ഇരിങ്ങാലക്കുട : പാര്‍ത്ഥസാരഥി ക്ഷേത്രവിമോചനയാത്രയ്ക്ക ഇരിങ്ങാലക്കുടയില്‍ സ്വീകരണം. രാവിലെ തൊട്ടിപ്പാളിലെ സ്വീകരണം കഴിഞ്ഞ് ഇരിങ്ങാലക്കുട കിഴുത്താണിയില്‍ ഉച്ചത്തിരിഞ്ഞ് 3 മണിക്ക് സ്വീകരണം നല്‍കിയത്. സ്വാമി പുരുഷോത്തമാനന്ദ സരസ്വതി നയിക്കുന്ന യാത്രയില്‍ ഹിന്ദു ഐക്യവേദി സംസ്ഥാന ജനറല്‍ സെക്രട്ടറി കെ.പി.ഹരിദാസ്, പി.ജി.കണ്ണന്‍, വി.ആര്‍.സത്യവാന്‍ തുടങ്ങിയവര്‍ സംസാരിച്ചു. പരിപാടിയില്‍ വിവിധ സാമൂദായികനേതാക്കള്‍, ക്ഷേത്രഭാരവാഹികള്‍, ഹൈന്ദവസംഘടനാനേതാക്കള്‍ പങ്കെടുത്തു.

ഇരിങ്ങാലക്കുട: നിര്‍മ്മാണം പൂര്‍ത്തിയാക്കി തുറന്ന് നല്‍കിയ നഗരത്തിലെ ബൈപ്പാസ് റോഡിന്റെ ഇരുവശങ്ങളിലുമായി അനധികൃതമായി മണ്ണടിച്ച് നിലങ്ങള്‍ നികത്തുന്നതായി പരാതി. നഗരസഭയുടെയോ വില്ലേജ് അധികാരികളുടേയോ യാതൊരുവിധ അനുമതിയും ഇല്ലാതെയാണ് പട്ടാപകല്‍ പാടം നികത്തുന്നത്. ബൈപ്പാസിന്റെ ഇരുവശത്തുമായി മൂന്നിടത്താണ് മണ്ണിട്ട് നികത്തുന്നത്. നഗരസഭ അധികൃതരേയും വില്ലേജ് അധികൃതരേയും ഇക്കാര്യം അറിയിച്ചെങ്കിലും യാതൊരു നടപടിയും അധികൃതരുടെ ഭാഗത്തുനിന്നും ഉണ്ടായില്ലെന്ന് ആക്ഷേപമുണ്ട്. അധികാരികളുടെ മൗനാനുവാദത്തോടെ, റോഡ് ലവലിങ്ങിനെന്ന വ്യാജേനെയാണ് സ്ഥലങ്ങളില്‍ മണ്ണടിക്കുന്നതെന്നാണ് ജനം കുറ്റപ്പെടുത്തുന്നത്.

ഇരിങ്ങാലക്കുട : കേരള എന്‍ ജി ഓ യൂണിയന്‍ ഇരിങ്ങാലക്കുട 55-ാം ഏരിയ സമ്മേളനം മുന്‍സിപ്പല്‍ ടൗണ്‍ ഹാളില്‍ നടന്നു.സംസ്ഥാന സെക്രട്ടറിയേറ്റ് അംഗം എന്‍ നിമല്‍രാജ് സമ്മേളനം ഉദ്ഘാടനം ചെയ്തു.ഏരിയ പ്രസിഡന്റ് ആര്‍ എല്‍ സിന്ധു അദ്ധ്യക്ഷത വഹിച്ച സമ്മേളനത്തില്‍ സെക്രട്ടറി കെ എന്‍ സുരേഷ് കുമാര്‍ റിപോര്‍ട്ട് അവതരിപ്പിച്ചു.രാവിലെ പതാക ഉയര്‍ത്തല്‍,പ്രമേയങ്ങള്‍ അവതരിപ്പിക്കല്‍ എന്നിവ നടന്നു.ഏപ്രില്‍ 29,30,മെയ് 1 തിയ്യതികളില്‍ ഇടുക്കിയിലാണ് സംസ്ഥാന സമ്മേളനം.

