ഇരിങ്ങാലക്കുട : സെന്റ്. ജോസഫ്‌സ് കോളജ് എന്‍ എസ് എസ് യൂണിറ്റുകളുടെ ദ്വിദിന സൗഹാര്‍ദ്ദ ക്യാമ്പ് ‘തളിര് ‘ വ്യത്യസ്ത പ്രവര്‍ത്തനങ്ങള്‍ കൊണ്ട് വിദ്യാര്‍ത്ഥികള്‍ക്ക് ആവേശമായി. കോളജിലേക്കുള്ള റോഡിലെ സീബ്രാ ലൈന്‍ വരയ്ക്കുക എന്ന ശ്രമകരമായ ദൗത്യമാണ് ക്യാമ്പിന്റെ ഭാഗമായി അവര്‍ ഏറ്റെടുത്തത്. പെയിന്റും ബ്രഷുമായി രാത്രി 10 മണിക്കു ശേഷം റോഡിലിറങ്ങിയ പെണ്‍കുട്ടികള്‍ക്കു പലര്‍ക്കും സന്തോഷം അടക്കാനായില്ല. രാത്രികള്‍ക്ക് സുരക്ഷയും ഉറപ്പുമുണ്ടെങ്കില്‍ ഏതു ജോലിയും ചെയ്തു കാണിക്കാമെന്ന ആവേശം മറ്റു ചിലര്‍ക്ക് . കൃത്യമായ അളവുകളില്‍ പെയ്ന്റടിച്ചതും അത് ഉണങ്ങും വരെ ട്രാഫിക്ക് ഗതാഗതം നിയന്ത്രിച്ചതും പെണ്‍കുട്ടികളായ എന്‍ എസ് എസ് വൊളണ്ടിയര്‍മാര്‍ തന്നെ. പിന്തുണയുമായി ഇരിഞ്ഞാലക്കുട ജനമൈത്രി പോലീസും ട്രാഫിക് പൊലീസും ഒപ്പമുണ്ടായിരുന്നു. എന്‍ എസ് എസ് പ്രോഗ്രാം ഓഫീസര്‍ അഞ്ജു ആന്റണി, വീണ സാനി,മിനി ജോസ്, ബിജോയ് പോള്‍, തിസ്‌ന ടി. ടി,അന്ന റോസ്, നയന ഫ്രാന്‍സിസ്, രാജശ്രീ ശശിധരന്‍, സാന്ദ്ര, അനഘ തുടങ്ങിയവര്‍ നേതൃത്വം നല്‍കി. മോട്ടിവേഷന്‍ ക്ലാസുകള്‍ക്കൊപ്പം ജൈവ നെല്‍കൃഷി പദ്ധതി ഉര്‍വ്വരതയ്ക്കു വേണ്ടിയുള്ള പ്രവര്‍ത്തനങ്ങളും ക്യാമ്പിന്റെ ഭാഗമായി നടന്നു.

