) ചാലക്കുടി കൂടപുഴ ആറാട്ടുകടവില്‍ ആറാട്ടോടു കൂടി സമാപിയ്ക്കും.

ഇരിങ്ങാലക്കുട : ആദരവും ആകാംക്ഷയും ഭക്തിയും ആരാധനയും ഭക്തിയും സ്‌നേഹവും സമന്വയിപ്പിച്ച ഒരു തീര്‍ഥയാത്രയാണ് സി.രാധാകൃഷ്ണന്റെ തീക്കടല്‍ കടഞ്ഞ് തിരുമധുരം എന്ന് പ്രശസ്ത പ്രഭാഷകനും എഴുത്തുകാരനുമായ ശ്രീ.ആലങ്കോട് ലീലാകൃഷ്ണന്‍ അഭിപ്രായപ്പെട്ടു. ദീര്‍ഘകാലം പൂരിപ്പിക്കാതെ കിടന്ന ഒരു മഹാസമസ്യയുടെ പൂരണം, അതിനായി ഒരു തപസ്വിയെപ്പോലെ നടത്തിയ ചരിത്രാന്വേഷണയാത്രകള്‍, അവസാനം അധമമായ മനുഷ്യകുലത്തിന്റെ മോക്ഷപ്രാപ്തിക്ക് അക്ഷരമല്ലാതെ വേറൊന്നുമില്ല എന്ന കണ്ടെത്തല്‍, എല്ലാം കൊണ്ടും ഈ കൃതി മലയാള നോവല്‍ ചരിത്രത്തിലെ ഒരു ഇതിഹാസം തന്നെയാണെന്ന് ശ്രീ.ആലങ്കോട് വ്യക്തമാക്കി.ഇരിങ്ങാലക്കുട എസ് എന്‍ പബ്ലിക് ലൈബ്രറി നടത്തിവരുന്ന നോവല്‍ സാഹിത്യയാത്രയില്‍ പത്തൊന്‍പതാമത് നോവല്‍ അവതരണം നടത്തുകയായിരുന്നു ശ്രീ.ആലങ്കോട് ലീലാകൃഷ്ണന്‍. വേദാന്തത്തിന്റെ ബീജം ആദിശൈവ പാരമ്പര്യമാണ് എന്നും അതിന്റെ വേരുകള്‍ തേടിയുള്ള ഒരു യാത്രയാണ് താന്‍ ചെയ്തതെന്നും നോവലിസ്റ്റ് ശ്രീ.സി.രാധാകൃഷ്ണന്‍ വ്യക്തമാക്കി. ഡോ.സി.കെ.രവി അദ്ധ്യക്ഷത വഹിച്ച ചടങ്ങില്‍ ശ്രീ.ബാലചന്ദ്രന്‍ വടക്കേടത്ത്, ശ്രീ.മുരളീധരന്‍, പി.കെ.ഭരതന്‍, കെ.ഹരി, ജോസ് മഞ്ഞില, എം.ആര്‍.സ്വയംപ്രഭ, കെ.മായ എന്നിവര്‍ സംസാരിച്ചു.

ഇരിങ്ങാലക്കുട : ഇരിങ്ങാലക്കുടക്കാര്‍ക്ക് ഇത് ഓര്‍മ്മയിലെ ഇറച്ചിക്കറി ഇല്ലാത്ത ഞായറാഴ്ച്ച.അറവ്ശാല പ്രവര്‍ത്തിക്കാത്ത നഗരത്തില്‍ അനധികൃത അറവ് നടത്തുന്ന മാംസ വില്‍പ്പന ഹൈകോടതി നിര്‍ത്തിയതോടെ ഇരിങ്ങാലക്കുടയിലെ മാംസ വ്യാപാരത്തിന് പൂട്ട് വീണിരുന്നു.ആട് ,പോത്ത്,പോര്‍ക്ക് എന്നിവയുടെ അറവ് മാംസം വില്‍ക്കുന്ന 20 ഓളം കടകളാണ് ഇരിങ്ങാലക്കുട മാര്‍ക്കറ്റില്‍ മാത്രം പൂട്ടി സീല്‍ ചെയ്തത്.15 പോര്‍ക്ക്,20 ആട്,15 ആട് എന്ന കണക്കില്‍ ഞായറാഴ്ച്ച ദിവസം 10 ലക്ഷം രൂപയുടെ കച്ചവടം നടന്നിരുന്ന ഇരിങ്ങാലക്കുട മാര്‍ക്കറ്റാണ് നിശ്ചലമായത് .80 ഓളം ജീവനക്കാരുടെ കുടുംബങ്ങള്‍ പട്ടിണിയിലേയ്ക്ക് നീങ്ങപ്പെട്ടു കഴിഞ്ഞു.ഇറച്ചി വില്‍പ്പന നിര്‍ത്തിയതിനേ തുടര്‍ന്ന് മീന്‍ മാര്‍ക്കറ്റില്‍ ഗണ്യമായ രീതിയില്‍ വിലവര്‍ദ്ധനയും സംഭവിക്കുന്നുണ്ട്.ഇരിങ്ങാലക്കുട നഗരസഭയില്‍ മാംസവ്യാപാരികള്‍ അപേക്ഷ സമര്‍പ്പിച്ചതിന്റെ അടിസ്ഥാനത്തില്‍ തൃശ്ശൂര്‍,ചാലക്കുടി,അങ്കമാലി തുടങ്ങിയ അംഗീകൃത അറവ്ശാലകള്‍ പ്രവര്‍ത്തിക്കുന്ന സ്ഥലങ്ങളിലെ മുന്‍സിപ്പല്‍ ഓഫിസുകളിലേയ്ക്ക് ഇരിങ്ങാലക്കുടയിലേയ്ക്കുള്ള അറവ് കൂടി നടത്തിതരണമെന്ന് കാണിച്ച് നഗരസഭാ അപേക്ഷ നല്‍കിയിട്ടുണ്ട്.പ്രസ്തുത സ്ഥലങ്ങളില്‍ അറവ് കൂടുതല്‍ നടത്തുമ്പോള്‍ വരുന്ന മാലിന്യം എന്ത് ചെയ്യണം എന്നതായിരുന്നു പ്രശ്‌നമായി നിന്നിരുന്നത്.ഇരിങ്ങാലക്കുടയിലെ വ്യാപാരികള്‍ അധികം വരുന്ന മാലിന്യം കൊച്ചിയിലെ മാലിന്യ സംസ്‌ക്കര പ്ലാന്റില്‍ എത്തിക്കാം എന്ന വ്യവസ്ഥയില്‍ അധികം താമസിയാതെ ഇരിങ്ങാലക്കുടയില്‍ അറവ് മാംസം വില്‍പ്പനയ്ക്ക് എത്തുമെന്ന് പ്രതിക്ഷിക്കാം.കോമ്പറയില്‍ പ്രവര്‍ത്തിച്ചിരുന്ന അറവ് ശാല നഗരസഭാ വൃത്തിയാക്കി നിര്‍മ്മാണ പ്രവര്‍ത്തനങ്ങള്‍ ആരംഭിക്കുന്നതിനുള്ള ശ്രമത്തിലാണ്.

Related News ഇരിങ്ങാലക്കുട നഗരത്തില്‍ മാംസവ്യാപരത്തിന് പൂട്ട് വീണു.