ഇരിങ്ങാലക്കുട: ജനറല്‍ ആശുപത്രിയിലെ കിടപ്പുരോഗികള്‍ക്കും കൂട്ടിരിപ്പുകാര്‍ക്കും സേവാഭാരതി നടത്തിവരുന്ന അന്നദാനത്തിന്റെ പതിനൊന്നാം വാര്‍ഷികം ആഘോഷിച്ചു. അന്നേദിവസത്തെ അന്നദാനപരിപാടി ജനറല്‍ ആശുപത്രി സൂപ്രണ്ട് ഡോ.എ.എ. മിനിമോള്‍ ഉദ്ഘാടനം ചെയ്തു. വാര്‍ഷികത്തിന്റെ ഭാഗമായി സംഗമേശ്വര വാനപ്രസ്ഥത്തില്‍ നടന്ന പൊതുയോഗം കാത്തലിക് സിറിയന്‍ റിട്ടേ. ജനറല്‍ മാനേജര്‍ സുരേന്ദ്രന്‍ ഉദ്ഘാടനം ചെയ്തു. അന്നദാനസമിതി പ്രസിഡന്റ് ഡി.പി. നായര്‍ അധ്യക്ഷനായിരുന്നു. കെ. സുരേഷ്‌കുമാര്‍ സന്ദേശം നല്‍കി. സേവാഭാരതി രക്ഷാധികാരി പി.കെ. ഭാസ്‌ക്കരന്‍ അന്നദാന സാമഗ്രികള്‍ പൊതുജനങ്ങളില്‍ നിന്നും ഏറ്റുവാങ്ങി. എസ്.എന്‍.ഡി.പി. വനിത സമാജം മുകുന്ദപുരം താലൂക്ക് ചെയര്‍പേഴ്സന്‍ മാലിനി പ്രേംകുമാര്‍, എസ്. പരമേശ്വര അയ്യര്‍, രാജേഷ് മേനോന്‍, രവീന്ദ്രന്‍ കണ്ണൂര്‍, പുരുഷോത്തമന്‍ ചാത്തംപിള്ളി എന്നിവര്‍ സംസാരിച്ചു. 2007 ജനുവരിയിലാണ് സേവാഭാരതി ഇരിങ്ങാലക്കുട ജനറല്‍ ആശുപത്രിയില്‍ ദിവസവും വൈകീട്ട് അന്നദാനം ആരംഭിച്ചത്. കഞ്ഞിയും മുതിര പുഴുക്കും ആച്ചാറും ഉള്‍പ്പെട്ട ഭക്ഷണമാണ് എല്ലാദിവസവും വിതരണം ചെയ്യുന്നത്.

കാട്ടൂര്‍ : കൃഷിഭവന്റെ ആഭിമുഖ്യത്തില്‍ ജൈവഗ്രാമം ബയോഫാര്‍മസി എന്ന സ്ഥാപനം പ്രവര്‍ത്തനം ആരംഭിച്ചു. കാട്ടൂര്‍ ഗ്രാമപഞ്ചായത്ത് പ്രസിഡന്റ് മനോജ് വലിയപറമ്പിലിന്റെ അദ്ധ്യക്ഷതയില്‍ ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് വി എ മനോജ്കുമാര്‍ ഉദ്ഘാടനം നിര്‍വ്വഹിച്ചു. കൃഷി ഓഫീസര്‍ ഭാനു ശാലിനി സ്വാഗതം പറഞ്ഞു. ജില്ലാ പഞ്ചായത്ത് മെമ്പര്‍ എന്‍. ഉദയപ്രകാശ് മുഖ്യാതിഥിയായിരുന്നു . ആദ്യവില്‍പ്പന രാജലക്ഷ്മി കുറുമാത്ത്( കാട്ടൂര്‍ സര്‍വ്വീസ് കോപ്പറേറ്റീവ് ബാങ്ക് പ്രസിഡന്റ്) നടത്തി.ബീന രഘു(വൈസ് പ്രസിഡന്റ്), കുമാരി ടി വി ലത( വികസന സ്റ്റാന്റിംഗ് കമ്മിറ്റി ചെയര്‍പേഴ്സണ്‍), ജയശ്രീ സുബ്രഹ്മണ്യന്‍(ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍പേഴ്സണ്‍), ടി കെ രമേഷ്(ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍), സ്വപ്ന നെജിന്‍(മെമ്പര്‍) എന്നിവര്‍ ആശംസകള്‍ അര്‍പ്പിച്ച് സംസാരിച്ചു. ഉദ്ഘാടനത്തിന് ശേഷം ‘ജൈവകൃഷിയുടെ പുത്തന്‍ സാധ്യതകള്‍’ എന്ന വിഷയത്തില്‍ റിട്ട. ജില്ല കൃഷി ഓഫീസറും, എടിഎംഎ പ്രോജക്ട് ഡയറക്ടറുമായ വി എസ് റോയ് ക്ലാസ്സെടുത്തു. ശങ്കരന്‍ കാളിപറമ്പില്‍ നന്ദി പറഞ്ഞു.