മാപ്രാണം : ബസ് സ്റ്റോപ്പ് നിര്‍മ്മാണം നടത്തിയിട്ടും അന്യവാഹനങ്ങളുടെ പാര്‍ക്കിംങ്ങ് മൂലം പൊതുജനത്തിന് ഉപയോഗ്യമല്ലാതെയാവുകയാണ് മാപ്രാണം സെന്ററിലെ ആമ്പല്ലൂര്‍ ഭാഗത്തേയ്ക്കുള്ള ബസ് സ്റ്റോപ്പ്.മാപ്രാണം സെന്ററിലെ ഗതാഗത കുരുക്ക് കുറയ്ക്കുന്നതിനും ബസ് സ്റ്റോപ്പിലാത്തതിന്റെ പേരില്‍ സമിപത്തേ കടകള്‍ക്ക് മുന്നില്‍ യാത്രക്കാര്‍ കയറി നില്‍ക്കുകയാണെന്നുള്ള പരാതികള്‍ക്ക് അവസാനമാണ് മുന്‍ എം എല്‍ എയുടെ പ്രദേശികവികസന ഫണ്ട് ഉപയോഗിച്ച് സെന്ററില്‍ നിന്നും കുറച്ച് മാറി പുതിയ ബസ് സ്റ്റോപ്പ് നിര്‍മ്മിച്ചത്.എന്നാല്‍ ഉദ്ഘാടനം നടത്താതെ ഇട്ടിരുന്ന ബസ് സ്റ്റോപ്പ് പൊതുജനങ്ങള്‍ തുറന്ന് പ്രവര്‍ത്തനമാരംഭിക്കേണ്ട അവസ്ഥ വരെ ഇവിടെ ഉണ്ടായിരുന്നു.ഇപ്പോഴത്തേ പ്രധാന പ്രശ്‌നം അന്യവാഹനങ്ങളുടെ പാര്‍ക്കിംങ്ങാണ്.ബസ് സ്റ്റോപ്പിന് മുന്നില്‍ വാഹനങ്ങള്‍ പാര്‍ക്ക് ചെയ്ത് പോകുന്നതിനാല്‍ യാത്രക്കാര്‍ക്ക് ബസുകളിലേയ്ക്ക് കയറാന്‍ ഏറെ ബുദ്ധിമുട്ടുകയാണിവിടെ.മറ്റ് വാഹനങ്ങള്‍ കിടക്കുന്നതിനാല്‍ ബസുകള്‍ക്ക് ബസ് സ്‌റ്റോപ്പിലേയ്ക്ക് ബസ് നിര്‍ത്തുവാനും സാധിക്കുന്നില്ല.കൂടാതെ ബസ് സ്റ്റോപ്പിലിരിക്കുന്ന യാത്രക്കാര്‍ക്ക് ബസ് വരുന്നത് കാണുവാന്‍ തന്നേ സാധിക്കാത്ത വിധമാണ് വാഹനങ്ങള്‍ പാര്‍ക്കിംങ്ങ് നടത്തുന്നത്.സമീപത്തേ തിരക്കേറിയ തൃശ്ശൂര്‍- കൊടുങ്ങല്ലൂര്‍ സംസ്ഥാന പാതയില്‍ മാപ്രാണം സെന്ററിലെ സ്റ്റോപ്പ് മാറ്റി സ്ഥാപിക്കാന്‍ തീരുമാനിച്ചിട്ട് ഒരു വര്‍ഷവും സ്റ്റോപ്പ് നീക്കുന്നതിനാവശ്യമായ കാത്തിരിപ്പ് കേന്ദ്രം നിര്‍മ്മിച്ചുനല്‍കാന്‍ തയ്യാറായി ഇരിങ്ങാലക്കുട റോട്ടറി സെന്‍ട്രല്‍ ക്ലബ്ബ് രംഗത്തെത്തിയിട്ട് ആറുമാസവും കഴിഞ്ഞു.ദിനംപ്രതി വാഹനങ്ങള്‍ പെരുകികൊണ്ടിരിക്കുകയാണ്. മാപ്രാണം സെന്ററില്‍ അപകടങ്ങളും. ഈ സാഹചര്യത്തില്‍ സ്റ്റോപ്പുകള്‍ എത്രയും പെട്ടന്ന് മാറ്റാനുള്ള നടപടിയാണ് നഗരസഭ കൈകൊള്ളേണ്ടത്. സ്റ്റോപ്പ് നിര്‍മ്മിച്ചുനല്‍കാന്‍ തയ്യാറായി റോട്ടറി ക്ലബ്ബ് നഗരസഭ അധികാരികള്‍ക്ക് അപേക്ഷ നല്‍കിയിട്ടുണ്ട്. ബോര്‍ഡും കാത്തിരിപ്പുകേന്ദ്രവും തയ്യാറായാല്‍ തൊട്ടടുത്ത ദിവസം മുതല്‍ സ്റ്റോപ്പ് മാറ്റാന്‍ തയ്യാറാണെന്ന് പോലിസും പറയുന്നു. എന്നാല്‍ തീരുമാനം നടപ്പിലാക്കേണ്ട നഗരസഭ അലംഭാവം കാണിക്കുകയാണ്.ട്രാഫിക് പരിഷ്‌ക്കരണകമ്മിറ്റിക്ക് പുറമെ താലൂക്ക് വികസന സമിതിയും വിവിധ സംഘടനകളും സ്റ്റോപ്പ് മാറ്റം ആവശ്യപ്പെട്ടിരുന്നു. എന്നാല്‍ ആവശ്യം യാഥാര്‍ത്ഥ്യമാകുന്നില്ല.

