മാപ്രാണം : തളിയക്കോണം എസ്.എന്‍.ഡി.പി കിണറിനു സമീപം റോഡരികില്‍ ബോംബ് ഉപേക്ഷിക്കപ്പെട്ട നിലയില്‍ നാട്ടുക്കാര്‍ കണ്ടെത്തി.ശനിയാഴ്ച്ച രാവിലെ കൗണ്‍സിലര്‍ സി സി ഷിബിന്റെ വിടിന്റെ മതിലിന് സമീപം നാടന്‍ ബോംബിന്റെ സാദൃശ്യത്തില്‍ ഉള്ള വസ്തു വഴിയാത്രക്കാരന്‍ കണ്ടതിനെ തുടര്‍ന്ന് കൗണ്‍സിലറെ വിളിച്ചറിയിക്കുകയായിരുന്നു.തുടര്‍ന്ന് പോലിസിനെ വിവിരമറിയിച്ചതിനെ തുടര്‍ന്ന് ഇന്‍സ്പെക്ടര്‍ ഓഫ് പോലീസ് എം കെ സുരേഷ് കുമാറിന്റെയും എസ് ഐ കെ.എസ്. സുശാന്തിന്റെയും നേതൃത്വത്തില്‍ പോലീസും ബോംബ് സ്‌ക്വാഡും സ്ഥലത്തെത്തി നാടന്‍ ബോംബ് നിര്‍വീര്യമാക്കി.കഴിഞ്ഞ ദിവസങ്ങളിലാണ് സമീപത്തേ കല്ലട വേലാഘോഷത്തിനിടെ നാടന്‍ ബോംബുമായി 4 പേരെ ഇരിങ്ങാലക്കുട പോലീസ് അറസ്റ്റ് ചെയ്തത്.അന്ന് പിടികൂടിയ തരത്തിലുള്ള ബോംബ് തന്നെയാണിവിടെ നിന്നും ലഭിച്ചതെന്ന് പോലീസ് പറഞ്ഞു.എ.എസ്.ഐ. മാരായ ബിജു പൗലോസ്, സുനില്‍, സി. സി പി.ഒ. മുരുഗേഷ് എന്നിവര്‍ പോലീസ് സംഘത്തില്‍ ഉണ്ടായിരുന്നു.നഗരസഭാ കൗണ്‍സിലറെ ബോംബുമായി ആക്രമിക്കാന്‍ ശ്രമിച്ചവരെ പിടികൂടണമെന്നാവശ്യപ്പെട്ട് ഡി.വൈ.എഫ്..ഐ.യുടെ നേതൃത്വത്തില്‍ തളിയകോണത്ത് പ്രതിഷേധ പ്രകടനം നടത്തി.പ്രദേശത്ത് സ്ഥിരമായി ഇത്തരം സംഭവങ്ങള്‍ നടക്കുന്നത് ജനങ്ങളില്‍ പരിഭ്രാന്തി സൃഷ്ടിച്ചിട്ടുണ്ട്.

ഇരിങ്ങാലക്കുട: റീപ്പബ്ലിക്ക് ദിനത്തോട് അനുബദ്ധിച്ച് പ്രഖ്യാപിച്ച രാഷ്ട്രപതിയുടെ ജീവന്‍ രക്ഷാ പതക് ബഹുമതിയ്ക്ക് ഇരിങ്ങാലക്കുട മാപ്രാണം മാടായികോണം സ്വദേശി തൊമ്മാന വീട്ടില്‍ ചാക്കോയുടെ മകന്‍ അബീന്‍ അര്‍ഹനായി. 2016 ഏപ്രിലില്‍ അതിരപ്പിള്ളി തുമ്പൂര്‍മൊഴിയില്‍ ചുഴിയില്‍ പ്പെട്ട രണ്ട് വിദ്യാര്‍ത്ഥികളെ രക്ഷപെടുത്തിയതിനാണ് അബിന് രാഷ്ട്രപതിയുടെ പുരസ്‌കാരത്തിന് അര്‍ഹനാക്കിയത്.വീനോന്ദ യാത്രയ്ക്ക് എത്തിയ രണ്ട് പത്താം ക്ലാസ് വിദ്യാര്‍ത്ഥികളാണ് ചുഴിയിലകപ്പെട്ടത് കൂട്ടുകാരുടെ നിലവിളി കേട്ട് ഓടിയെത്തിയ അബിന്‍ പാറകള്‍ നിറഞ്ഞ വെള്ളത്തിലേയ്ക്ക് എടുത്ത് ചാടി രണ്ട് പേരെയും രക്ഷിക്കുകയായിരുന്നു. നീന്തല്‍ അറിയാതിരുന്നിട്ടും കുട്ടികളെ രക്ഷിയ്ക്കാന്‍ മറ്റൊരാള്‍ കൂടി വെള്ളത്തിലേയ്ക്ക് ചാടിയിരുന്നു. അദ്ദേഹത്തേയും അബീനാണ് അന്ന് രക്ഷിച്ചത്. ഇപ്പോള്‍ വിദ്യാര്‍ത്ഥികള്‍ക്ക് നീന്തല്‍ പരിശീലനം നല്‍കുന്നതാണ് അബിന്റെ ഹോബി.പ്ലസ് ടു പഠനത്തിനു  ശേഷം സിനിമാഭിനയ മേഖലയിലാണ് അബിന്‍. അമ്മ ഷോളി, സഹോദരി സിബി.

