ഇരിങ്ങാലക്കുട: തരംഗം ആര്‍ട്സ് ആന്റ് സ്പോര്‍ട് ക്ലബ് ഇരിങ്ങാലക്കുട മിനി ബസ്റ്റാന്റില്‍ സംഘടിപ്പിച്ച ആദ്യ പ്രീ ക്വാട്ടര്‍ മത്സരം കാണുവാന്‍ വന്‍ തിരക്ക്. ഇരിങ്ങാലക്കുട മുന്‍സിപ്പല്‍ ചെയര്‍പേഴ്സണ്‍ നിമ്മ്യ ഷിജു ഫ്രാന്‍സും അര്‍ജന്റീനയുമായിട്ടുള്ള മത്സരം ഉദ്ഘാടനം നിര്‍വഹിച്ചു.മുന്‍സിപ്പല്‍ സ്റ്റാന്റിംഗ് കമ്മിറ്റി ചെയര്‍മാന്‍ അഡ്വ. വി.സി വര്‍ഗ്ഗീസ്, വാര്‍ഡ് കൗണ്‍സിലര്‍ ബിജു ലാസര്‍, ജോസ് മാമ്പുള്ളി എന്നിവര്‍ ആശംസകള്‍ അര്‍പ്പിച്ചു. റൊണാള്‍ഡോ തൊഴുത്തുംപറമ്പില്‍ സ്വാഗതവും, അക്ഷയ് റപ്പായി നന്ദിയും പറഞ്ഞു. നൂറുക്കണിക്കിന് ജനങ്ങള്‍ മത്സരം ആസ്വദിക്കുവാന്‍ എത്തിയിരുന്നു.

ഇരിങ്ങാലക്കുട : ഠാണ-കാട്ടൂര്‍ ബൈപ്പാസ്സ് റോഡിലെ സ്വകാര്യ വ്യക്തിയുടെ കെട്ടിട നിര്‍മാണം എല്‍. ഡി. എഫ്. അംഗങ്ങളുടെ രൂക്ഷ വിമര്‍ശനം, വിഷയം ചര്‍ച്ച ചെയ്യുവാന്‍ എല്‍. ഡി. ഫിന് താല്‍പര്യമില്ലെന്ന് യു. ഡി എഫ്. ശനിയാഴ്ച ചേര്‍ന്ന മുനിസിപ്പല്‍ കൗണ്‍സില്‍ യോഗത്തിന്റെ ആരംഭത്തില്‍ എല്‍. ഡി. എഫ്. അംഗം പി. വി. ശിവകുമാറാണ് വിഷയം ഉന്നയിച്ചത്. നഗരസഭയെ വെല്ലുവിളിച്ചു കൊണ്ടാണ് സ്വകാര്യ വ്യക്തി അവിടെ നിര്‍മാണ പ്രവര്‍ത്തനങ്ങള്‍ നടത്തുന്നതെന്ന് പി. വി. ശിവകുമാര്‍ കുറ്റപ്പെടുത്തി. ഹൈക്കോടതി നല്‍കിയ സ്‌റ്റേ ഒഴിവായ സാഹചര്യത്തില്‍ അടിയന്തിരമായി നിര്‍മാണ പ്രവര്‍ത്തനങ്ങള്‍ നിറുത്തി വപ്പിക്കണമെന്ന് ശിവകുമാര്‍ ആവശ്യപ്പെട്ടു. സ്വകാര്യ വ്യക്തിക്ക് എതിരെ നഗരസഭ നല്‍കിയ കേസ്സുകള്‍ പിന്‍വലിച്ചതായി എല്‍ .ഡി. എഫ്. അംഗം എം. സി. രമണന്‍ ആരോപിച്ചു. കഴിഞ്ഞ ദിവസം സ്വകാര്യ വ്യക്തിയുമായി നഗരസഭ നടത്തിയ ചര്‍ച്ചയുടെ വിശദാംശങ്ങള്‍ കൗണ്‍സില്‍ യോഗത്തില്‍ വക്കാതിരുന്നതിനെ എല്‍. ഡി. എഫ്. അംഗം. സി. സി. ഷിബിന്‍ കുറ്റപ്പെടുത്തി. നഗരസഭ ഭരണ നേത്യത്വം