കരുവന്നൂര്‍ : തൃശ്ശൂര്‍ ഇരിങ്ങാലക്കുട സംസ്ഥാന പാതയില്‍ പഴയ മഹാലിംഗം ഓട്ടുകമ്പനിയ്ക്ക് മുമ്പിലുള്ള കനാലാണ് യാത്രക്കാര്‍ക്ക് അപകട കെണിയായി മാറിയിരിക്കുന്നത്.ആറാട്ടുപുഴയില്‍ നിന്നും പടിഞ്ഞാറന്‍ മേഖലയിലെ കാര്‍ഷിക ആവശ്യങ്ങള്‍ക്ക് വെള്ളം ലഭ്യമാക്കുന്നതിനായുള്ള കനാലാണിത്.10 മീറ്ററോളം ദൂരം മാത്രമാണ് കനാല്‍ സംസ്ഥാന പാതയിലൂടെ കടന്ന് പോകുന്നത്.കനാലും കലുങ്കും അടക്കം കുപ്പി കഴുത്ത് ആകൃതിയിലുള്ള ഇവിടെ കാല്‍നടയാത്രക്കാര്‍ക്ക് നടക്കാന്‍ ഒരിഞ്ചു സ്ഥലം പോലും റോഡില്‍ നിന്നും ബാക്കിയില്ലാത്ത അവസ്ഥയാണ്.റോഡിനോട് ചേര്‍ന്നുള്ള കനാല്‍ കാടുമൂടി കിടക്കുന്നതിനാലും മറ്റു സംരക്ഷണ ഭിത്തികളൊന്നുമില്ലാത്തതിനാലും പരിചിതരല്ലാത്ത യാത്രക്കാര്‍ ഇവിടെ അപകടത്തില്‍ പെടുന്നത് നിത്യ സംഭവമായി മാറിയിരിക്കുന്നു.കഴിഞ്ഞ ഒരു മാസത്തിനിടെ അഞ്ചോളം പേരാണ് കനാലില്‍ വീണ് പരിക്ക് പറ്റിയത്.കനാലിന് മുകളിലൂടെ സ്ലാബ് വിരിച്ച് കാല്‍നടയാത്രക്കാര്‍ക്ക് അപകട ഭീഷണി മാറ്റണെമന്നാണ് നാട്ടുക്കാരുടെ ആവശ്യം.
കരുവന്നൂര്‍ കാര്‍ ഇലട്രിക് പോസ്റ്റിലിടിച്ച് പോസ്റ്റ് ഒടിഞ്ഞു
കരുവന്നൂര്‍ : ചെവ്വാഴ്ച്ച രാത്രി കരുവന്നൂര്‍ സെന്റ് മേരീസ് ദേവാലയത്തിന് സമീപത്താണ് അപകടം നടന്നത്.ഇരിങ്ങാലക്കുട ഭാഗത്ത് നിന്നും വരുകയായിരുന്ന കാറ് നിയന്ത്രണം നഷ്ടപ്പെട്ട് സമീപത്തെ ഇലട്രിക് പോസ്റ്റിലിടിച്ച് കാനയിലേയ്ക്ക് വീഴുകയായിരുന്നു.ഇടിയുടെ ആഘാതത്തില്‍ പോസ്റ്റ് ഓടിഞ്ഞ് വീണു.ഇലട്രിക് പോസ്റ്റില്‍ ഈസമയം വൈദ്യൂതി ഉണ്ടായിരുന്നുവെങ്കില്ലും കാര്‍ യാത്രക്കാര്‍ അത്ഭുതകരമായി രക്ഷപെടുകയായിരുന്നു.കെ എസ് ഇ ബി ജീവനക്കാര്‍ ബുധനാഴ്ച്ച രാവിലെ സ്ഥലത്തെത്തി പോസ്റ്റ് മാറ്റിയിട്ട് വൈദ്യൂതി ബദ്ധം പുനസ്ഥാപിച്ചു.
വായനാപക്ഷാചരണത്തിന്റെ പന്ത്രണ്ടാം ദിനത്തില്‍ നടവരമ്പ ഗവ.എല്‍.സ്‌കൂളില്‍ ടെലിവിഷന്‍ ചാനല്‍ മാതൃകയില്‍ വാര്‍ത്താവതരണം
നടവരമ്പ്: വായനാ പക്ഷാചരണത്തിന്റെ പന്ത്രണ്ടാം ദിനത്തില്‍ ഗവ.എല്‍.സ്‌കൂളില്‍ ടെലിവിഷന്‍ ചാനല്‍ മാതൃകയില്‍ വാര്‍ത്താവതരണം നടത്തി. വിദ്യാര്‍ത്ഥികളായ ക്രിസ്റ്റന്‍ വര്‍ഗ്ഗീസ്, അദ്രിക സുമേഷ് എന്നിവരായിരുന്നു വാര്‍ത്താവതാരകര്‍. തുടര്‍ന്നു നടന്ന ‘ പുസ്തകപ്പെട്ടിയില്‍ എന്റെ കൂടി പുസ്തകം’ എന്ന പരിപാടിയില്‍ പുസ്തക വിജയിയ്ക്കും വാര്‍ത്താവതാരകര്‍ക്കും എം.എസ് ‘വിഷ്ണു പാരിതോഷികങ്ങള്‍ നല്‍കി അനുമോദിച്ചു.