• ഇരിങ്ങാലക്കുട:മുഖ്യമന്ത്രിയുടെ പോലിസ് മെഡൽ നേടിയ ജനിൻ ആന്റോ [ ആളൂർ പോലിസ് സ്റ്റേഷൻ), കെ. എo. മുഹമ്മദ്‌ അഷറഫ് ( അഴീക്കോട് കോസ്റ്റൽ പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസറുo, ഇരിങ്ങാലക്കുട DYSP യുടെ കീഴിലുള്ള ഷാഡോ പോലീസ് സംഘവുമാണ്. ഈ വർഷത്തെ ഡി.ജി.പി യുടെ ബാഡ്ജ് ഓഫ് ഓണർ പുരസ്കാരവും ലഭിച്ചിട്ടുണ്ട് .

ഇരിങ്ങാലക്കുടയിലും പരിസര ഗ്രാമപഞ്ചായത്തുകളിലും നടന്ന കുടുംബശ്രീ സി ഡി എസ് ചെയര്‍പേഴ്‌സണ്‍ തിരഞ്ഞെടുപ്പില്‍ വിജയികളായവര്‍

ഇരിങ്ങാലക്കുട: നെഞ്ചുവേദനയെ തുടര്‍ന്ന് വിദഗ്ദ്ധ ചികിത്സയ്ക്കായി ഇരിങ്ങാലക്കുട താലൂക്കാശുപത്രിയില്‍ നിന്നും തൃശ്ശൂര്‍ മെഡിക്കല്‍ കോളേജിലേയ്ക്ക് കൊണ്ടുപോയ ഇതര സംസ്ഥാന തൊഴിലാളി മരിച്ചു. ബംഫാല്‍മാല്‍ പഹാരിയ (22) എന്നാണ് പേര്‍ നല്‍കിയിരിക്കുന്നത്. എന്നാല്‍ മറ്റ് വിശദവിവരങ്ങളൊന്നും അറിയില്ല. ഇതുവരേയും ആരും അന്വേഷിച്ചെത്താത്തതിനാല്‍ മൃതദേഹം മെഡിക്കല്‍ കോളേജ് മോര്‍ച്ചറിയില്‍ സൂക്ഷിച്ചിരിക്കുകയാണ്. ഇയാളെ കുറിച്ച് എന്തെങ്കിലും വിവരം അറിയുന്നവര്‍ ഇരിങ്ങാലക്കുട പോലിസ് സ്റ്റേഷനിലോ, സമീപത്തെ പോലിസ് സ്റ്റേഷനുകളിലോ വിവരം അറിയിക്കേണ്ടതാണ്. ഫോണ്‍: 04802825228, 9497980533

ഇരിങ്ങാലക്കുട : നഗരസഭ റിപ്പബ്ലിക്ക് ദിനം സമുചിതമായി ആഘോഷിക്കുന്നത്തിന്റെ ഭാഗമായി മുന്‍സിപ്പല്‍ ചെയര്‍ പേഴ്‌സണ്‍ 26ന് രാവിലെ 9 :30 ന് അയ്യന്‍കാവ് മൈതാനിയില്‍ ദേശിയ പതാക ഉയര്‍ത്തുന്നു. വൈകീട്ട് 3ന് റിപ്പബ്ളിക് ദിനാഘോഷയാത്ര അയ്യന്‍കാവ് മൈതാനിയില്‍ നിന്നാരംഭിച്ച് ചന്ദ്രിക ജംഗ്ഷന്‍, ചന്തക്കുന്ന്, ഠാണാ, മെയിന്‍ റോഡ്, ബസ് സ്റ്റാന്‍ഡ് ടൗണ്‍ ഹാള്‍ വഴി അയ്യന്‍കാവ് മൈതാനിയില്‍ എത്തിചേരും. റിപ്പബ്ലിക്ക് ദിനറാലിയില്‍ ഭാരതമാതാവ്, ചെയര്‍പേഴ്‌സണ്‍, കൗണ്‍സിലര്‍മാരും, പൗര പ്രമുഖരും, വ്യാപാരി വ്യവസായികളും, സന്നദ്ധ സംഘടനകളും, ക്ലബ്ബുകളും, റസിഡന്‍സ് അസോസിയേഷന്‍ ഭാരവാഹികളും, അംഗങ്ങളും, കുടുംബശ്രീ പ്രവര്‍ത്തകരും വിവിധ ഓഫീസുകളിലെ ജീവനക്കാര്‍, എന്‍.സി.സി, സ്‌കൗട്ട്, ഗൈഡ്സ്, വിവിധ വിദ്യാലയങ്ങളിലെ വിദ്യാര്‍ഥികള്‍, നിശ്ചല ദൃശ്യങ്ങള്‍, കാവടി, വിവിധങ്ങളായ നാദമേളങ്ങള്‍ വൈവിധ്യങ്ങളര്‍ന്ന ഇനങ്ങളോടെ അണിനിരക്കും.