വിഷയം മറച്ചു വക്കാനാണ് ശ്രമിക്കുന്നതെന്ന് ആരോപിച്ച സി. സി. ഷിബിന്‍ നാല്‍പത്തിയൊന്നു കൗണ്‍സിലര്‍മാര്‍ക്കും അറിയാനുള്ള അവകാശമുണ്ടെന്ന് ചൂണ്ടിക്കാട്ടി. നിയമോപദേശത്തിന്റെ അടിസ്ഥാനത്തില്‍ അക്വയര്‍ നടപടികള്‍ ആരംഭിച്ച നഗരസഭ ഒത്തുതീര്‍പ്പു ചര്‍ച്ച നടത്തുന്നതിനെ എല്‍. ഡി. എഫ്. അംഗം പി. വി. ശിവകുമാര്‍ വിമര്‍ശിച്ചു. അതേ സമയം സ്വകാര്യ വ്യക്തിയുമായുള്ള ചര്‍ച്ചക്ക് മുന്‍പ് രാഷ്ട്രീയകക്ഷി പ്രതിനിധികളുടെ യോഗം വിളിച്ചു ചേര്‍ത്തിരുന്നുവെന്ന് വികസനകാര്യ സ്റ്റാന്‍ഡിങ്ങ് കമ്മറ്റി ചെയര്‍മാന്‍ അഡ്വ വി. സി. വര്‍ഗീസ് ചൂണ്ടിക്കാട്ടി. നഗരസഭ നല്‍കിയ കേസ്സുകല്‍ പിന്‍വലിച്ചിട്ടില്ലെന്ന് ചൂണ്ടിക്കാട്ടിയ വി. സി. വര്‍ഗീസ് എല്‍. ഡി. എഫ്. ന് ഇക്കാര്യം ചര്‍ച്ച ചെയ്യാന്‍ താല്‍പര്യമില്ലെന്ന് വിമര്‍ശിച്ചു. ഇതിനെ പ്രതിരോധിക്കാന്‍ എല്‍. ഡി. എഫ് അംഗങ്ങള്‍ എത്തിയതോടെ, യു. ഡി. എഫ്- എല്‍. ഡി. എഫ്. അംഗങ്ങല്‍ തമ്മില്‍ ഏറെ നേരം വാഗ്വാദം തുടര്‍ന്നു. സ്വാകാര്യ വ്യക്തിയുമായി നടത്തിയ ചര്‍ച്ചയില്‍ നാലര മീറ്റര്‍ സ്ഥലം വിട്ടുതരണമെന്ന് തന്നെയാണ് നഗരസഭ നിലപാടെടുത്തത്. അതംഗീകരിക്കാന്‍ സ്വകാര്യ വ്യക്തി തയ്യാറാവാത്ത സാഹര്യത്തിലാണ് നിര്‍മാണ പ്രവര്‍ത്തനങ്ങള്‍ ആരംഭിച്ചിട്ടുള്ളത്. നിര്‍മാണ പ്രവര്‍ത്തനങ്ങള്‍ നിറുത്തി വക്കാന്‍ ആവശ്യപ്പെട്ട്് നഗരസഭ നോട്ടീസ് നല്‍കിയതായും, നിര്‍മാണ പ്രവര്‍ത്തനങ്ങള്‍ നിറുത്തി വക്കണമെന്നാവശ്യപ്പെട്ട് കത്ത് നല്‍കിയിട്ടും പോലീസ് സഹായം ലഭിച്ചിട്ടില്ലെന്നും വി. സി. വര്‍ഗീസ് പറഞ്ഞു. നഗരസഭ മുന്‍പ് നല്‍കിയ നോട്ടീസുകളില്‍ അപാകതകള്‍ ചൂണ്ടിക്കാട്ടിയതിനാലാണ് നിയമോപദേശത്തിന്റെ അടിസ്ഥാനത്തില്‍ നോട്ടീസ് പിന്‍വലിച്ച്് പുതിയ നോട്ടീസ് നല്‍കിയതെന്നും വി. സി. വര്‍ഗീസ് പറഞ്ഞു. ഈ കേസ്സുമായി ബന്ധപ്പെട്ട് ഹൈക്കോടതി