ഇരിങ്ങാലക്കുടയില്‍ കഞ്ചാവുമായി വിദ്യാര്‍ത്ഥി പിടിയില്‍
ഇരിങ്ങാലക്കുട : ദിവസങ്ങള്‍ക്ക് മുന്‍പ് കഞ്ചാവും പരന്തിന് നഖവുമായി പിടിയിലായ കാട്ടൂര്‍ സ്വദേശിയില്‍ നിന്നുള്ള വിവരത്തിന്റെ അടിസ്ഥാനത്തില്‍ ഇരിങ്ങാലക്കുട എക്‌സൈസ് ഇന്‍സ്‌പെക്ടര്‍ എം ഓ വിനോദും സംഘവും നടത്തിയ പരിശോധനയിലാണ് കാട്ടൂര്‍ തിയ്യത്ത് പറമ്പില്‍ അനന്തു (19) വിന്റെ വീട്ടില്‍ നിന്നും 25 ഗ്രാം കഞ്ചാവും കഞ്ചാവ് വലിക്കുന്നതിനായി നിര്‍മ്മിച്ച ബോഗും കണ്ടെത്തിയത്.ഇരിങ്ങാലക്കുടയിലെ ഐ ടി സി വിദ്യാര്‍ത്ഥിയാണ് അനന്തു.ഇരിങ്ങാലക്കുടയില്‍ വിദ്യാര്‍ത്ഥികള്‍ക്കിടയില്‍ കഞ്ചാവ് ഉപയോഗം കൂടുന്നതായി അടുത്തിടെ നടന്ന അറസ്റ്റുകളില്‍ നിന്നും വ്യക്തമാണ്.വരും ദിവസങ്ങളില്‍ കൂടുതല്‍ പരിശോധനകള്‍ നടത്തുമെന്നും എസ് ഐ അറിയിച്ചു.എക്‌സൈസ് സംഘത്തില്‍ എ ഇ അനീഷ് കുമാര്‍,ടി എ ഷഫീക്ക്,ദി ബോസ്,എം എല്‍ റാഫേല്‍,എം എല്‍ ഗോവിന്ദന്‍ എന്നിവരാണ് ഉണ്ടായിരുന്നത്.
ഗാന്ധിഗ്രാം കോമ്പാറക്കാരന്‍ ജോര്‍ജ്ജ ഭാര്യ മേരി (മര്‍ഗലീത്ത 69) നിര്യാതയായി
ഇരിങ്ങാലക്കുട :ഗാന്ധിഗ്രാം കോമ്പാറക്കാരന്‍ ജോര്‍ജ്ജ് (റിട്ടയേര്‍ഡ് കെ എസ് ഇ ബി ഓവര്‍സീയര്‍) ഭാര്യ മേരി (മര്‍ഗലീത്ത 69) നിര്യാതയായി.സംസ്‌ക്കാരം ഇരിങ്ങാലക്കുട സെന്റ് തോമസ് കത്തീഡ്രല്‍ സെമിത്തേരിയില്‍ വച്ച് നടത്തപ്പെട്ടു.
മക്കള്‍-മേജി,മെന്‍സി,ജോബി
മരുമക്കള്‍-വര്‍ഗ്ഗീസ്,രാജു
കേന്ദ്ര സര്‍ക്കാരിന്റെ ജനദ്രേഹ നടപടികള്‍ അവസാനിപ്പിക്കുക : ഇരിങ്ങാലക്കുട ഏരിയ വനിതാ കര്‍ഷക കണ്‍വെന്‍ഷന്‍
ഇരിങ്ങാലക്കുട : റേഷന്‍ വെട്ടികുറയ്ക്കല്‍,പെട്രോളിയം വിലവര്‍ദ്ധന,പാചകവാതക വില വര്‍ദ്ധന തുടങ്ങിയ ജനദ്രേഹ നടപടികള്‍ കേന്ദ്ര സര്‍ക്കാര്‍ അവസാനിപ്പിക്കണമെന്ന് ഇരിങ്ങാലക്കുട ഏരിയ വനിതാ കര്‍ഷക കണ്‍വെന്‍ഷന്‍ ആവശ്യപ്പെട്ടു.സഹകരണ എ ആര്‍ ഓഫീസ് ഹാളില്‍ നടന്ന കര്‍ഷക കണ്‍വെന്‍ഷന്‍ കേരള കര്‍ഷക സംഘം ജില്ലാ എക്‌സിക്യൂട്ടിവ് അംഗം ടി കെ സുലേഖ ഉദ്ഘാടനം ചെയ്തു.സുനിത മനോജ് അദ്ധ്യക്ഷ വഹിച്ച യോഗത്തില്‍ ബീന രഘു,ഉഷ ഉണ്ണി,ടി ജി ശങ്കരനാരായണന്‍,പി വി ഹരിദാസ്,ടി എസ് സജീവന്‍ മാസ്റ്റര്‍,സുനിത ഭായ് പുഷ്പ്പന്‍ എന്നിവര്‍ സംസാരിച്ചു.
10 ലക്ഷം പേര്‍ക്ക് സൗജന്യ ഡിജിറ്റല്‍ സാക്ഷരതയ്ക്ക് അവസമൊരുക്കി ഭാരത് സേവക്‌സമാജ്
ഇരിങ്ങാലക്കുട- 2020 ല്‍ ഇന്ത്യയെ ഡിജിറ്റല്‍ സാക്ഷരത രാഷ്ട്രമായി പ്രഖ്യാപിക്കാന്‍ ലക്ഷ്യമിട്ടുകൊണ്ട് കേന്ദ്രഗവണ്‍മെന്റ് ഡിജിറ്റല്‍ ഇന്ത്യ എന്ന പദ്ധതി ആവിഷ്‌ക്കരിച്ച് നടപ്പാക്കുകയാണ്.14 വയസ്സു മുതല്‍ 60 വയസ്സ് വരെ പ്രായമുള്ളവരാണ് ഈ പദ്ധതിയില്‍ ഉള്‍പ്പെടുക.പ്രാഥമിക ഘട്ടത്തില്‍ 14 നും 17 നും മദ്ധ്യേ പ്രായമുള്ള കുട്ടികളെയാണ് പരിശീലനത്തിന് തെരഞ്ഞടുക്കുന്നത് .പ്രാഥമിക പരിശീലനത്തിന് ശേഷം ഓണ്‍ലൈന്‍ പരീക്ഷ നടത്തിയും വിജയികള്‍ക്ക് കേന്ദ്ര ഗവണ്‍മെന്റ് സര്‍ട്ടിഫിക്കറ്റ് നല്‍കുന്നതുമായിരിക്കും.പ്രവേശനം ,പരിശീലനം ,പരീക്ഷ എന്നിവ തികച്ചും സൗജന്യമാണ് .ഈ പ്രൊജക്ട് സൗത്ത് ഇന്ത്യയില്‍ എയിംസുമായി സഹകരിച്ചാണ് ഭാരത് സേവക് സമാജ് നടത്തുന്നത് .സ്‌കൂള്‍ ,കോളേജ് ,പഞ്ചായത്തുകള്‍ വഴി തെരഞ്ഞെടുക്കപ്പെടുന്നവര്‍ക്ക് ഭാരത് സേവക് സമാജിന്റെ ഇരിങ്ങാലക്കുട സെന്ററിന്റെ നേതൃത്വത്തില്‍ 1 ലക്ഷം പേര്‍ക്കാണ് ആദ്യ ഘട്ട പരിശീലനം നല്‍കുന്നത് .വാര്‍ത്താസമ്മേളനത്തില്‍ സെന്റര്‍ ഇന്‍ചാര്‍ജ്ജ് ദിവ്യ സിപ്‌സന്‍ ,കോ-ഓഡിനേറ്റര്‍ കെ ബി രതീഷ് ,ട്രയിനിംഗ് ഇന്‍ ചാര്‍ജ്ജ്് ജെയ്ന്‍ ജോസ് ,ആകാശ് സുരേഷ് തുടങ്ങിയവര്‍ പങ്കെടുത്തു
മിത്രഭാരതിയുടെ ആഭിമുഖ്യത്തില്‍ തിരുവാതിര ഞാറ്റുവേല 2018 സംഘടിപ്പിച്ചു.