ഇരിങ്ങാലക്കുട : ഇരിങ്ങാലക്കുട ആസ്ഥാനമാക്കി റവന്യു ഡിവിഷന്‍ അനുവദിച്ചതില്‍ സര്‍ക്കാരിനെ അനുമോദിച്ച് കൊണ്ട് എന്‍ ജി ഓ യൂണിയന്റെ നേതൃത്വത്തില്‍ ആഹ്ലാദപ്രകടനവും യോഗവും നടത്തി.എന്‍ ജി ഓ യൂണിയന്‍ ഏരിയ പ്രസിഡന്റ് കെ എന്‍ സുരേഷ് കുമാര്‍ സ്വാഗതം പറഞ്ഞ ചടങ്ങ് എന്‍ ജി ഓ യൂണിയന്‍ ജില്ലാ സെക്രട്ടേറിയേറ്റ് അംഗം പി ബി ഹരിലാല്‍ ഉദ്ഘാടനം നിര്‍വഹിച്ചു.ഏരിയ സൈസ് പ്രസിഡന്റ് വി എസ് അനീഷ് നന്ദിയും പറഞ്ഞു.

റവന്യൂ ഡിവിഷന്‍ അനുവദിച്ച പിണറായി സര്‍ക്കാരിനും എംഎല്‍എ അരുണന്‍ മാസ്‌ററര്‍ക്കും ജനതാദള്‍ (സെക്യുലര്‍ )ഇരിഞ്ഞാലക്കുട നിയോജക മണ്ഡലം കമ്മിറ്റി അഭിനന്ദനങ്ങള്‍ അര്‍പ്പിച്ചു .പ്രസിഡന്റ് രാജു പാലത്തിങ്കലിന്റെ അധ്യക്ഷതയില്‍ കൂടിയ യോഗത്തില്‍ ജില്ലാ സെക്രട്ടറി ജോസ് പുണാംപറമ്പില്‍ ,ഡേവീസ് കോക്കാട്ട് ,ആന്റണി ഫ്രാന്‍സിസ് ,ആന്റണി കുന്നത്തു പറമ്പില്‍ ,വര്‍ഗ്ഗീസ് പള്ളന്‍ എന്നിവര്‍ പ്രസംഗിച്ചു

ഇരിങ്ങാലക്കുട ; ഇരിങ്ങാലക്കുടയിലെ പ്രഖ്യാപിത റവന്യു ഡിവിഷണല്‍ ഓഫീസ് തദ്ദേശ സ്വയംഭരണ സ്ഥാപനങ്ങളുടെ വികസനപ്രവര്‍ത്തനങ്ങള്‍ക്ക് വേഗതവരുത്തുമെന്ന് ജോയിന്റ് കൗണ്‍സില്‍ മേഖലാകമ്മറ്റി.ഭൂമി വിട്ടൊഴിയല്‍ നടപടികള്‍ വേഗത്തില്‍ പൂര്‍ത്തീകരിക്കുന്നതോടെ വിവിധ പദ്ധതികള്‍ക്ക് ഫണ്ട് വിനിയോഗിക്കാന്‍ കഴിയുന്നല്ലെന്ന മുന്‍സിപ്പാലിറ്റിയുടേയും പഞ്ചായത്തുകളുടേയും പതിവുവിലാപത്തിന് അറുതിവരും. ആര്‍.ഡി.ഒ ഓഫീസിന്റെ ഭാഗമായി സീനിയര്‍ സിറ്റിസണ്‍ വെല്‍ഫെയര്‍ ട്രിബ്യൂണലും രൂപീകൃതമാകുമെന്നതിനാല്‍ മാതാപിതാക്കളെ സംരക്ഷിക്കാത്ത മക്കള്‍ക്കെതിരെയുള്ള പരാതികളുടെ തീര്‍പ്പാക്കലും എളുപ്പത്തിലാകും. പതിനായിരം രൂപ വരെ മാതാപിതാക്കള്‍ക്ക് പ്രതിമാസം ബത്ത നല്‍കാന്‍ മക്കളെ നിര്‍ദ്ദേശിച്ച് ഉത്തരവിടാന്‍ ട്രിബ്യൂണലിനാകും.