ഇരിങ്ങാലക്കുട : സംസ്ഥാന സ്‌ക്കൂള്‍ കലോല്‍സവത്തില്‍ കഥകളിസംഗീതം ഹൈസ്‌കൂള്‍ വിഭാഗത്തില്‍ എ ഗ്രേഡ് നേടിയ ആഗ്‌നേയ് ഗംഗാ. ഇരിങ്ങാലക്കുട സെന്റ് മേരീസ് ഹയര്‍ സെക്കണ്ടറി സ്‌കൂള്‍ 10 ക്ലാസ്സ് വിദ്യാര്‍ത്ഥിയാണ് കരുവന്നൂര്‍ ഉട്ടോളി ഗംഗായുടെയും മിനിയുടെയും മകനാണ്

ഇരിങ്ങാലക്കുട: ഡ്രൈവര്‍മാരുടെ അഭാവം മൂലം ഇരിങ്ങാലക്കുട കെ.എസ്.ആര്‍.ടി.സി സബ്ബ് ഡിപ്പോ പ്രതിസന്ധിയിലേക്ക്. ഇതുമൂലം ഇവിടെ നിന്നുള്ള പല സര്‍വ്വീസുകളും ഒഴിവാക്കുകയാണ്. 1987ല്‍ പ്രവര്‍ത്തനമാരംഭിച്ച ഇരിങ്ങാലക്കുട കെ.എസ്.ആര്‍.ട്ടി.സി. ഓപ്പറേറ്റിംഗ് സെന്ററില്‍ നാല് സൂപ്പര്‍ ഫാസ്റ്റും അഞ്ച് പാസഞ്ചറും ഉള്‍പ്പെടെ 29 ഷെഡുകള്‍ക്കായി 31 ബസ്സുകളാണ് ഉണ്ടായിരുന്നത്. ഇതില്‍ നേരത്തെ പ്രഖ്യാപിക്കപ്പെട്ട ഒരു എയര്‍ ബസ്സും ഗുരുവായൂര്‍ സര്‍വ്വീസിനും വണ്ടി എത്താത്തതിനാല്‍ ആ സര്‍വ്വീസുകള്‍ നടന്നില്ല. പിന്നിട് നഷ്ടത്തിലായ ചില സര്‍വ്വീസുകളും ഒഴിവാക്കിയതോടെ അത് 26 ആയിമാറി. എന്നാല്‍ ഡ്രൈവര്‍മാര്‍ കുറഞ്ഞതോടെ സര്‍വ്വീസുകള്‍ വീണ്ടും കുറഞ്ഞ് ഇപ്പോള്‍ 19നും 21നും ഇടയിലായി. ഇതില്‍ ഒരെണ്ണത്തിന് കേടുപാടുസംഭവിച്ചാല്‍ പകരം ബസ്സില്ലാതെ ആ ട്രിപ്പ് തന്നെ മുടക്കേണ്ട അവസ്ഥയിലാണെന്ന് ജീവനക്കാര്‍ പറഞ്ഞു. ഇരിങ്ങാലക്കുടയിലുണ്ടായിരുന്ന ബസ്സുകള്‍ മറ്റ് ഡിപ്പോകള്‍ക്ക് നല്‍കിയതാണ് ഈ അവസ്ഥയ്ക്ക് കാരണമെന്നാണ് പറയുന്നത്. ബസ്സുകളില്‍ രണ്ട് വീതം മണ്ണാര്‍കാട്, വടക്കുംഞ്ചേരി, ചാലക്കുടി എന്നി ഡിപ്പോകളിലേക്ക് നല്‍കി. രണ്ട് ബസ്സുകള്‍ പമ്പയ്ക്ക് സ്പെഷ്യല്‍ സര്‍വ്വീസിനായി കൊണ്ടുപോയി. ഇതൊക്കെ ഇരിങ്ങാലക്കുട കെ.എസ്.ആര്‍.ടി.സി.