ഇരിങ്ങാലക്കുട : മൂന്നാം വര്‍ഷ ഡിഗ്രി വിദ്യാര്‍ത്ഥികള്‍ക്കായി ഇരിങ്ങാലക്കുട സെന്റ് ജോസഫ്‌സ് കോളേജില്‍ 17/3/2018 ന് ക്യാമ്പസ് റിക്രൂട്ട്‌മെന്റ് നടത്തുന്നു. താല്‍പ്പര്യമുള്ളവര്‍ രണ്ട് ദിവസം മുമ്പ് തന്നെ ഓണ്‍ലൈന്‍ രജിസ്‌ട്രേഷന്‍ ചെയ്യണം. റിക്രൂട്ട്‌മെന്റ് ദിവസം രാവിലെ 9 ന് റിപ്പോര്‍ട്ട് ചെയ്യണം. 10 ന് ആണ് ടെസ്റ്റ് നടത്തുന്നത്.വിപ്രോ കമ്പനിക്കായി നടത്തുന്ന പ്രോഗ്രാമില്‍ സയന്‍സ്, കോമേഴ്‌സ്, ആര്‍ട്ട്‌സ് വിഷയങ്ങള്‍ പഠിയ്ക്കുന്ന എല്ലാവര്‍ക്കും പങ്കെടുക്കാമെന്ന് പ്രിന്‍സിപ്പാള്‍ അറിയിച്ചു.വിശദവിവരങ്ങള്‍ക്ക് കോളേജ് വെബ് സൈറ്റ് സന്ദര്‍ശിക്കുക.
www.st.josephs.edu.in
9349653312

ഇരിങ്ങാലക്കുട: കാട്ടൂര്‍ റോഡില്‍ നിന്നും ഇരിങ്ങാലക്കുട സ്റ്റാന്റിലേക്കുള്ള ഗതാഗതം ശനിയാഴ്ച മുതല്‍ 16 വരെ പൂര്‍ണ്ണമായും നിരോധിച്ചു. കാട്ടൂര്‍ റോഡില്‍ നിന്നും ബസ്സുകള്‍ സ്റ്റാന്റിലേക്ക് കയറുന്ന ഭാഗത്ത് ടൈല്‍സ് വിരിച്ച് കോണ്‍ക്രീറ്റിങ്ങ് ചെയ്യുന്ന പ്രവര്‍ത്തി നടക്കുന്നതിനാലാണ് ഇതുവഴിയുള്ള ഗതാഗതം നിരോധിക്കുന്നതെന്ന് നഗരസഭ അറിയിച്ചു. പോസ്റ്റാഫീസ് ജംഗ്ഷന്‍ മുതല്‍ സ്റ്റാന്റിലേക്ക് കയറുന്ന ഭാഗം വരെ നഗരസഭ ഗതാഗതം നിരോധിച്ചിരുന്നെങ്കിലും വടക്കുഭാഗത്തുനിന്നും വരുന്ന ബസ്സുകള്‍ ഇതുവഴി തന്നെയാണ് സ്റ്റാന്റിലേക്ക് കയറിയിരുന്നത്. ഇതിന് പുറമെ സ്വകാര്യ വാഹനങ്ങളും സ്റ്റാന്റുവഴി പോകാന്‍ തുടങ്ങിയത് ഏറെ അപകട സാധ്യത ഉയര്‍ത്തിയിരുന്നു. ഇതിനെ തുടര്‍ന്ന് സ്വകാര്യ വാഹനങ്ങള്‍ സ്റ്റാന്റുവഴി പോകാന്‍ അനുവദിക്കില്ലെന്ന് ട്രാഫിക് പോലിസ് വ്യക്തമാക്കിയിരുന്നെങ്കിലും നിര്‍ദ്ദേശം അത്രകണ്ട് പ്രാവര്‍ത്തികമായില്ല. ബസ് സ്റ്റാന്റിന്റെ കിഴക്കുഭാഗത്തുള്ള പോസ്റ്റാഫീസ് ജംഗ്ഷന്‍ മുതല്‍ ബസ് സ്റ്റാന്റിലേക്ക് കയറുന്ന ഭാഗം വരെയുള്ള റോഡില്‍ ടൈല്‍സ് വിരിക്കുന്നത് പുരോഗമിക്കുകയാണ്.