വൃദ്ധരായ മാതാപിതാക്കളുടെ പരാതികള്‍ സമയത്തിന് തീര്‍പ്പാക്കാന്‍ കഴിയാത്തത് ഏറെ വിമര്‍ശനങ്ങള്‍ക്കിടയാക്കിയിരുന്നു. മറ്റ് ആര്‍.ഡി.ഒ ഓഫീസുകളില്‍ നിന്നും വ്യത്യസ്തമായി രണ്ട് ജൂനിയര്‍ സൂപ്രണ്ട് തസ്തികകള്‍ പുതിയ ഓഫീസിന്റെ പ്രത്യേകതയാകും.വേഗതയാര്‍ന്ന പ്രവര്‍ത്തനത്തിനായി റവന്യുമന്ത്രിയുടെ നിര്‍ദ്ദേശത്തിലാണ് ഈ മാറ്റമെന്നത് ഇരിങ്ങാലക്കുടക്ക് ഗുണകരമാകും. ഇരിങ്ങാലക്കുടയിലെ റവന്യുഡിവിഷനുവേണ്ടി നിരവധി നിവേദനങ്ങളും വിവിധ സര്‍ക്കാരുകള്‍ മുമ്പാകെ പതിറ്റാണ്ടുകളായി ജോയിന്റ് കൗണ്‍സില്‍ സമര്‍പ്പിച്ചുവന്നിരുന്നു.ഇടക്കാലത്ത് ചാലക്കുടി പരിഗണിക്കപ്പെട്ടപ്പോള്‍ ഇരിങ്ങാലക്കുടയുടെ അര്‍ഹതയും ജനസൗകര്യവും അടിസ്ഥാനസൗകര്യങ്ങളും റവന്യുമന്ത്രിയെ നേരില്‍കണ്ട് ബോധ്യപ്പെടുത്തിയിരുന്നു.
ഇരിങ്ങാലക്കുട റവന്യുഡിവിഷന്‍ രൂപീകരിക്കാനുളള സര്‍ക്കാര്‍ തീരുമാനത്തില്‍ ആഹ്ലാദം പ്രകടിപ്പിച്ച് ജോയിന്റ് കൗണ്‍സില്‍ പ്രവര്‍ത്തകരും റവന്യു ഡിപ്പാര്‍ട്ടുമെന്റ് സ്റ്റാഫ് അസോസിയേഷനും സംയുക്തമായി സിവില്‍ സ്റ്റേഷനില്‍ പ്രകടനം നടത്തി.ജോയിന്റ് കൗണ്‍സില്‍ മേഖലാ സെക്രട്ടറി എ.എം നൗഷാദ് ഉദ്ഘാടനം ചെയ്തു.റവന്യൂ ഡിപ്പാര്‍ട്ടുമെന്റ് സ്റ്റാഫ് അസോസിയേഷന്‍ താലൂക്ക് പ്രസിഡണ്ട് ടി ജെ സാജു അദ്ധ്യക്ഷത വഹിച്ചു.കെ.ജെ.ക്ലീറ്റസ്,വി.അജിത്കുമാര്‍,എം.എസ്.അല്‍ത്താഫ്,പി.എന്‍.പ്രേമന്‍,ഇ.ജി.റാണി,സി.യു.ജയശ്രീ,പി.ബിന്ദു,പി.സ്മിത,പി.എ.ശ്രീജ എന്നിവര്‍ സംസാരിച്ചു.

ഇരിങ്ങാലക്കുട : ശ്രീ കൂടല്‍മാണിക്യം ക്ഷേത്രത്തിന്റെ കീഴേടമായ അയ്യങ്കാവ് ഭഗവതി ക്ഷേത്രത്തിലെ 2018 വര്‍ഷത്തിലെ താലപ്പൊലിയാഘോഷത്തേ പറ്റി കൂടിയാലോചിക്കുന്നതിനായി ഭക്തജനങ്ങളുടെ ഒര യോഗം 27-01-2018 ശനിയാഴ്ച്ച രാവിലെ 11ന് അയ്യങ്കാവ് ക്ഷേത്ര പരിസരത്ത് ചേരുന്നതായി ക്ഷേത്രം അഡ്മിന്‍സ്റ്റേട്രര്‍ അറിയിച്ചു.