ഇരിങ്ങാലക്കുട: മിത്രഭാരതി സോഷ്യല്‍ സര്‍വീസ് സൊസൈറ്റിയുടെ ആഭിമുഖ്യത്തില്‍ പൂമംഗലം പഞ്ചായത്തില്‍ തിരുവാതിര ഞാറ്റുവേല 2018 സംഘടിപ്പിച്ചു. ചടങ്ങില്‍ പൂമംഗലം പഞ്ചായത്തിലെ മികച്ച കര്‍ഷകരെയും വിവിധ മേഖലകളില്‍ കഴിവുതെളിയിച്ചവരെയും ആദരിച്ചു. മിത്രഭാരതി പ്രവര്‍ത്തകര്‍ തയ്യാറാക്കിയ മികച്ച ഫലവൃക്ഷതൈകളും, പൂമംഗലം കൃഷിഭവനുമായി സഹകരിച്ച് പച്ചക്കറി വിത്തും സൗജന്യമായി വിതരണം ചെയ്തു. പുത്തന്‍വീട്ടില്‍ കാര്‍ത്തികേയന്‍മാസ്റ്റര്‍ (ജാതി കര്‍ഷകന്‍), അണ്ടിക്കോട്ട് ശങ്കരനാരായണന്‍ (കേരകര്‍ഷകന്‍), പുത്തന്‍വീട്ടില്‍ മണി ( നെല്‍കര്‍ഷകന്‍), കാട്ടില്‍ വിജയന്‍ ( സമ്മിശ്രകൃഷി), മനോജ് ടി.ആര്‍. തുമ്പരത്തി (വാഴകൃഷി), മധു ചങ്ങനാന്ത്ര ( ക്ഷീരകര്‍ഷകന്‍), ഉഷ കരുമാന്ത്ര (ക്ഷീര കര്‍ഷക), കെ.എം. രാജവര്‍മ്മ ( കച്ചവടം പൊതുപ്രവര്‍ത്തകന്‍), അര്‍ജ്ജുന്‍ പണിക്കര്‍ (സിനിമ ബാലതാരം), മൃദുല്‍ മധു ( ഫുടബോള്‍ താരം) എന്നിവരെയാണ് ചടങ്ങില്‍ ആദരിച്ചത്. ചടങ്ങിന്റെ ഉദ്ഘാടനവും ആദരിക്കലും ബി ജെ പി മധ്യമേഖല സെക്രട്ടറി എ.ഉണ്ണികൃഷ്ണന്‍ നിര്‍വ്വഹിച്ചു. മിത്രഭാരതി സോഷ്യല്‍ സര്‍വീസ് സൊസൈറ്റി പ്രസിഡണ്ട് മനോജ് കല്ലിക്കാട്ട് അധ്യക്ഷത വഹിച്ചു. സെക്രട്ടറി ഷാന്റി കൈപറമ്പില്‍, ട്രഷറര്‍ എം.യു മനോജ് , വൈസ് പ്രസിഡണ്ട് പി.പരമേശ്വരന്‍, സുരേഷ് പാട്ടത്തില്‍, സുരേഷ് കുഞ്ഞന്‍, വി.ജി സ്നേഹന്‍, പ്രഭാത് വെള്ളാപ്പിള്ളി, വി.എസ് ഷൈജു എന്നിവര്‍ പ്രസംഗിച്ചു. ഇന്റഗ്രിറ്റി നിധി ലിമിറ്റഡ് എടക്കുളം ശാഖ മാനേജര്‍ സൈജു അരയം പറമ്പില്‍, കണ്ണന്‍ കോമ്പാത്ത്, മജ്നു പോട്ടില്‍, സി.വി.അജയകുമാര്‍,രാമദാസ് എളേടത്ത് തുടങ്ങിയവര്‍ നേതൃത്വം നല്‍കി. ഇന്റഗ്രിറ്റി നിധി ലിമിറ്റഡ് എടക്കുളം പ്രസിഡണ്ട് ധില്ലന്‍ അണ്ടിക്കോട്ട് സ്വാഗതവും സജീവ് കുമാര്‍ കുരിയക്കാട്ടില്‍ നന്ദിയും പറഞ്ഞു
ഇരിങ്ങാലക്കുടയ്ക്ക് നഷ്ടമായി ഒരു ടീച്ചര്‍ കൂടെ വിട പറയുന്നു.