ഇരിങ്ങാലക്കുട : പുറമ്പോക്ക് അതിര്‍ത്തിപുനര്‍ നിര്‍ണ്ണയത്തിനും സംരക്ഷണത്തിനുമായി പൊതുമരാമത്ത് സബ് ഡിവിഷന്‍ ഓഫിസുകളിലും തദ്ദേശ സ്വയംഭരണ സ്ഥാപനങ്ങളിലും സര്‍വേയര്‍ തസ്തിക അനുവദിക്കണമെന്ന് ജോയിന്റ് കൗണ്‍സില്‍ മേഖലാ സമ്മേളനം പ്രമേയത്തിലൂടെ സര്‍ക്കാരിനോടാവശ്യപ്പെട്ടു.നിലവില്‍ താലൂക്ക് സര്‍വേയര്‍ ക്കാണ് അതിര്‍ത്തി പുനര്‍ നിര്‍ണ്ണയ ചുമതല.മുകുന്ദപുരം താലൂക്കിന് ഒരുസര്‍വേയര്‍ മാത്രമാണുളളത്. അതിര്‍ത്തി പുനര്‍നിര്‍ണ്ണയത്തിനായുള്ള പൊതുഅപേക്ഷകര്‍ക്ക് ഒരുവര്‍ഷത്തിലേറെ കാത്തിരിക്കേണ്ട സ്ഥിതിയാണിപ്പോ ഴുള്ളത്. റോഡുകളും തോടുകളും കുളങ്ങളും ഉള്‍പ്പടെ പുറമ്പോക്ക് അതിര്‍ത്തി പുനര്‍ നിര്‍ണ്ണയത്തിനായുള്ള അപേക്ഷകള്‍ ജില്ലാകളക്ടറുടെ പ്രത്യേക ഉത്തരവിന്‍ കീഴിലാണ് ഇപ്പോള്‍ തീര്‍പ്പാക്കപ്പെടുന്നത്.ജോലിത്തിരക്ക് മൂലം താലൂക്ക് സര്‍വേയറുടെ സേവനം സമയബന്ധിതമായി ലഭിക്കാത്തതിനാല്‍ പുറമ്പോക്ക് കുളങ്ങളുടെയുള്‍പ്പടെ യുള്ളവയുടെ അതിര്‍ത്തി പുനര്‍നിര്‍ണ്ണയിച്ച് നവീകരണം നടത്താന്‍ സാധിക്കാത്ത സ്ഥിതിയുണ്ട്.ഇത് വേനല്‍ക്കാലത്തെ കുടിവെള്ളക്ഷാമം രൂക്ഷമാക്കും.ഇതേ കാരണത്താല്‍ വിവിധങ്ങളായപദ്ധതി വിഹിങ്ങള്‍ ചെലവഴിക്കാന്‍ സാധിക്കാത്ത മുന്‍സിപ്പാലിറ്റികളും പഞ്ചായത്തുകളും ഏറെയാണ്. റോഡുകളുള്‍പ്പെടെയുളളവയുടെ ആസ്തി വിവരങ്ങള്‍ സബ്ഡിവിഷന്‍ ചെയ്ത് രേഖപ്പെടുത്തി സംരക്ഷിക്കാത്തതിനാല്‍ പുറമ്പോക്ക് അതിര്‍ത്തിയുമായി ബന്ധപ്പെട്ട സ്വകാര്യ തര്‍ക്കങ്ങളും വ്യവഹാരങ്ങളും മേഖലയില്‍ ഏറിവരുന്നതായും സമ്മേളനം വിലയിരുത്തി.