ഇരിങ്ങാലക്കുട ; ജില്ലയിലനുവദിച്ച രണ്ടാമത്തെ റവന്യൂ ഡിവിഷന്‍ ഇരിങ്ങാലക്കുടയിലെന്ന മന്ത്രിസഭാതീരുമാനം ഇരിങ്ങാലക്കുട ആഹ്ലാദപൂര്‍വ്വം വരവേറ്റേത്. കഴിഞ്ഞ ബജറ്റിലാണ് തൃശൂരില്‍ രണ്ടാമതൊരു റവന്യു ഡിവിഷന്‍ രൂപീകരിക്കുമെന്ന പ്രഖ്യാപനമുണ്ടായത്. മുകുന്ദപുരം,കൊടുങ്ങല്ലൂര്‍,ചാലക്കുടി താലൂക്കുകള്‍ ചേര്‍ത്ത് ഇരിങ്ങാലക്കുടയിലാണ് റവന്യൂ ഡിവിഷന്‍ രൂപീകരിക്കപ്പെടുക എന്നാണ് പ്രഖ്യാപനം മുതല്‍തന്നെ പൊതുവേ വിലയിരുത്തപ്പട്ടിരുന്നത്.വിവിധ പ്രദേശങ്ങളിലെ ജനങ്ങള്‍ക്ക് ഒരേപോലെ എത്തിച്ചേരാന്‍ സൗകര്യപ്രദമായ സ്ഥലം ഇരിങ്ങാലക്കുടയായതിനാലാണിത്.ജില്ലാ റൂറല്‍ ട്രഷറി,ജനറല്‍ ആശുപത്രി,ഫാമിലി കോടതി,മോട്ടാര്‍ ആക്സിഡന്റ് ട്രബ്യൂണല്‍,അസിസ്റ്റന്റ് പോലീസ് സൂപ്രണ്ടിനുകീഴിലുള്ള പോലീസ് സംവിധാനങ്ങള്‍,ജില്ലാ റൂറല്‍ വനിതാപോലീസ് സേന, മേഖലാ ലോട്ടറി ഓഫീസ് തുടങ്ങി നിരവധി ഉന്നത ഓഫീസുകള്‍ ഇരിങ്ങാലക്കുടയിലുണ്ടെന്നതിനാല്‍ റവന്യു ഡിവിഷനും ഇരിങ്ങാലക്കുടയില്‍ തന്നെ പ്രതീക്ഷിക്കപ്പെട്ടിരുന്നു.എന്നാല്‍ ഇടക്കാലത്ത് ചാലക്കുടിയുടെ പേരും പരിഗണിക്കപ്പെടുന്നുവെന്നറിവായതുമുതല്‍ ആശങ്കയായി.എന്നാല്‍ ആശങ്കകളെല്ലാം അസ്ഥാനത്താക്കി റവന്യൂ ഡിവിഷന്‍ ഇരിങ്ങാലക്കുടയിലെന്ന സര്‍ക്കാര്‍ തീരുമാനം ഏറ്റവും ഉചിതമെന്ന് വിലയിരുത്തപ്പെടുന്നു.കുന്ദംകുളം താലൂക്ക് രൂപീകരണത്തിനു പിന്നാലെയുണ്ടായ ഇരിങ്ങാലക്കുട റവന്യൂ ഡിവിഷന്‍ രൂപീകരണം സമീപകാല റവന്യുചരിത്രത്തില്‍ നാഴികക്കല്ലാകുമെന്നെന്നാണ് പൊതുജനാഭിപ്രായം.ഇരിങ്ങാലക്കുട ആസ്ഥാനമായി റവന്യു ഡിവിഷന്‍ രൂപീകരിക്കപ്പെടുന്നതോടെ മുകുന്ദപുരം,കൊടുങ്ങല്ലൂര്‍,ചാലക്കുടി താലൂക്ക് പരിധിയിലെ റവന്യുഫയലുകള്‍ ഇരിങ്ങാലക്കുട ഓഫീസിന് കൈമാറും.ജോലി ഭാരത്താല്‍ വീര്‍പ്പുമുട്ടുന്ന തൃശൂര്‍ ആര്‍.ഡി.ഒ ഓഫീസിന് ഇത് ആശ്വാസം പകരും.അതോടൊപ്പം കെട്ടിക്കിടക്കുന്ന ജനജീവിതത്തെ നേരിട്ട് ബാധിക്കുന്ന നിരവധി ഫയലുകള്‍ വേഗത്തില്‍ തീര്‍പ്പുകല്‍പ്പിക്കപ്പെടുമെന്ന് കരുതപ്പെടുന്നു.