ഉത്തരവുകള്‍ കൗണ്‍ില്‍ യോഗത്തില്‍ വായിക്കണമെന്ന് ബി. ജെ. പി. അംഗം ആവശ്യപ്പെട്ടതനുസരിച്ച് ഉദ്യോഗസ്ഥര്‍ ഹൈക്കോടതി ഉത്തരവ് കൗണ്‍സില്‍ യോഗത്തില്‍ വായിച്ചു. നഗരസഭ ഈ വിഷയത്തില്‍ തോറ്റിരിക്കുകയാണന്നും, അഭിഭാഷകരെ മാറ്റി വേണം തുടര്‍ നിയമ നടപടികള്‍ സ്വീകരിക്കാനെന്നും സന്തോഷ് ബോബന്‍ ആവശ്യപ്പെട്ടു. റോഡിന്റെ വീതി പതിനാറു മീറ്ററായി ഉയര്‍ത്താനുള്ള നടപടികള്‍ സ്വീകരിക്കണമെന്നും ഭൂമി ഏറ്റെടുക്കുന്നതിന് അക്വയര്‍ നടപടികള്‍ വേഗത്തിലാക്കണമെന്നും സന്തോഷ് ബോബന്‍ ആവശ്യപ്പെട്ടു. നഗരസഭക്ക് വിഴ്ച സംഭവിച്ചിട്ടില്ലെന്നും അക്വയര്‍ ചെയ്തു ഭൂമി ഏറ്റെടുക്കണമെന്നാവശ്യപ്പെടുന്നവര്‍ സ്വകാര്യ വ്യക്തിയുടെ താല്‍പര്യമാണ് സംരക്ഷിക്കുന്നതെന്നും അഡ്വ വി. സി. വര്‍ഗീസ് ആരോപിച്ചു. തുടര്‍ന്ന് കൗണ്‍സില്‍ യോഗത്തിനു ശേഷം നിര്‍മാണ പ്രവര്‍ത്തനങ്ങള്‍ നിറുത്തി വക്കുന്നതിന് പോലീസുമായി സംസാരിക്കുമെന്ന് ചെയര്‍പേഴ്‌സണ്‍ നിമ്യ ഷിജു അറിയിച്ചു. കല്ലേരി തോടിലെ മാലിന്യങ്ങള്‍ നീക്കം ചെയ്യുന്നതിനും തോട് അളന്നു തിട്ടപ്പെടുത്തി അനതിക്യത നിര്‍മാണങ്ങള്‍ പൊളിച്ചു നീക്കാനും നടപടി സ്വീകരിക്കണമെന്ന് എല്‍. ഡി. എഫ്. അംഗം പി. വി. ശിവകുമാര്‍ ആവശ്യപ്പെട്ടു. ബൈപ്പാസ്സ് റോഡിലെ പ്രമുഖ സ്ഥാപനങ്ങളടക്കം തോട് കയ്യേറിയാണ് ചുറ്റുമതില്‍ നിര്‍മ്മിച്ചിട്ടുള്ളതെന്ന് പി. വി. ശിവകുമാര്‍ ആരോപിച്ചു. തോട്ടിലെ മാലിന്യങ്ങള്‍ നീക്കം ചെയ്യുന്നത് ആരംഭിച്ചതായും ഇപ്പോള്‍ നീരൊുക്കുള്ളതായും ചൂണ്ടിക്കാട്ടിയ യു. ഡി. എഫ്. അംഗം സുജ സജ്ജീവ്കുമാര്‍ തോട്ടിലെ കയ്യേറ്റങ്ങള്‍ ഒഴിവാക്കുന്നതിനുള്ള നടപടി വേണമെന്ന് ആവശ്യപ്പെട്ടു. നഗരസഭാതിര്‍ത്തിയിലെ മുഴുവന്‍ തോടുകളും അളന്ന് തിട്ടപ്പെടുത്തി കയ്യേറ്റങ്ങള്‍ ഒഴിവാക്കണമെന്ന് കൗണ്‍സിലില്‍ പൊതു വികാരം ഉയര്‍ന്നു. നഗരസഭ ബസ്സ് സ്റ്റാന്‍ഡ് പരിസരത്തെ സ്വാകാര്യ വ്യക്തിയുടെ അപകടാവസ്ഥയിലായ കെട്ടിടം അടിയന്തിരമായി പൊളിച്ചു നീക്കാന്‍ നടപടി വേണമെന്ന് എല്‍. എല്‍. ഡി. എഫ്. അംഗം പി. വി. ശിവകുമാര്‍ ആവശ്യപ്പെട്ടു. ജനങ്ങളുടെ ജീവന് ഭീഷണിയായാണ് കെട്ടിടം നിലനില്‍ക്കുന്നതെന്ന് ശിവകുമാര്‍ പറഞ്ഞു. എന്നാല്‍ കെട്ടിട ഉടമയും വാടകക്കാരും തമ്മിലുള്ള കേസ്സ് നിലവിലുള്ളതിനാലാണ് നഗരസഭക്ക് നടപടി സ്വാകരിക്കാന്‍ കഴിയാത്തത്. കെട്ടിടം ദുര്‍ബലപ്പെടുത്തുന്നതിന് കെട്ടിട ഉടമ തന്നെ ശ്രമിക്കുകയാണന്ന് വികസനകാര്യ സ്റ്റാന്‍ഡിങ്ങ് കമ്മറ്റി ചെയര്‍മാന്‍ അഡ്വ വി. സി. വര്‍ഗീസ് പറഞ്ഞു. മൂന്നു മണിക്ക് ആരംഭിച്ച കൗണ്‍സില്‍ യോഗം അജണ്ടക്കു പുറത്തുള്ള വിഷയങ്ങള്‍ കഴിഞ്ഞ് അജണ്ടയിലേക്ക് കടന്നത് ഒന്നര മണിക്കൂറിന ശേഷമായിരുന്നു. പതിനാറ് അജണ്ടകള്‍ ചര്‍ച്ച ചെയ്യുന്നതിന് വിളിച്ചു ചേര്‍ത്ത കൗണ്‍സില്‍ യോഗം നാലു അജണ്ടകള്‍ മാത്രം ചര്‍ച്ചക്കെടുത്ത് തിങ്കളാഴ്ച വീണ്ടും ചേരുന്നതിന് തീരുമാനിക്കുകയായിരുന്നു. .

ഇരിങ്ങാലക്കുട :ഇരിങ്ങാലക്കുടയിലേയും സമീപ പഞ്ചായത്തുകളിലേയും സ്‌കൂളുകളില്‍ എസ് എസ് എല്‍ സി ക്കും പ്ലസ് ടു വിനും ഫുള്‍ എ പ്ലസ് നേടിയ വിദ്യാര്‍ത്ഥി വിദ്യാര്‍ത്ഥിനികളെ ആദരിച്ചു.ജ്വല്ലറിയുടെ കോണ്‍ഫ്രസ് ഹാളില്‍ നടന്ന ചടങ്ങില്‍ മുഖ്യാതിഥി ഇന്ത്യന്‍ സിവില്‍ സര്‍വ്വീസ് പരീക്ഷയില്‍ റാങ്ക് ലഭിച്ച ഹരി കല്ലിക്കാട്ടായിരുന്നു.സാമൂഹ്യ പ്രവര്‍ത്തകയായ സി റോസ് ആന്റോ മുഖ്യ പ്രഭാഷണം നടത്തുകയും അഡ്വ രമേഷ് കൂട്ടാല ആശംസകള്‍ അര്‍പ്പിക്കുകയും ചെയ്തു.ജൂലൈ 1-ാം തിയ്യതി നടക്കുന്ന ചടങ്ങില്‍ ഇരിങ്ങാലക്കുട അഡീഷണല്‍ ഡിസ്ട്രിക്റ്റ് ആന്റ് സെഷന്‍സ് ജഡ്ജ് ഗോപകുമാര്‍ ജി മുഖ്യാതിഥിയായിരിക്കും .പ്രശസ്ത കാര്‍ട്ടൂണിസ്റ്റ് എം മോഹന്‍ദാസ് മുഖ്യ പ്രഭാഷകനായിരിക്കും.അഡ്വ സജി റാഫേല്‍ ആശംസകള്‍ അര്‍പ്പിക്കും .ചുങ്കത്ത് ഗ്രൂപ്പ് ചെയര്‍മാന്‍ സി പി പോള്‍ യോഗത്തില്‍ സ്വാഗതം ആശംസിക്കുകയും മാനേജര്‍ ഡേവീസ് ആന്റണി നന്ദി പ്രകാശിപ്പിക്കും