യുടെ പ്രവര്‍ത്തനങ്ങളെ ബാധിച്ചിട്ടുണ്ടെന്നാണ് പറയുന്നത്. എന്നാല്‍ ഡ്രൈവര്‍മാരില്ലാത്തതാണ് ഇരിങ്ങാലക്കുട സബ്ബ് ഡിപ്പോ നേരിടുന്ന വലിയ പ്രതിസന്ധിയെന്ന് ഉദ്യോഗസ്ഥര്‍ പറഞ്ഞു. ബസ്സുകള്‍ അധികമുണ്ടായിരുന്നെങ്കിലും അത് ഓടിക്കുവാനുള്ള ജീവനക്കാരുണ്ടായിരുന്നില്ല. ആവശ്യത്തിന് ജീവനക്കാരെ ലഭിക്കുകയാണെങ്കില്‍ വെട്ടിചുരുക്കാതെ സര്‍വ്വീസുകള്‍ നടത്താന്‍ സാധിക്കുമെന്ന് ഉദ്യോഗസ്ഥര്‍ വ്യക്തമാക്കി. ഇരിങ്ങാലക്കുടയില്‍ തന്നെ 11 ഡ്രൈവര്‍മാരുടെ കുറവുണ്ട്. ഇതില്‍ എട്ടുപേരെയെങ്കിലും ലഭിച്ചാല്‍ സര്‍വ്വീസുകള്‍ സുഗമമായി നടത്താം. ഇരിങ്ങാലക്കുട കെ.എസ്.ആര്‍.ടി.സി സബ്ബ് ഡിപ്പോ നഗരത്തില്‍ നിന്നും അല്‍പ്പം മാറിയതിനാല്‍ പുലര്‍ച്ചെ ഡ്യൂട്ടിക്ക് കയറേണ്ട ഡ്രൈവര്‍മാര്‍ക്ക് തലേദിവസം തന്നെ ഡിപ്പോയില്‍ വന്ന് കിടക്കേണ്ട അവസ്ഥയാണ്. ഇതുമൂലം പല ഡ്രൈവര്‍മാരും ഇരിങ്ങാലക്കുടയിലേക്ക് വരാന്‍ തയ്യാറാകുന്നില്ലെന്നും ആക്ഷേപമുണ്ട്. ദിവസകൂലിക്ക് ജോലി ചെയ്തിരുന്ന ഡ്രൈവരില്‍ ഭൂരിഭാഗവും ഇപ്പോള്‍ ഇല്ലാതായി. ഡ്യൂട്ടി പരിഷ്‌ക്കരണവും സ്ഥിരം ജീവനക്കാര്‍ക്ക് ലഭിക്കുന്ന ആനുകൂല്യങ്ങള്‍ ലഭിക്കാത്തതുമെല്ലാം ദിവസകൂലിക്കാരെ അസംതൃപ്തരാക്കിയതാണ് തിരിച്ചടിയായത്. ഇപ്പോള്‍ നാമമാത്രമായ താല്‍ക്കാലിക ഡ്രൈവര്‍മാര്‍ മാത്രമാണ് ഡിപ്പോയില്‍ ഉള്ളത്. ഡ്രൈവര്‍മാര്‍ക്കോ, ബസ്സുകള്‍ക്കോ കുറവ് വന്നാല്‍ ആദ്യം നിറുത്തുക തൃശ്ശൂര്‍-കൊടുങ്ങല്ലൂര്‍ റൂട്ടിലോടുന്ന കെ.എസ്.ആര്‍.ടി.സി. സര്‍വ്വീസുകളാണെന്ന് ആരോപണമുണ്ട്. മൂന്ന് ഡിപ്പോകളില്‍ നിന്നായി 12 കെ.എസ്.ആര്‍.ടി.സി ലിമിറ്റഡ് സ്റ്റോപ്പുകള്‍ സര്‍വ്വീസ് നടത്തിയിരുന്ന സ്ഥാനത്ത് ഇന്ന് മൂന്നെണ്ണമാണ് സര്‍വ്വീസ് നടത്തുന്നത്. ചില ദിവസങ്ങളില്‍ അത് ഒന്നായി കുറയും. ഇത് വണ്ടികളുടെ കളക്ഷനേയും ബാധിച്ചിട്ടുണ്ടെന്ന് ജീവനക്കാര്‍ പറഞ്ഞു. നേരത്തെ ഈ റൂട്ടില്‍ യാത്രക്കാര്‍ കെ.എസ്.ആര്‍.ടി.