ഡെപ്പ്യൂട്ടി കളക്ടര്‍ റാങ്കിലുള്ള ഉദ്യോഗസ്ഥന്‍ ആര്‍.ഡി.ഒ ആയി നിയമിക്കപ്പെടും.സബ് ഡിവിഷണല്‍ മജിസ്ട്രേറ്റിന്റെ അധികാരങ്ങളും ആര്‍.ഡി.ഒ യ്ക്കുണ്ട്.ആര്‍.ഡി.ഒ യക്കുപുറമേ 24 തസ്തികകളും ഈ ഓഫീസിനായി സൃഷ്ടിക്കും.മറ്റ് റവന്യു ഡിവിഷണല്‍ ഓഫീസുകളില്‍ നിന്നും വ്യത്യസ്തമായി രണ്ട് ജൂനിയര്‍ സൂപ്രണ്ടുമാരുടെ തസ്തികകള്‍ ഈ ഓഫീസിലുണ്ടാകുമെന്നറിയുന്നു.വേഗതയാര്‍ന്ന പ്രവര്‍ത്തനം കാഴ്ച്ചവെക്കുന്നതിനായാണ് ഈ മാറ്റം റവന്യുമന്ത്രി നിര്‍ദ്ദേശിച്ചത്.സബ് ഡിവിഷണല്‍ മജിസ്ട്രേറ്റായതിനാല്‍ ക്രിമിനല്‍ ജസ്റ്റീസ് അപേക്ഷകളില്‍ റവന്യു ഡിവിഷണല്‍ ഓഫീസര്‍ക്ക് തീര്‍പ്പുകല്‍പ്പിക്കാനാകും.അതിര്‍ത്തി തര്‍ക്കം,പൊതുവഴി തടസ്സപ്പെടുത്തല്‍, കെട്ടിടങ്ങള്‍,വൃക്ഷങ്ങള്‍ എന്നിവ മുഖേന ജീവനോ സ്വത്തിനോ ഭീഷണി നേരിടല്‍, വെള്ളമെടുക്കുന്നതിന് തടസ്സമുണ്ടാക്കല്‍ മുതലായവയിലെ സങ്കീര്‍ണ്ണമായ കേസുകളില്‍ ആര്‍.ഡി.ഒ തീരുമാനമെടുക്കും.പരിഹരിക്കപ്പെടാത്ത കേസുകളില്‍ ബലപ്രയോഗത്തിലൂടെ തീരുമാനം നടപ്പിലാക്കാന്‍ ആര്‍.ഡി.ഒ ക്ക് സാധിക്കും.മറ്റു ഭൂമിയില്ലാത്തവര്‍ക്ക് നിലമായിട്ടുള്ള സ്ഥലത്ത് വീടുവെക്കാന്‍ അനുമതി നല്‍കുന്ന ജില്ലാ അധികൃത സമിതി ചെയര്‍മാനും ആര്‍.ഡി.ഒ യാണ്.ഇത്തരം അപേക്ഷകളിലെ കാലതാമസം കുറക്കാന്‍ പുതിയ ഡിവിഷന്‍ രൂപീകരണത്തിലൂടെ സാധിക്കും.ഭൂവിനിയോഗനിയമം ( കെ.എല്‍.യു ) ഉത്തരവിലൂടെ റവന്യൂരേഖകളിലെ നിലമായ പ്രദേശങ്ങള്‍ 2008 നു മുന്‍പ് നികത്തപ്പെട്ടതാണെങ്കില്‍ ക്രമീകരണ ഉത്തരവ് ലഭിക്കാനായി അപേക്ഷ സമര്‍പ്പിക്കേണ്ടതും ആര്‍.ഡി.ഒ മുമ്പാകെയാണ്.റവന്യു കെട്ടിട നകുതിയുടെയും ആഡംബര നികുതിയുടെയും നിര്‍ണ്ണയത്തിലെ അപ്പീല്‍ പരിശോധിക്കുന്നത് ആര്‍.ഡി.ഒ യാണ്. പൊതുനിരത്തുകളിലും വഴികളിലുമുള്ള അനധികൃത പ്രവേശങ്ങള്‍ മറ്റ് ഏജന്‍സുയുണ്ടോയെന്ന് നോക്കാതെതന്നെ ഒഴിപ്പിച്ചെടുക്കാന്‍ നടപടി സ്വീകരിക്കാന്‍ ആര്‍.ഡി.ഒ വിന് അധികാരമുണ്ട്.