ഇരിങ്ങാലക്കുട :ഠാണ – ചന്തകുന്ന് റോഡ് വികസനം യാഥാര്‍ത്ഥ്യമാകാത്തതും ബൈപ്പാസ് റോഡ് യാഥാര്‍ത്ഥ്യമാക്കിയിട്ടും വേണ്ടത്ര ഗതാഗത പരിഷ്‌ക്കരണം നഗരത്തില്‍ നടത്താത്തതിനെ തുടര്‍ന്നും ഇരിങ്ങാലക്കുടയില്‍ എത്തുന്ന വാഹനയാത്രക്കാര്‍ ഗതാഗത കുരുക്കിലാക്കുന്നു.കിലോമീറ്ററുകള്‍ നീളുന്ന ഗതാഗത കുരുക്ക് ഠാണ-ചന്തകുന്ന് റോഡിലെ സ്ഥിരം കാഴ്ച്ചയായി മറി.സിഗ്നല്‍ സംവിധാനം പ്രവര്‍ത്തിക്കാത്തതും പാലിയോക്കര ടോള്‍ ഒഴിവാക്കുവാന്‍ ഇരിങ്ങാലക്കുട വഴി വരുന്ന വലിയ കണ്ടെയ്‌നര്‍ വാഹനങ്ങളും കുരുക്ക് വര്‍ദ്ധിപ്പിക്കുന്നതിനുള്ള കാരണങ്ങളാകുന്നു.വര്‍ഷങ്ങള്‍ക്ക് മുന്‍പേ പദ്ധതി തയ്യാറാക്കിയ ഠാണ – ചന്തകുന്ന് റോഡ് വികസനത്തിന് കീറാമുട്ടിയായി നില്‍ക്കുന്നത് പ്രധാനമായും ഒഴിപ്പിക്കേണ്ട സമീപത്തെ കടകളാണ്.89 കടകളും ഒരു വീടും വികസനത്തിനായി ഒഴിപ്പിക്കേണ്ടതുണ്ട്.എന്നാല്‍ വ്യാപാരികളുമായി സമവ്യായത്തിലെത്താന്‍ മാറിവന്ന സര്‍ക്കാരുകള്‍ക്കൊന്നും കഴിഞ്ഞില്ല.17 മീറ്ററിലാണ് ആദ്യകാലത്ത് പദ്ധതി വിഭാവനം ചെയ്തിരുന്നതെങ്കില്ലും പാതിവഴിയില്‍ ഇപ്പോഴത്തെ എം എല്‍ എ പ്രൊഫ. കെ യു അരുണന്‍ 14 മീറ്ററില്‍ വികസനം നടപ്പിലാക്കുവാന്‍ ശ്രമം നടത്തിയെങ്കില്ലും വിമര്‍ശനങ്ങളെ തുടര്‍ന്ന് ആ ശ്രമം ഉപേക്ഷിച്ച് വികസനം വരുന്നുണ്ടെങ്കില്‍ 17 മീറ്ററില്‍ തന്നെ കൊണ്ടുവരുവാന്‍ തീരുമാനിക്കുകയായിരുന്നു. എട്ട് കോടി രൂപ പദ്ധതിയ്ക്കായി സര്‍ക്കാര്‍ വകയിരുത്തിയിട്ടുണ്ടെങ്കില്ലും റോഡ് വികസനം പൂര്‍ത്തികരിക്കുവാന്‍ ഈ പണം അപര്യാപ്ത്മാണെന്നും എട്ട് കോടി രൂപ കൂടി വേണമെന്നാണ് പൊതുമരാമത്തിന്റെ വിലയിരുത്തല്‍.