ജോയിന്റ് കൗണ്‍സില്‍ സംസ്ഥാന വൈസ് ചെയര്‍പേഴ്സണ്‍ ആര്‍.ഉഷ സമ്മേളനം ഉദ്ഘാടനം ചെയ്തു.മേഖലാ പ്രസിഡണ്ട് പി.കെ.ഉണ്ണികൃഷ്ണന്‍ അദ്ധ്യക്ഷത വഹിച്ചു.സെക്രട്ടറി എ.എം.നൗഷാദ് പ്രവര്‍ത്തനറിപ്പോര്‍ട്ടും ട്രഷറര്‍ കെ.ജെ.ക്ലീറ്റസ് വരവ്ചെലവ് കണക്കും അവതരിപ്പിച്ചു.സി.പി.ഐ മണ്ഡലം സെക്രട്ടറി പി.മണി,ജോയിന്റ് കൗണ്‍സില്‍ ജില്ലാ സെക്രട്ടറി എം.യു.കബീര്‍,സംസ്ഥാന കമ്മറ്റി അംഗം ടി.എസ്.സുരേഷ്,വനിതാകമ്മറ്റി സെക്രട്ടറി വി.വി.ഹാപ്പി, സംസ്ഥാന കൗണ്‍സില്‍ അംഗം എം.കെ.ഉണ്ണി, എന്‍.വി.നന്ദകുമാര്‍,പി.ബി.മനോജ്കുമാര്‍, സി.കെ.സുഷമ, ഇ.ജി.റാണി എന്നിവര്‍ സംസാരിച്ചു.

ഇരിങ്ങാലക്കുട : ലോകവൃക്കദിനത്തില്‍ ഇരിങ്ങാലക്കുടയിലെ രോഗബാധിതനായ തിലകന്‍ എന്ന യുവാവിന് സ്വന്തം വൃക്കദാനം ചെയ്ത സെന്റ് ജോസഫ് കോളേജിലെ ഹിന്ദി വിഭാഗം മേധാവി സി.റോസ് ആന്റോയ്ക്ക് പോലിസ് ഡിപാര്‍ട്ട്‌മെന്റിന്റെ ആദരം.ഇരിങ്ങാലക്കുട സബ് ഡിവിഷണല്‍ ട്രെയിനിംങ്ങ് സെന്ററില്‍ നടന്ന ചടങ്ങില്‍ തൃശൂര്‍ റൂറല്‍ ജില്ലാ പോലിസ് മേധാവി യതീഷ് ചന്ദ്ര ഐ പി എസ് ജീവകാരുണ്യത്തിന്റെ ഉത്തമപ്രതികമായി നിലകൊണ്ട സി.റോസ് ആന്റോയ്ക്ക് ആദരം കൈമാറി.വനിത സെല്‍ ഇന്‍സ്‌പെക്ടര്‍ പ്രസന്ന അമ്പൂരത്ത് അദ്ധ്യക്ഷത വഹിച്ച ചടങ്ങില്‍ സംസ്ഥാന പോലിസ് മെഡലിന് അര്‍ഹരായ വനിതാ പോലിസ് ഉദ്യോഗസ്ഥരെയും ആദരിച്ചു. ഡി വൈ എസ് പി ഫേമസ് വര്‍ഗ്ഗീസ്,ഇന്‍സ്‌പെക്ടര്‍ എം കെ സുരേഷ് കുമാര്‍,എസ് ഐ സുശാന്ത് കെ എസ്,രാധാകൃഷ്ണന്‍ കെ കെ,രാജു കെ പി,എസ് ഐമാരയ സാബ് എന്‍ ബി, ഉഷ പി ആര്‍ തുടങ്ങിയവര്‍ സംസാരിച്ചു.