ഇരിങ്ങാലക്കുട : നാഷണല്‍ ഹൈസ്‌കൂളിലെ മുന്‍ പ്രധാനാധ്യാപിക കല്യാണിക്കുട്ടി ടീച്ചര്‍ അന്തരിച്ചു.ടീച്ചറുടെ വിയോഗത്തില്‍ മുന്‍ തലമുറയിലെ അദ്ധ്യാപകരുടെ കണ്ണിയില്‍ ഒരാള്‍ കൂടെ വിട പറയുന്നു. മുന്‍ തലമുറ എന്ന് പറയുമ്പോള്‍ വിദ്യാര്‍ത്ഥികളെ മക്കളെ പോലെ സ്‌നേഹിക്കുന്ന അധ്യാപകര്‍, അധ്യാപകരെ ‘ ദൈവം താന്‍ ഗുരുനാഥനും’ എന്ന് വിചാരിച്ചു ബഹുമാനിക്കുന്ന വിദ്യാര്‍ഥികള്‍ – ഇതാണ് ഓര്‍മ വരുന്നത്. ‘ എനിക്ക് മൂന്നു ആണ്‍പിള്ളേരാ ….അത് കൊണ്ട് നിന്റെ വിളവ് എനിക്ക് പെട്ടെന്ന് മനസ്സിലാവും’ വികൃതി കാണിക്കുന്ന വിദ്യാര്‍ത്ഥികളോട് ടീച്ചര്‍ ഇത് പറയുമ്പോള്‍ ഒരു വാത്സല്യത്തിന്റെ രുചിയാണ് അവര്‍ക്കു കിട്ടുക. പിന്നെ അടിയറവു പറയുകയേ നിവൃത്തിയുള്ളു.എഴുപതുകളില്‍ നാഷണല്‍ സ്‌കൂളിലെ രണ്ടു അധ്യാപകരെയാണ് വിദ്യാര്‍ത്ഥികള്‍ ഭയപ്പെട്ടിരുന്നത്. ഗോപാലന്‍ മാഷും, കല്യാണിക്കുട്ടി ടീച്ചറും. ഗോപാലന്‍മാഷുടെ ചൂരല്‍ അന്ന് (കു) പ്രസിദ്ധമായിരുന്നു. പക്ഷെ ആ ചൂരല്‍ കൊണ്ട് ആര്‍ക്കെങ്കിലും തല്ലു കിട്ടിയതായി കേട്ടിട്ടില്ല. അതുപോലെ തന്നെ കല്യാണിക്കുട്ടി ടീച്ചറുടെ നോട്ടവും, പിച്ചലും. കണക്കു ടീച്ചറായിരുന്നു കല്യാണിക്കുട്ടി ടീച്ചര്‍. അവരുടെ ക്ലാസ്സില്‍ എല്ലാവര്ക്കും കണക്കു തന്നതാണ് വരും കാരണം ഒന്ന് ഭയം ( പക്ഷെ ആരെയെങ്കിലും ശിക്ഷിച്ചതായി കേട്ടിട്ടില്ല) അഥവാ ശിക്ഷിച്ചാല്‍ തന്നെ ‘അമ്മ ശിക്ഷിക്കുന്നതായേ കുട്ടികള്‍ എടുക്കു.ഇന്നത്തെ പോലെ കോടതിയും കേസും ഒന്നും പതിവില്ല. അന്നത്തെ തലമുറയുടെ ഗുണവും അത് തന്നെ ആയിരിക്കണം. രണ്ടാമത്തെ കാരണം ടീച്ചറുടെ പഠിപ്പിക്കാനുള്ള കഴിവ്. കണക്കിന്റെ അവസാന വാക്കായിരുന്നു ടീച്ചര്‍.മനസ്സിലായില്ലെങ്കില്‍ വീണ്ടും വീണ്ടും പറഞ്ഞുതരാനുള്ള ക്ഷമ. ഇന്ന് എത്ര ടീച്ചര്‍മാര്‍ക്ക് അതുണ്ട്? ഒരു തവണ പറയും പിന്നെ വേണമെങ്കില്‍ ട്യൂഷന്‍ക്ലാസ്സില്‍ പോകണം.നാഷണല്‍ സ്‌കൂള്‍ അന്ന് ആണ്‍കുട്ടികള്‍ക്ക് മാത്രമുള്ള സ്‌കൂള്‍ ആയിരുന്നു അതിനാല്‍ തന്നെ വികൃതികളുള്ള കുട്ടികളെ നയിക്കാന്‍ ടീച്ചറെ പോലെ കണിശക്കാരെ കൂടിയേ കഴിയു. എങ്കിലും ടീച്ചര്‍ക്ക് നേരെ ഒരു തര്‍ക്കുത്തരമോ പരാതിയോ ഉണ്ടായതായി അറിവില്ല. പുറമെ കണിശക്കാരിയാണെങ്കിലും വിദ്യാര്‍ത്ഥികളോടുള്ള മമത ആയിരിക്കാം ഇതിനു കാരണം. ഇതുപോലുള്ള ടീച്ചര്‍മാരും വിദ്യാര്‍ത്ഥികളുമാണ് ഇന്ന് വേണ്ടത് ഇരിഞ്ഞാലക്കുട ഏരേക്കത്തു കുടുംബാംഗമായ ടീച്ചര്‍ , പരേതനായ ബാങ്ക് ബറോഡ ഉദ്യോഗസ്ഥന്‍ കോപ്പുളില്‍ ബാലന്‍ മേനോന്റെ പത്‌നിയാണ്. രവി, കൃഷ്ണ കുമാര്‍,ശ്രീകുമാര്‍, മീന എന്നിവര്‍ മക്കളാണ്.മരുക്കള്‍ ബിന്ദു,രതി,ബിന്ദു,മുരളി. മുന്‍ ഐ സ് ആര്‍ ഓ ചെയര്‍മാന്‍ രാധാകൃഷ്ണന്റെ അമ്മായി ആണ്.സംസ്‌ക്കാരം ജൂലൈ 4ന് ഉച്ചതിരിഞ്ഞ് 3 മണിയ്ക്ക് വീട്ടുവളപ്പില്‍.