ഇരിങ്ങാലക്കുട :സിവില്‍ സ്റ്റേഷനിലെ പുതിയ റവന്യു കെട്ടിടത്തിന്റെ മുന്‍വശത്ത് ഇരിങ്ങാലക്കുട ലയണ്‍സ് ക്ലബിന്റെ ആഭിമുഖ്യത്തില്‍ കോണ്‍ക്രീറ്റ് ചാരുബഞ്ചുകള്‍ സ്ഥാപിച്ചു.മുകുന്ദപുരം തഹസില്‍ദാര്‍ മധുസൂധനന്‍ ഉദ്ഘാടനം നിര്‍വ്വഹിച്ചു.ചടങ്ങില്‍ ലയണ്‍സ് ക്ലബ് ഡിസ്ട്രിക്റ്റ് കേബിനറ്റ് സെക്രട്ടറി എല്‍ എന്‍ അഡ്വ എം സി എംസന്‍ സ്വാഗതം പറഞ്ഞു.കേബിനറ്റ് സെക്രട്ടറിമാരായ LN തോമസ് കാളിയങ്കര ,LN കെ എന്‍ സുഭാഷ് ,CO ജെ ടോണി മറ്റു ഭാരവാഹികളും പങ്കെടുത്തു.ലയണ്‍സ് ക്ലബ് പ്രസിഡന്റ് ജോര്‍ജ്ജ് ചീരന്‍ അദ്ധ്യക്ഷത വഹിച്ചു.ലയണ്‍സ് ക്ലബ് പ്രസിഡന്റ് അനിത ജോര്‍ജ്ജ് നന്ദി രേഖപ്പെടുത്തി

ഇരിങ്ങാലക്കുട : ബസ് സ്റ്റാന്റിന് സമീപത്തായി ടൗണ്‍ഹാളിലേയ്ക്ക് പോകുന്ന വഴിയിലുള്ള പഴയ കെട്ടിടത്തിന്റെ ഒരു ഭാഗം ഇടിഞ്ഞ് വീണു.വര്‍ഷങ്ങള്‍ പഴക്കമുള്ള കെട്ടിടം ദുരന്ത ഭീഷണിയായാണ് നില്‍ക്കുന്നത്.കെട്ടിടത്തിന്റെ മേല്‍ക്കൂര തകര്‍ന്നിട്ട് വര്‍ഷങ്ങളായി മഴ കൊണ്ട് പഴകിയ കെട്ടിടത്തില്‍ നിന്നാണ് ഒരു ഭാഗം തകര്‍ന്ന് വീണത്.ഈ കെട്ടിടത്തില്‍ ഇപ്പോഴും കച്ചവട സ്ഥാപനങ്ങള്‍ പ്രവര്‍ത്തിക്കുന്നുണ്ട്. കെട്ടിടത്തിന്റെ വശം തകര്‍ന്ന് വീണതറിഞ്ഞ് സ്ഥലം സന്ദര്‍ശിച്ച ഇടത്പക്ഷ കൗണ്‍സിലര്‍മാര്‍ കെട്ടിടം പൊളിച്ച് നീക്കണമെന്നാവശ്യപ്പെട്ടു.സമീപത്തായുള്ള പുല്ലോക്കാരന്‍ ബില്ലിംഡിങ്ങ് അനധികൃതമായി നടപാത കൈയേറി ചങ്ങല കെട്ടിയിരിക്കുന്നതും ഒഴിവാക്കണമെന്ന് കൗണ്‍സിലര്‍മാര്‍ ആവശ്യപ്പെട്ടു.

ഇരിങ്ങാലക്കുട-സെന്റ് ജോസഫ്‌സ് കോളേജില്‍ എന്‍ എസ് എസ് യൂണിറ്റുകളുടെ ആഭിമുഖ്യത്തില്‍ കരിയര്‍ ഗൈഡന്‍സ് ക്ലാസ് സംഘടിപ്പിച്ചു.ഇന്ത്യന്‍ ആര്‍മിയില്‍ നിന്നും വിരമിച്ച മേജര്‍ ജോസഫ് ക്ലാസ്സുകള്‍ക്ക് നേതൃത്വം നല്‍കി.വിവിധ സേനകളില്‍ പെണ്‍കുട്ടികള്‍ക്കുള്ള തൊഴിലവസരങ്ങളെക്കുറിച്ച് അദ്ദേഹം പ്രതിവാദിച്ചു.വിവിധ വിഷയങ്ങള്‍ ഐഛികമായെടുത്തിട്ടുള്ള നൂറിലധികം കുട്ടികള്‍ ക്യാമ്പില്‍ പങ്കെടുത്തു.എന്‍ എസ് എസ് പ്രോഗ്രാം ഓഫീസര്‍മാരായ ബീന സി എ ,ഡോ ബിനു ടി വി എന്നിവര്‍ ക്യാമ്പിനു നേതൃത്വം നല്‍കി