ഇരിങ്ങാലക്കുട: 2017 -2018 അധ്യായന വര്‍ഷത്തിന്റെ സമാപ്തി കുറിച്ചുകൊണ്ട് നടന്ന അവാര്‍ഡ് ദാന ചടങ്ങില്‍ മുന്‍ റെക്ടറും മാനേജറും ആയിരുന്ന ഫാ.തോമസ് പൂവേലിക്കന്‍ അധ്യക്ഷനായിരുന്നു. ഈ വര്‍ഷം സുവര്‍ണ്ണ ജൂബിലിയുടെ നിറവില്‍ നില്‍ക്കുന്ന അദ്ദേഹത്തെ ചടങ്ങില്‍ ആദരിച്ചു. തദവസരത്തില്‍ പാഠ്യ- പാഠ്യേതര വിഷയങ്ങളില്‍ മികച്ച വിജയം കൈവരിച്ച വിദ്യാര്‍ത്ഥികളെ അനുമോദിക്കുകയും ട്രോഫികള്‍ വിതരണം ചെയ്യുകയും ചെയ്തു. റെക്ടറും മാനേജറുമായ ഫാ.മാനുവല്‍ മേവഡ, സെന്‍ട്രല്‍ സ്‌കൂള്‍ പ്രിന്‍സിപ്പാള്‍ ഫാ.മനു പീടികയില്‍, എല്‍.പി.സ്‌കൂള്‍ ഹെഡ്മിസ്ട്രസ്സ് സി.ഓമന, പി.ടി.എ. പ്രസിഡണ്ട് ടെല്‍സണ്‍ കോട്ടോളി, സ്റ്റാഫ് സെക്രട്ടറി ബിന്ദു സ്‌കറിയ എന്നിവര്‍ ചടങ്ങില്‍ സന്നിഹിതരായിരുന്നു.

ഇരിങ്ങാലക്കുട : വിവിധ ആളുകളില്‍ നിന്നും അരകോടിയോളം രൂപ തട്ടിയെടുത്ത കേസ്സില്‍ ‘ ഗുലുമാല്‍ മിലന്‍ ‘ എന്നറിയപ്പെടുന്ന മിലന്‍ 33 വയസ്സ് എന്നയാളെ ഇരിങ്ങാലക്കുട സി ഐ എം കെ സുരേഷ് കുമാര്‍, എസ് ഐ കെ എസ് സുശാന്ത് എന്നിവര്‍ അറസ്റ്റു ചെയ്തു.പട്ടേപ്പാടം സ്വദേശി പള്ളായി പീടികയില്‍ ഷംനാദിന്റെ പരാതിയെ തുടര്‍ന്നാണ് അറസ്റ്റ്.വെള്ളാങ്ങല്ലൂരില്‍ മെബൈല്‍ഷോപ്പ് നടത്തുന്ന ഷംനാദിനോട് വിദേശത്തു നിന്ന് വിലകൂടിയ വിദേശ നിര്‍മ്മിതമായ കമ്പ്യൂട്ടറും, അനുബന്ധ ഉപകരണങ്ങളും, മറ്റ് ഇലട്രോണിക്ക് ഉല്പനങ്ങളും ഇറക്കുമതി ചെയ്തു തരാമെന്നും, തനിക്ക് ബാഗ്ലൂരിലും,കോയമ്പത്തൂരിലും, ഡല്‍ഹിയിലും , ചെന്നൈയിലും വിദ്ദേശ ഇലട്രോണിക്ക് ഉല്പന്നങ്ങള്‍ ഇറക്കുമതി ചെയ്യുന്ന കമ്പനി സ്വന്തമായി ഉണ്ടെന്നും ,ഈ കമ്പനിയില്‍ പങ്കാളിത്തം തരാമെന്നും പറഞ്ഞാണ് പണം തട്ടിയെടുത്തത്.