സി. ബസ്സുകള്‍ കാത്തുനിന്നിരുന്നു. എന്നാല്‍ വണ്ടികള്‍ സ്ഥിരമായി ഓടാത്തതിനാല്‍ ഇപ്പോള്‍ ആരും കെ.എസ്.ആര്‍.ടി.സി. കാത്തുനില്‍ക്കുന്നില്ലെന്ന് ജീവനക്കാര്‍ തന്നെ സമ്മതിക്കുന്നു. ലാഭത്തില്‍ പ്രവര്‍ത്തിക്കുന്ന ഡിപ്പോകളില്‍ ഒന്നാണ് ഇരിങ്ങാലക്കുട. എന്നിട്ടും ഡ്രൈവര്‍മാരുടെ കുറവുമൂലം ബസ്സുകളുടെ സര്‍വ്വീസ് വെട്ടിചുരുക്കുന്നത് ആശാസ്യമല്ലെന്ന് യാത്രക്കാര്‍ പറയുന്നത്. ആവശ്യത്തിന് ഡ്രൈവര്‍മാരെ നിയമിക്കാനും വെട്ടിച്ചുരുക്കിയ സര്‍വ്വീസുകള്‍ പുനരാരംഭിക്കുകയും ചെയ്താല്‍ ഇരിങ്ങാലക്കുട ഡിപ്പോയുടെ ഇപ്പോഴത്തെ പ്രതിസന്ധി പരിഹരിക്കാനാകുമെന്ന വിശ്വാസത്തിലാണ് ജീവനക്കാരും ജനങ്ങളും

ഇരിഞ്ഞാലക്കുട : ലിറ്റില്‍ ഫ്‌ളവര്‍ ഹയര്‍ സെക്കന്ററി വിദ്യാലയത്തില്‍ വാര്‍ഷികാഘോഷവും യാത്രായയ്പ് സമ്മേളനവും ജനുവരി 11-ാം തിയതി രാവിലെ 10 മണിക്ക് ആരംഭിക്കും. സ്റ്റാഫ് പ്രതിനിധി ഇ എ കൊച്ചുത്രേസ്യാ റിപ്പോര്‍ട്ട് അവതരിപ്പിക്കും. എം പി ഇന്നസെന്റ് യോഗം ഉദ്ഘാടനം ചെയ്യും. പ്രോവിന്‍ഷ്യല്‍ സി.ജോസ്‌റിറ്റ അധ്യക്ഷത വഹിക്കും. ഇരിങ്ങാലക്കുട രൂപതാ ചാന്‍സലര്‍ റവ.ഡോ. നെവിന്‍ ആട്ടോക്കാരന്‍ അനുഗ്രഹ പ്രഭാഷണം നടത്തും. പി ടി എ പ്രസിഡണ്ട്, പി ടി ജോര്‍ജ്ജ് റിട്ടയര്‍ ചെയ്യുന്ന ഷേളി ടീച്ചര്‍ക്ക് മെമ്മോന്റോ നല്കും. മുന്‍സിപ്പല്‍ ചെയര്‍ പേഴ്‌സണ്‍ നിമ്യ ഷിജു സംസ്ഥാനതല മത്സര വിജയികളെ ആദരിക്കും. ലോക്കല്‍ മാനേജര്‍ മദര്‍ ജെസ്മി സമ്മാനദാനം നടത്തും. ഉഷ റാണി,ടി ടി കെ ഭരതന്‍, സി. മെറീന, പ്രജീഷ ഊക്കന്‍ (അധ്യാപക പ്രതിനിധി), ജോസ് അന്തിക്കാടന്‍, അനീന ജെയ്‌സണ്‍ എന്നിവര്‍ ആശംസകള്‍ അര്‍പ്പിച്ച് സംസാരിക്കും. സി.ജീസ് റോസ് സ്വാഗതവും വാര്‍ഡ് കൗണ്‍സിലര്‍ പി.വി. ശിവകുമാര്‍ നന്ദിയും രേഖപ്പെടുത്തും. കുട്ടികളുടെ വിവിധ കലാപരിപാടികള്‍ വാര്‍ഷികാഘോഷങ്ങള്‍ക്ക് നിറപകിട്ടേകും.