ഇരിങ്ങാലക്കുട : ടി.ഡി.രാമകൃഷ്ണന്‍ എഴുതിയ സുഗന്ധി എന്ന ആണ്ടാള്‍ ദേവനായകി എന്ന നോവല്‍ ഭൂത-ഭാവി-വര്‍ത്തമാന കാലങ്ങളെ മിത്തുമായി കൂട്ടിയിണക്കി തികച്ചും വ്യത്യസ്തമായ വായനാനുഭവം പകരുന്ന കൃതിയാണെന്ന് ശ്രീ.ഒ.എ.സതീശന്‍ അഭിപ്രായപ്പെട്ടു. തമിഴ് ഈഴ പ്രസ്ഥാനങ്ങളുടേയും, ശ്രീലങ്കന്‍ ഭരണകൂടത്തിന്റേയും, മനുഷ്യാവകാശ ധ്വംസനങ്ങളുടേയും, സ്ത്രീ വിരുദ്ധതയുടേയും, ഫാസിസത്തിന്റേയും മുഖംമൂടികള്‍ വായനക്കാരുടെ മുന്നില്‍ അഴിച്ചുലക്കുകയാണ് നോവലിസ്റ്റ് ചെയ്തിരിക്കുന്നത്. ചുറ്റുപാടുകളോടുള്ള തന്റെ കലഹങ്ങളും പ്രതിഷേധങ്ങളുമാണ് എഴുത്തിലൂടെ താന്‍ തുറന്നു കാണിക്കുന്നതെന്ന് നോവലിസ്റ്റ് ടി.ഡി.രാമകൃഷ്ണന്‍ വായനക്കാരുടെ ചോദ്യങ്ങള്‍ക്ക് മറുപടിയായി പറഞ്ഞു. ഇരിങ്ങാലക്കുട എസ് എന്‍ പബ്ലിക് ലൈബ്രറി നടത്തിവരുന്ന നോവല്‍ സാഹിത്യയാത്രയില്‍ പതിനേഴാമത് നോവല്‍ അവതരണം നടത്തുകയായിരുന്നു ഒ.വിസതീശന്‍.രാജലക്ഷ്മി കുറുവത്ത് അദ്ധ്യക്ഷത വഹിച്ച ചടങ്ങില്‍ പി.കെ.ഭരതന്‍, സി.സുരേന്ദ്രന്‍, കെ.ഹരി, കേശവ്.ജി.കൈമള്‍, ജോസ് മഞ്ഞില, ഉണ്ണികൃഷ്ണന്‍ കിഴുത്താണി, മായ.കെ എന്നിവര്‍ സംസാരിച്ചു.

ഇരിങ്ങാലക്കുട:ദനഹാ തിരുന്നാളിന്റെ നഗരം ചുറ്റിയുള്ള പ്രദക്ഷിണത്തില്‍ ആയിരങ്ങള്‍ അണി ചേര്‍ന്നു.മുത്തുക്കുടകളും,പ്രാര്‍ത്ഥനാ ഗീതങ്ങളുമായി ഭക്തിനിര്‍ഭരമായും ,ചിട്ടയോടെയും രണ്ട് വരിയായി ഭക്തജനങ്ങള്‍ പ്രദക്ഷിണത്തില്‍ പങ്കുചേര്‍ന്നു.പ്രദക്ഷിണ വീഥിയുടെ ഇരുവശങ്ങളിലും പടക്കം പൊട്ടിച്ച്,വര്‍ണ്ണ ശോഭയാര്‍ന്ന പ്രകാശം തീര്‍ത്തും ജനങ്ങള്‍ പ്രദക്ഷിണത്തെ വരവേറ്റു.ചന്തക്കുന്ന് ,ചന്ദ്രിക ,മൈതാനം ,ആല്‍ത്തറ,ഠാണാവ് ,തെക്കേ അങ്ങാടി ,കിഴക്കേ അങ്ങാടി എന്നീ വഴിയിലൂടെയാണ് പ്രദക്ഷിണം കടന്നു പോയിക്കൊണ്ടിരിക്കുന്നത്..