ഭൂവുടമകള്‍ ക്ഷേമപ്രവര്‍ത്തനങ്ങള്‍ക്കുവേണ്ടി പ്രതിഫലം കൂടാതെ സര്‍ക്കാരിന്റെ പേര്‍ക്ക് വിട്ടൊഴിയുന്ന ( ലാന്റ് റിലിങ്ക്വിഷ്മെന്റ് ) ഭൂമി സര്‍ക്കാരിന്റെ പേരില്‍ പുറമ്പോക്കാക്കികൊണ്ടുള്ള നടപടിക്രമങ്ങള്‍ പൂര്‍ത്തീകരിക്കേണ്ടത് ആര്‍.ഡി.ഒ യാണ്.ഭൂമി വിട്ടൊഴിയല്‍ നടപടിക്രമങ്ങള്‍ യഥാസമയം പൂര്‍ത്തീകരിക്കാനാകാത്തത് തദ്ദേശ സ്വയംഭരണ സ്ഥാപനങ്ങളുടെ റോഡുനിര്‍മ്മാണമുള്‍പ്പടെയുള്ള നിരവധി വികസനപ്രവര്‍ത്തനങ്ങളെ ദോഷകരമായി ബാധിക്കുന്ന സ്ഥിതിയുണ്ട്.പുതിയ റവന്യു ഡിവിഷന്‍ തദ്ദേശസ്വയം ഭരണ സ്ഥാപനങ്ങളുടെ വികസന പ്രവര്‍ത്തനങ്ങള്‍ക്ക് വേഗം പകരുമെന്ന് കരുതപ്പെടുന്നു.
വൃദ്ധരായ മാതാപിതാക്കളെ സംരക്ഷിക്കാത്ത മക്കളെയും അനന്തരാവകാശികള്‍ക്കെതിരെയും നടപടിയെടുക്കാന്‍ അധികാരമുള്ള ട്രൈബ്യുണല്‍ അദ്ധ്യക്ഷന്‍ റവന്യു ഡിവിഷണല്‍ ഓഫീസറാണ്.അവശതയനുഭവിക്കുന്ന വൃദ്ധ ജനങ്ങള്‍ക്ക് സ്വന്തം കുടുംബാംഗങ്ങളില്‍ നിന്നും നീതിലഭിക്കുന്നില്ലെന്ന പരാതികള്‍ ജില്ലയിലേറെയുണ്ട്.കേസുകളുടെ ബാഹുല്ല്യം ചിലപ്പോഴെങ്കിലും നീതി വൈകിപ്പിക്കുന്ന സാഹചര്യമുണ്ടായിരുന്നു.വൃദ്ധ ജനങ്ങളുടെ പരാതി പരിഹാരം വേഗത്തിലാക്കാന്‍ പുതിയ ട്രൈബ്യൂണലിലൂടെ സാധിക്കും.ജനനമരണങ്ങള്‍ യഥാസമയം രജിസ്റ്റര്‍ ചെയ്യുന്നത് വിട്ടുപോയതായി പരാതിയുണ്ടെങ്കില്‍ ആയതിനു നിവൃത്തിതേടി സമീപിക്കേണ്ടതും റവന്യു ഡിവിഷണല്‍ ആഫീസറെയാണ്.അനധികൃതഭൂമി പരിവര്‍ത്തനത്തിനെതിരെ നടപടികള്‍ സ്വീകരിക്കുന്നത് ആര്‍.ഡി.ഒ യാണ്.അനധികൃത നിലം നികത്ത് പ്രവര്‍ത്തനങ്ങള്‍ക്ക് കടിഞ്ഞാണിടാന്‍ പുതിയ ഓഫീസിന് സാധിക്കും.ഭൂമിയുടെ ന്യായവില സംബന്ധമായ പരാതികള്‍ പരിഹരിക്കേണ്ടതിനായി തൃശൂര്‍ ആര്‍ ഡി ഒ യെ സമീപിക്കേണ്ട് ബൂദ്ധിമുട്ടുകളും ഇനി പഴങ്കഥയാകും.ജനജീവിതത്തെ ഇത്രമേല്‍ ആഴത്തില്‍ സ്പര്‍ശിക്കുന്ന സര്‍ക്കാര്‍ ഓഫീസ് വേറെയില്ലെന്നതിനാല്‍ ഇരിങ്ങാലക്കുട ആര്‍ ഡി ഒ ഓഫീസ് രൂപീകരണം സമാനതകളില്ലാത്ത സര്‍ക്കാര്‍ തീരുമാനമായാണ് വിലയിരുത്തപ്പെടുന്നത്.

Related News ഇരിങ്ങാലക്കുട ആസ്ഥാനമായി റവന്യൂ ഡിവിഷന്‍ രൂപീകരിക്കാന്‍ മന്ത്രിസഭ യോഗം തീരുമാനം.