എഴുത്ത് : കെ. വി. മുരളി മോഹന്‍
ഇരിങ്ങാലക്കുട രൂപതയുടെയും ആനന്ദപുരം ചെറുപുഷ്പ ദേവാലയത്തിന്റെയും നേതൃത്വത്തില്‍ ‘സ്വപ്‌നഭവനം’
ആനന്ദപുരം:ഇരിങ്ങാലക്കുട രൂപതയുടെ റൂബി ജുബിലിയുടെയും ആനന്ദപുരം ചെറുപുഷ്പ ദേവാലയത്തിന്റെ നവതി മെമ്മോറിയലിന്റെയും ഭാഗമായി സാധുഭവന നിര്‍മ്മാണ പദ്ധതിയിലൂടെ ഇടവകയിലെ സെന്റ്. സെബാസ്റ്റ്യന്‍ യൂണിറ്റിലെ പടമാട്ടില്‍ ജോസഫ് സെബാസ്റ്റ്യന്റെ കുടംബത്തിന് നിര്‍മ്മിച്ച വീടിന്റെ വെഞ്ചിരിപ്പും താക്കോല്‍ ദാനവും അഭിവന്ദ്യ പിതാവ് മാര്‍ പോളി കണ്ണൂക്കാടന്‍ നിര്‍വഹിച്ചു.
2018 ഫെബ്രുവരി 28 ന് ഇടവക വികാരി ഫാ. ആന്‍ഡ്രൂസ് ചെതലന്‍ തറക്കല്ലിടല്‍ കര്‍മ്മം നിര്‍വഹിച്ച് ആരംഭിച്ച നിര്‍മ്മാണ പ്രവര്‍ത്തനങ്ങള്‍ അഞ്ചുമാസം കൊണ്ടാണ് 5 സെന്റില്‍ 600 Sq ല്‍ രണ്ട് കിടപ്പുമുറികളും അടുക്കളയും ഹാളും ഉള്‍പ്പടെയുള്ള വീട് പണിതീര്‍ത്തത്. ഇതിന് മുന്നില്‍ നിന്ന് നേത്യത്വം നല്‍കിയത് വികാരിയച്ചനും കണ്‍വീനര്‍ ജോണ്‍ ഇല്ലിക്കലും കൈക്കാരന്‍മാര്‍ മറ്റ് കമ്മറ്റി അഗംങ്ങളുമാണ്. ഇതിനായുള്ള പണം പൂര്‍ണ്ണമായും ഇടവകയിലെ നല്ലവരായ അംഗങ്ങളാണ് നല്‍കിയത്. 10 ലക്ഷം രൂപയോളം ചിലവ് വന്നിട്ടുണ്ട്
ആനന്ദപുരത്ത് വൃദ്ധയുടെ മാല പൊട്ടിച്ച് രക്ഷപ്പെട്ട യുവാവിനെ നാട്ടുക്കാര്‍ പിടികൂടി.
ആനന്ദപുരം : നമ്പ്യയംകാവില്‍ വൃദ്ധയുടെ മാല പെട്ടിച്ചു രക്ഷപെടാന്‍ ശ്രമിച്ച യുവാവിനെ നാട്ടുക്കാര്‍ പിടികൂടി പോലിസിലേല്‍പ്പിച്ചു.ആലപ്പുഴ കായംകുളം സ്വദേശി മുളയ്ക്കല്‍ തറയില്‍ അജാസ് (30) ആണ് പിടിയിലായത്.തിങ്കാളാഴ്ച്ച ഉച്ചതിരിഞ്ഞാണ് സംഭവം.നമ്പ്യയംകാവ് റോഡില്‍ പടന്ന കോളനിയ്ക്ക് സമീപം കടയില്‍ സോഡ കുടിയ്ക്കാനായി കയറിയ അജാസ് പെട്ടന്ന് മാല പൊട്ടിച്ച് കടന്നുകളയുകയായിരുന്നു.നേരെപറമ്പില്‍ പോളിന്റെ ഭാര്യ ഗ്ലേയ്‌സിയുടെ രണ്ട് പവന്‍ തൂക്കം വരുന്ന മാലയാണ് കവര്‍ന്നത്.ബഹളം കേട്ട് എത്തിയ നാട്ടുക്കാര്‍ അജാസിനെ പിന്‍തുടര്‍ന്നാണ് പിടികൂടിയത്.സ്വര്‍ണ്ണമാല അജാസില്‍ നിന്നും കണ്ടെടുത്തു.പോലീസ് സ്ഥലത്തെത്തി യുവാവിനെ കസ്റ്റഡിയില്‍ എടുത്ത് അറസ്റ്റ് രേഖപെടുത്തുകയായിരുന്നു.
സോഷ്യല്‍ ആക്ഷന്‍ ഫോറം വാര്‍ഷിക ജനറല്‍ബോഡി യോഗം സംഘടിപ്പിച്ചു.