സമാന രീതിയില്‍ തട്ടിപ്പിനിരയാവര്‍ ഉണ്ടെങ്കില്‍ എത്രയും പെട്ടന്ന് പോലീസില്‍ പരാതി ഉടന്‍ നല്‍കേണ്ടതാണെന്ന് എസ് ഐ സുശാന്ത് പറഞ്ഞു.പ്രതി ഗുലുമാല്‍ മിലന്‍ പിടിയിലായതറിഞ്ഞ് തൃപ്രയാര്‍ , വാടാനപ്പിള്ളി, തളിക്കുളം , ചാവക്കാട് എന്നീ സ്ഥലങ്ങളില്‍ നിന്നും സമാന രീതിയില്‍ ലക്ഷങ്ങള്‍ തട്ടയെടുത്തതായി പുതിയ പരാതിക്കാര്‍ ഇരിങ്ങാലക്കുട പോലിസ് പരാതിയുമായി വന്നിട്ടുണ്ട്.കഴിഞ്ഞ വര്‍ഷം നവംബറിലാണ് കേസിനാസ്പതമായി പരാതി ഉണ്ടായത്. തുടര്‍ന്ന് നടത്തിയ അന്യേഷണത്തില്‍ പ്രതി തൃശ്ശൂര്‍ ജില്ലയിലെ വിയ്യൂര്‍, മണ്ണുത്തി തുടങ്ങിയ സ്റ്റേഷനുകളില്‍ തട്ടിപ്പു കേസ്സുകളില്‍ പെട്ടിട്ടുള്ളതായി മനസ്സിലായത് . 2014ല്‍ വിയ്യൂര്‍ പോലീസ് സ്റ്റേഷനില്‍ പ്രതിക്കെതിരെ 10 ലക്ഷം രുപ സമാന രീതിയില്‍ തട്ടിപ്പു കേസ്സില്‍ പെട്ട് ഒരു മാസത്തോളം ജയില്‍ ശിക്ഷ അനുഭവിച്ചിട്ടുണ്ട്. ഈ കേസ്സില്‍ ഇയാള്‍ ജാമ്യത്തിലാണ്.തട്ടിപ്പിലൂടെ ലഭിക്കുന്ന പണം ആര്‍ഭാട ജീവിതത്തിനും വിവിധ ടൂറിസ്റ്റ് കേന്ദ്രങ്ങള്‍ സന്ദര്‍ശിക്കുന്നതിനുമാണ് ഉപയോഗിക്കുന്നതെന്ന് പ്രതി പറഞ്ഞു.സാമ്പത്തിക കുറ്റകൃത്യങ്ങള്‍ അന്യേഷിക്കുന്നതിന് ഡി വൈ എസ് പി ഫേമസ് വര്‍ഗ്ഗീസിന്റെ നേതൃത്തത്തില്‍ രൂപീകരിച്ച പ്രത്യേക അന്യേഷണ സംഘത്തില്‍ എ എസ് ഐ മാരായ അനീഷ് കുമാര്‍, സിജുമോന്‍, സീനിയര്‍ സി പി ഓമാരായ സുജിത്ത് കുമാര്‍, മുരുകേഷ് കടവത്ത്,സി പി ഓമാരായ രാഗേഷ് പി ആര്‍, സുനില്‍ ടി എസ്. എന്നിവരാണ് ഉണ്ടായിരുന്നത്.