ഇരിങ്ങാലക്കുട : സംസ്ഥാന ബജറ്റില്‍ തൃശ്ശൂര്‍ ജില്ലയിലേക്ക് പുതുതായി അനുവദിച്ച റവന്യൂ ഡിവിഷന്‍ ഇരിങ്ങാലക്കുട ആസ്ഥാനമായി രൂപീകരിക്കാന്‍ മന്ത്രിസഭ യോഗം തീരുമാനിച്ചു. ഇരിങ്ങാലക്കുടയില്‍ ആര്‍.ഡി.ഒ.ഓഫീസ് അനുവദിക്കണമെന്ന പതിറ്റാണ്ടുകളുടെ പഴക്കമുള്ള ആവശ്യം ഇതോടെ യാഥാര്‍ത്ഥ്യമായി. ബുധനാഴ്ച ചേര്‍ന്ന മന്ത്രിസഭാ യോഗത്തില്‍ സംസ്ഥാനത്ത 5 പുതിയ റവന്യൂ ഡിവിഷന്‍ ഓഫീസുകള്‍ ആരംഭിക്കാന്‍ തീരുമാനിച്ചതില്‍ ഒന്ന് ഇരിങ്ങാലക്കുടയിലാണ്. മുകുന്ദപുരം,കൊടുങ്ങല്ലൂര്‍,ചാലക്കുടി താലൂക്കുകള്‍ ചേര്‍ത്ത് ഇരിങ്ങാലക്കുടയിലാണ് റവന്യൂ ഡിവിഷന്‍ രൂപീകരിക്കപ്പെടുക. കഴിഞ്ഞ സര്‍ക്കാരുകളുടെ കാലത്ത് ഇക്കാര്യത്തില്‍ തത്വത്തില്‍ ധാരണയായിരുന്നതുമാണ്. എന്നാല്‍ ബജറ്റ് പ്രഖ്യാപനമില്ലാതിരുന്നതിനാല്‍ നടപ്പാവാതെ പോകുകയായിരുന്നു. ഇരിങ്ങാലക്കുട ജില്ലയെന്ന ലക്ഷ്യത്തിലേക്കുള്ള പ്രയാണത്തിന് പുതിയ റവന്യൂ ഡിവിഷന്‍ ഓഫീസ് അനുവദിക്കുന്നത് പുതിയ ഊര്‍ജ്ജം നല്‍കും. ജില്ലാ പദവിയുടെ വക്കോളമെത്തിയ ഓഫീസ് സംവിധാനങ്ങളും നിലവില്‍ ഇരിങ്ങാലക്കുടയിലാണ്. അഡിഷണല്‍ ജില്ലാകോടതിയും ഫാമിലി കോടതിയുമുള്‍പ്പടെ പതിനൊന്ന് കോടതികളുള്‍പ്പെടുന്ന ജൂഡീഷ്യല്‍ സംവിധാനവും അസിസറ്റന്റ് ജില്ലാ പോലീസ് സൂപ്രണ്ടിന്റെ കീഴിലുള്ള പോലീസ് സംവിധാനങ്ങളും ജില്ലാ റൂറല്‍ വനിതാപോലീസ് സേനയും ഇരിങ്ങാലക്കുടയില്‍പ്രവര്‍ത്തിക്കുന്നുണ്ട്. ജില്ലാ റൂറല്‍ ട്രഷറി,താലൂക്ക് ജനറല്‍ ആശുപത്രി എന്നിവ ഇതിലുള്‍പ്പെടും. സ്പെഷല്‍ സബ് ജയില്‍ നിര്‍മ്മാണം നടന്നുവരുന്നുണ്ട്. ഭൂമിശാസ്ത്രപരമായും തൃശ്ശൂര്‍ ജില്ലയുടെ മധ്യഭാഗത്ത് വരുന്നത് ഇരിങ്ങാലക്കുടയാണ്. നിലവിലെ തൃശ്ശൂര്‍ ആര്‍.ഡി.ഒ ഓഫീസിന്റെ പ്രവര്‍ത്തനപരിധി നിശ്ചയിച്ച് ശേഷിക്കുന്ന സ്ഥലങ്ങള്‍ പരിശോധിച്ചാല്‍ പൊതുജനങ്ങള്‍ക്ക് കുറവ്ദൂരം സഞ്ചരിച്ച് എളുപ്പത്തില്‍ എത്തിച്ചേരാവുന്നതും ഇരിങ്ങാലക്കുടയിലാണെന്നതും ആര്‍.ഡി.ഒ ഓഫീസിനായി സ്ഥലസൗകര്യമന്വേഷിക്കേണ്ട ആവശ്യമില്ലെന്നതും ഗുണകരമായി.

Related News പുതിയ റവന്യൂ ഡിവിഷന്‍ – സ്വാഗതമേകി ഇരിങ്ങാലക്കുട – ഇനി ഫയലുകള്‍ക്ക് വേഗതയേറും