ഇരിങ്ങാലക്കുട- ഇരിങ്ങാലക്കുട രൂപതയുടെ സാമൂഹ്യസേവന പ്രസ്ഥാവന സോഷ്യല്‍ ആക്ഷന്‍ ഫോറത്തിന്റെ വാര്‍ഷിക ജനറല്‍ബോഡി യോഗം ജൂണ്‍ 30ന് ഉച്ചകഴിഞ്ഞ് 2.30 ന് സോഷ്യല്‍ ഫോറം ഓഡിറ്റോറിയത്തില്‍ സംഘടിപ്പിച്ചു.പ്രസിഡന്റ് മോണ്‍ .ആന്റോ തച്ചിലിന്റെ അധ്യക്ഷത വഹിച്ചു.ചെയര്‍മാന്‍ മാര്‍ പോളി കണ്ണൂക്കാടന്‍ നിലവിളക്ക് കൊളുത്തി ഉദ്ഘാടനം ചെയ്തു.2017-18 വര്‍ഷത്തിലെ പ്രവര്‍ത്തന റിപ്പോര്‍ട്ട് എക്‌സിക്യൂട്ടീവ് ഡയറക്ടര്‍ ഫാ .വര്‍ഗ്ഗീസ് കോന്തുരുത്തി അവതരിപ്പിച്ചത് യോഗം പാസ്സാക്കി.വാര്‍ഷിക പ്രവര്‍ത്തന റിപ്പോര്‍ട്ട് എക്‌സിക്യൂട്ടീവ് അംഗം കെ കെ ഇട്ടിച്ചന് നല്‍കി മാര്‍ പോളി കണ്ണൂക്കാടന്‍ പ്രകാശനം ചെയ്തു.വരവു ചിലവു കണക്കുകള്‍ ഫൈനാന്‍സ് ഓഫീസര്‍ വി വി പോള്‍സണ്‍ അവതരിപ്പിച്ചു.2018-19 വര്‍ഷത്തില്‍ നടപ്പിലാക്കേണ്ട വിവിധ പ്രവര്‍ത്തനങ്ങളെക്കുറിച്ച് ചര്‍ച്ച ചെയ്ത് തീരുമാനിച്ചു.അസോസിയേറ്റ് ഡയറക്ടര്‍മാരായ ഫാ റോബിന്‍ പാലാട്ടി സ്വാഗതവും ഫാ .പീറ്റര്‍ കാച്ചപ്പിള്ളി നന്ദിയും പ്രകാശിപ്പിച്ചു.ആശാനിലയം സ്‌പെഷ്യല്‍ സ്‌കൂളിലെ വിദ്യാര്‍ത്ഥികള്‍ നിര്‍മ്മിച്ച കരകൗശലവസ്തുക്കളുടെ പ്രദര്‍ശനവും ഉണ്ടായിരുന്നു
കര്‍ഷകസഭകളുടെ ബ്ലോക്ക് തല ക്രോഡീകരണയോഗം സംഘടിപ്പിച്ചു.
ഇരിങ്ങാലക്കുട : ഞാറ്റുവേല കാലയളവില്‍ കൃഷിവകുപ്പിന്റെയും കൃഷിഭവനുകളുടെയും സേവനം താഴെതട്ടില്‍ ലഭ്യമാക്കുക എന്ന ഉദേശ്യത്തോടെ വാര്‍ഡ്തലത്തില്‍ കര്‍ഷകസഭകള്‍ സംഘടിപ്പിക്കുകയും കര്‍ഷകസഭകളില്‍ ഉയര്‍ന്ന് വന്ന ആശയങ്ങളും നിര്‍ദ്ദേശങ്ങളും കൃഷിവകുപ്പിന്റെ പദ്ധതി രൂപികരണത്തില്‍ സംയോജിപ്പിക്കുന്നതിന്റെ ഭാഗമായി ബ്ലോക്ക്തല ക്രോഡികരണയോഗം നടന്നു.ബ്ലോക്ക് പഞ്ചായത്ത് പ്രസിഡന്റ് വി എ മനോജ് കുമാറിന്റെ അദ്ധ്യക്ഷതയില്‍ ചേര്‍ന്ന യോഗം എം എല്‍ എ പ്രൊഫ. കെ യു അരുണന്‍ ഉദ്ഘാടനം ചെയ്തു.ചെയര്‍പേഴ്‌സണ്‍ നിമ്യ ഷിജു മുഖ്യാത്ഥിയായിരുന്നു.കൃഷി അസിസ്റ്റന്റ് ഡയറക്ടര്‍ ടി സുശില പദ്ധതി വിശദീകരണം നടത്തി.ജില്ലാപഞ്ചായത്ത് മെമ്പര്‍ ടി ജി ശങ്കരനാരായണന്‍,നഗരസഭ ആരോഗ്യകാര്യ സ്റ്റാന്റിംങ്ങ് കമ്മിറ്റി ചെയര്‍മാന്‍ അബ്ദുള്‍ ബഷീര്‍ എന്നിവര്‍ ആശംസകള്‍ നേര്‍ന്ന് സംസാരിച്ചു.പറപ്പൂക്കര കൃഷി ഓഫീസര്‍ അജിത് മോഹന്‍ സ്വാഗതം പറഞ്ഞ ചടങ്ങില്‍ കാറളം കഋഷി ഓഫീസര്‍ കുര്യാക്കോസ് എ ജെ നന്ദി പറഞ്ഞു.
ഇരിങ്ങാലക്കുടയില്‍ മുകുന്ദപുരം സപ്ലെ ഓഫിസറെ യൂത്ത് കോണ്‍ഗ്രസ് പ്രവര്‍ത്തകര്‍ ഉപരോധിച്ചു.
ഇരിങ്ങാലക്കുട : റേഷന്‍ കാര്‍ഡിനും, തിരുത്തലുകള്‍ക്കുമായി ഫോം സൗജന്യമായി ലഭ്യമാക്കത്തതില്‍ പ്രതിഷേധിച്ച് മുകുന്ദപുരം സപ്ലെ ഓഫിസറെ യൂത്ത് കോണ്‍ഗ്രസ് പ്രവര്‍ത്തകര്‍ ഉപരോധിച്ചു.സപ്ലൈ ഓഫീസുകളിലും പഞ്ചായത്തിലും സൗജന്യമായി അപേക്ഷ ഫോം ലഭ്യമാക്കണമെന്ന് മന്ത്രിയുടെ പ്രസ്താവനയ്ക്കു വിപരീതമായി അപേക്ഷ ഫോമിനുവേണ്ടി സ്വകാര്യ സ്ഥാപനങ്ങളെ സമീപിക്കാന്‍ നിര്‍ദ്ദേശിക്കുന്ന സമീപനമാണ് സപ്ലൈ ഓഫീസുകളില്‍ നടത്തുന്നത്. അപേക്ഷ ഫോമിനും എഴുത്തുഫീസുമായി 30 രൂപയോളമാണ് സ്വകാര്യ വ്യക്തികളും സ്ഥാപനങ്ങളും ഈടാക്കുന്നതെന്നരോപിച്ചാണ് ഉപരോധം നടത്തിയത്.സപ്ലെ ഓഫിസില്‍ എത്തുന്ന ജനങ്ങള്‍ക്ക് സ്വകാര്യ വ്യക്തികള്‍ പണം ഈടാക്കിയാണ് ഫോമിന്റെ ഫോട്ടോ സ്റ്റാറ്റ് കോപ്പി നല്‍കിയിരുന്നത്.ഉപരോധത്തെതുടര്‍ന്നുള്ള ധാരണ പ്രകാരം ആവശ്യക്കാര്‍ക്ക് ഫോമുകള്‍ പഞ്ചായത്തില്‍ നിന്ന് കൈപറ്റാന്‍ സംവിധാനം ഏര്‍പെടുത്താനും .താലൂക്കിലെത്തുന്നവര്‍ക്ക് ക്യുനില്‍ക്കാതെ ടോക്കണ്‍ എര്‍പ്പെടുത്തുന്നതിനും തീരുമാനമായി.യൂത്ത് കോണ്‍ഗ്രസ്സ് നേതാകളായ ധീരജ് തേറാട്ടില്‍, രാജു തളിയ പറമ്പില്‍, സ്റ്റാലിന്‍ വര്‍ഗ്ഗീസ്, വിനീഷ് തിരുക്കുളം,ടോം മാമ്പിള്ളി തുടങ്ങിയവര്‍ നേതൃത്വം നല്‍കി.
ഇരിങ്ങാലക്കുട കത്തിഡ്രല്‍ ഊട്ട് തിരുന്നാളിന് വന്‍ ജനാവലി.
ഇരിങ്ങാലക്കുട : സെന്റ് തോമസ് കത്തിഡ്രല്‍ വി.തോമാശ്ലിഹയുടെ ദുക്റാന ഊട്ട് തിരുന്നാളിന് വിശ്വസികളുടെ തിരക്ക്.രാവിലെ 7.30 ന് ഇരിങ്ങാലക്കുട രൂപതാ മെത്രാന്‍ മാര്‍ പോളി കണ്ണൂക്കാടന്‍ വി.കൂര്‍മ്പാനയ്ക്ക് നേതൃത്വം നല്‍കി.ഫാ.അനൂപ് കോലംങ്കണ്ണി,അജോ പുളിയ്ക്കന്‍ എന്നിവര്‍ സഹകാര്‍മ്മികത്വം വഹിച്ചു.ഡിജിറ്റല്‍ ലൈബ്രറിയുടെ വെഞ്ചരിപ്പ് ബിഷപ്പ് നിര്‍വഹിച്ചു.തുടര്‍ന്ന് എ കെ സി സിയുടെ നേതൃത്വത്തില്‍ ആയൂര്‍വേദ മെഡിയ്ക്കല്‍ ക്യാമ്പും സംഘടിപ്പിച്ചിരുന്നു.വിശ്വാസികളോട് തോമസ് ശ്ലിഹയുടെ പാത പിന്തുടര്‍ന്ന് വിശ്വാസം കാത്തുസൂക്ഷിച്ച് അടുത്ത തലമുറയ്ക്ക് കൈമാറണമെന്ന് ബിഷപ്പ് ആഹ്വാനം ചെയ്തു.തുടര്‍ന്ന് തിരുന്നാള്‍ ഊട്ട് വെഞ്ചരിപ്പ് നടന്നു.2018-2019 വര്‍ഷത്തേ കൈക്കാരന്‍മാരായി ജോണി പൊഴൊലിപറമ്പില്‍,ആന്റു ആലേങ്ങാടന്‍,ജെയ്‌സണ്‍ കരപറമ്പില്‍,അഡ്വ.വി സി വര്‍ഗ്ഗീസ് എന്നിവര്‍ ചുമതല ഏല്‍ക്കുകയും പഴയ കൈക്കാരന്‍മാര്‍ക്ക് യാത്രയപ്പ് നല്‍കുകയും ചെയ്തു.25000 പേര്‍ക്കാണ് ഊട്ട് സദ്യ ഒരുക്കിയിരുന്നത്.അസി.വികാരിമാരായ ഫാ.മില്‍ട്ടണ്‍ തട്ടില്‍,ഫെമിന്‍ ചിറ്റിലപ്പിള്ളി, ഫാ.ഷാബു പുത്തൂര്‍,തുടങ്ങിയവര്‍ നേതൃത്വം നല്‍കി.
അഭിമന്യുവിനെ കൊല ചെയ്തതില്‍ പ്രതിഷേധിച്ച് ഇരിങ്ങാലക്കുടയില്‍ ഡി.വൈ.എഫ്.ഐ. പ്രതിഷേധം.
ഇരിങ്ങാലക്കുട : എസ്.എഫ്.ഐ ഇടുക്കി ജില്ലാ കമ്മിറ്റി അംഗവും മഹാരാജാസ് കോളേജ് വിദ്യാര്‍ത്ഥിയുമായ അഭിമന്യുവിനെ കൊല ചെയ്തതില്‍ പ്രതിഷേധിച്ച് ഇരിങ്ങാലക്കുടയില്‍ ഡി.വൈ.എഫ്.ഐ. ബ്ലോക്ക് കമ്മിറ്റിയുടെ നേതൃത്വത്തില്‍ പ്രതിഷേധ പ്രകടനം നടത്തി. പ്രതിഷേധ യോഗം ഡി.വൈ.എഫ്.ഐ ജില്ലാ കമ്മിറ്റി അംഗം സി.ഡി.സിജിത്ത് ഉദ്ഘാടനം ചെയ്തു. ബ്ലോക്ക് സെക്രട്ടറി ആര്‍.എല്‍.ശ്രീലാല്‍, പ്രസിഡണ്ട് വി.എ.അനീഷ് എസ്.എഫ്.ഐ ഏരിയ സെക്രട്ടറി വിഷ്ണു പ്രഭാകരന്‍ എന്നിവര്‍ സംസാരിച്ചു. നേതാക്കളായ ആര്‍.എല്‍.ജീവന്‍ലാല്‍, പി.കെ.മനുമോഹന്‍, ഐ.വി.സജിത്ത്, കെ.വി.നന്ദന, എം.വി.ഷില്‍വി എന്നിവര്‍ പ്രകടനം നേതൃത്വം നല്‍കി.
ബോട്ടണിയില്‍ പി എച്ച് ഡി നേടി ആനന്ദപുരം സ്വദേശി ജയലക്ഷ്മി വിലാസ്.
ഇരിങ്ങാലക്കുട : കേരള യൂണിവേഴ്‌സിറ്റിയില്‍ നിന്നും ബോട്ടണിയില്‍ പി എച്ച് ഡി നേടി ആനന്ദപുരം സ്വദേശി ജയലക്ഷ്മി വിലാസ്.ഒറ്റപ്പാലം പവ്വത്ത് മോഹന്‍ലാലിന്റെയും ഉഷാ മോഹന്‍ലാലിന്റെയും മകളും ആനന്ദപുരം കൊറവങ്ങാട്ട് വിലാസിന്റെ ഭാര്യയുമാണ്.
ജൂണ്‍ 4 മുതല്‍ സംസ്ഥാനത്തെ ഓട്ടോറിക്ഷ-ടാക്‌സി-ലൈറ്റ് മോട്ടോര്‍ വാഹനതൊഴിലാളികള്‍ അനിശ്ചിതക്കാല പണിമുടക്കിലേക്ക്
ഇരിങ്ങാലക്കുട-ജൂലൈ 4 മുതല്‍ സംസ്ഥാന വ്യാപകമായി ഓട്ടോറിക്ഷ-ടാക്‌സി -ലൈറ്റ് മോട്ടോര്‍ വാഹനതൊഴിലാളികള്‍ അനിശ്ചിതക്കാലത്തേക്ക് പണിമുടക്കുന്നു.രാജ്യം ഭരിക്കുന്ന നരേന്ദ്രമോദി സര്‍ക്കാരിന്റെ തൊഴിലാളി ദ്രോഹ നിലപാടുകള്‍ക്കെതിരെയാണ് സമരം .സി .ഐ .ടി. യു,ഐ .എന്‍. ടി. യു. സി ,എ. ഐ ടി. യു .സി ,എസ്. ടി. യു,എച്ച്. എം. എസ്,ടി .യു. സി. ഐ ,യു. ടി. യു. സി ,കെ. ടി. യു സി ,ജെ .ടി യു തുടങ്ങിയ സംഘടനകളുടെ നേതൃത്വത്തിലുള്ള സംയുക്ത സമര സമിതിയാണ് സമരത്തിന് ആഹ്വാനം ചെയ്തിട്ടുള്ളത് .ജൂലൈ 3 അര്‍ദ്ദരാത്രി മുതല്‍ ആരംഭിക്കുന്ന സമരത്തില്‍ ഓട്ടോറിക്ഷ ,ടാക്‌സി ,ലൈറ്റ് മോട്ടോര്‍ വാഹനങ്ങളും സ്‌കൂള്‍ ട്രിപ്പ് വാഹനങ്ങളും ഉള്‍പ്പടെ നിരത്തിലിറക്കാതെ സമരത്തില്‍ അണിനിരക്കും
പേഷ്‌ക്കാര്‍ റോഡില്‍ മുണ്ടനാട് വീട്ടില്‍ രാധാകൃഷ്ണന്‍ നായരുടെ ഭാര്യ വെട്ടിയാട്ടില്‍ വിശാലാക്ഷി അമ്മ (85) അന്തരിച്ചു.
ഇരിങ്ങാലക്കുട: പേഷ്‌ക്കാര്‍ റോഡില്‍ മുണ്ടനാട് വീട്ടില്‍ രാധാകൃഷ്ണന്‍ നായരുടെ ഭാര്യ വെട്ടിയാട്ടില്‍ വിശാലാക്ഷി അമ്മ (85) അന്തരിച്ചു. മക്കള്‍: ഭാസ്‌ക്കരന്‍, ഹേമലത, ജയസൂര്യന്‍, ബാലസൂര്യന്‍. മരുമക്കള്‍: മായ, രാമചന്ദ്രന്‍, പ്രസന്ന, ലക്ഷ്മി. ശവസംസ്‌ക്കാരം ചൊവ്വാഴ്ച ഉച്ചക്ക് പന്ത്രണ്ടിന്.
ICWAI പരിക്ഷയില്‍ ദേശീയതലത്തില്‍ ഗോള്‍ഡ് മെഡല്‍ നേടീ ഇരിങ്ങാലക്കുടക്കാരി നിസി
ഇരിങ്ങാലക്കുട : ICWAI (സി എം എ)പരിക്ഷയില്‍ ‘ കോസ്റ്റ് ആന്റ് മനേജ്‌മെന്റ് ആഡിറ്റ് വിഷയത്തിലാണ് ഇരിങ്ങാലക്കുട കോമ്പാറ സ്വദേശി നിസി എം എ.ഗോള്‍ഡ് മെഡല്‍ കരസ്ഥമാക്കിയത്.ജൂലൈ 10ന് കൊല്‍ക്കട്ടയില്‍ നടക്കുന്ന ചടങ്ങില്‍ ഗോള്‍ഡ് മെഡല്‍ നല്‍കും. ഈസ്റ്റ് കോമ്പാറ മാത്തന്‍ച്ചിറ വീട്ടില്‍ ആന്റോ,ജെസി ദമ്പതികളുടെ മകളാണ് നിസി.ഉന്നതവിജയം കരസ്ഥമാക്കിയതറിഞ്ഞ് ഇരിങ്ങാലക്കുട നഗരസഭ ചെയര്‍പേഴ്‌സണ്‍ നിമ്യ ഷിജു,മുന്‍ കൗണ്‍സിലര്‍ ചാക്കോള,ചാക്കോ എന്നിവര്‍ വീട്ടിലെത്തി നിസിയെ അഭിനന്ദിച്ചു.