ഇരിങ്ങാലക്കുട : ദനഹാതിരുന്നാളിന്റെ ഭാഗമായി ശനിയാഴ്ച്ച വൈകീട്ട് നടന്ന ദിവ്യബലിക്കുശേഷം രൂപം എഴുന്നള്ളിച്ചുവെക്കലും പള്ളിചുറ്റി പ്രദക്ഷിണവും നേര്‍ച്ചവെഞ്ചിരിപ്പും നടന്നു. പള്ളി ചുറ്റി പ്രദക്ഷിണത്തിലും രൂപം എഴുന്നള്ളിച്ചു വയ്പിലും ആയിരങ്ങള്‍ അണി ചേര്‍ന്നു. ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ ദിവ്യബലിയ്ക്ക് മുഖ്യകാര്‍മികത്വം വഹിച്ചു. വലിയങ്ങാടി, കുരിശങ്ങാടി, കാട്ടുങ്ങച്ചിറ എന്നീ വിഭാഗങ്ങളുടെ അമ്പെഴുന്നള്ളിപ്പുകള്‍ രാത്രി 12 ന് പള്ളിയിലെത്തി. കോമ്പാറ വിഭാഗത്തിന്റെ അമ്പെഴുന്നള്ളിപ്പ് രാത്രി എട്ടിന് ആരംഭിച്ച് 9.30 ന് പള്ളിയില്‍ സമാപിച്ചു.ഞായറാഴ്ച്ച രാവിലെ 10.30ന് നടക്കുന്ന തിരുനാള്‍ ദിവ്യബലിക്ക് ഇരിങ്ങാലക്കുട രൂപത വികാരി ജനറാള്‍ മോണ്‍. ലാസര്‍ കുറ്റിക്കാടന്‍ മുഖ്യകാര്‍മികത്വം വഹിച്ചു. ദീപിക ഫ്രണ്ട്സ് ക്ലബ് സംസ്ഥാന ഡയറക്ടര്‍ ഫാ. റോയ് കണ്ണന്‍ച്ചിറ തിരുനാള്‍ സന്ദേശം നല്‍കി.വൈകീട്ട് മൂന്നിന് ആരംഭിക്കുന്ന പ്രദക്ഷിണം ഏഴിനു പള്ളിയില്‍ സമാപിക്കും. തുടര്‍ന്ന് പരിശുദ്ധ കുര്‍ബാനയുടെ ആശീര്‍വാദം നടക്കും. തിരുനാളിനെത്തുന്നവര്‍ക്ക് അമ്പ് എഴുന്നള്ളിക്കുന്നതിനു പ്രത്യേക സംവിധാനം ഏര്‍പ്പെടുത്തിയിട്ടുണ്ട്.തിരുന്നാളിന്റെ തത്സമയ സംപ്രേഷണം രാവിലെ മുതല്‍ ഇരിങ്ങാലക്കുട ഡോട്ട്‌കോമില്‍ കാണാവുന്നതാണ്.

ഇരിങ്ങാലക്കുട: കത്തീഡ്രല്‍ പള്ളിയിലെ ചരിത്രപ്രസിദ്ധമായ പിണ്ടിപ്പെരുന്നാളിന്റെ ആഘോഷത്തിമിര്‍പ്പിലാണു നാടും നഗരവും. ആഹ്ലാദത്തിന്റെയും സന്തോഷത്തിന്റെയും ആത്മീയതയുടെയും ഇഴചേരലാണു ഇരിങ്ങാലക്കുടക്കാര്‍ക്കു പിണ്ടിപ്പെരുന്നാള്‍. നയനമനോഹരമായ ദീപാലങ്കാരങ്ങളില്‍ വീടുകളും സ്ഥാപനങ്ങളും മുങ്ങി. ക്രൈസ്തവ വീടുകള്‍ക്കും സ്ഥാപനങ്ങള്‍ക്കും മുന്നില്‍ മാനംമുട്ടെ ഉയരത്തിലുള്ള പിണ്ടികള്‍ കുത്തി അലങ്കരിച്ചു കഴിഞ്ഞു. വഴിവാണിഭക്കാര്‍ എല്ലാ റോഡുകളും കൈയടക്കികഴിഞ്ഞു. ജാതിമതഭേദമന്യേ എല്ലാ വിഭാഗം ജനങ്ങളും ഒന്നുചേരാനും ബന്ധങ്ങള്‍ ഊട്ടിയുറപ്പിക്കാനുമുള്ള അവസരം കൂടിയാണു പിണ്ടിപ്പെരുന്നാള്‍. പലഹാരപ്പണികള്‍ പൂര്‍ത്തിയാക്കി വീട്ടമ്മമാര്‍ ബന്ധുമിത്രാദികളെ വരവേല്‍ക്കാന്‍ തയാറായിക്കഴിഞ്ഞു. ഒട്ടേറെ പുതുമകളോടെയാണു കത്തീഡ്രല്‍ ദേവാലയത്തിലെ ഇത്തവണത്തെ ദീപാലങ്കാരം.ശനിയാഴ്ച്ച വൈകീട്ട് 4.30 ന് നടക്കുന്ന ദിവ്യബലിക്കുശേഷം രൂപം എഴുന്നള്ളിച്ചുവെക്കലും പള്ളിചുറ്റി പ്രദക്ഷിണവും നേര്‍ച്ചവെഞ്ചിരിപ്പും നടക്കും. ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിക്കും. വലിയങ്ങാടി, കുരിശങ്ങാടി, കാട്ടുങ്ങച്ചിറ എന്നീ വിഭാഗങ്ങളുടെ അമ്പെഴുന്നള്ളിപ്പുകള്‍ രാത്രി 12 ന് പള്ളിയിലെത്തും. കോമ്പാറ വിഭാഗത്തിന്റെ അമ്പെഴുന്നള്ളിപ്പ് രാത്രി എട്ടിന് ആരംഭിച്ച് 9.30 ന് പള്ളിയില്‍ സമാപിക്കും.ഞായറാഴ്ച്ച രാവിലെ 10.30ന് നടക്കുന്ന തിരുനാള്‍ ദിവ്യബലിക്ക് ഇരിങ്ങാലക്കുട രൂപത വികാരി ജനറാള്‍ മോണ്‍. ലാസര്‍ കുറ്റിക്കാടന്‍ മുഖ്യകാര്‍മികത്വം വഹിക്കും. ദീപിക ഫ്രണ്ട്‌സ് ക്ലബ് സംസ്ഥാന ഡയറക്ടര്‍ ഫാ. റോയ് കണ്ണന്‍ച്ചിറ തിരുനാള്‍ സന്ദേശം നല്‍കും. വൈകീട്ട് മൂന്നിന് ആരംഭിക്കുന്ന പ്രദക്ഷിണം ഏഴിനു പള്ളിയില്‍ സമാപിക്കും. തുടര്‍ന്ന് പരിശുദ്ധ കുര്‍ബാനയുടെ ആശീര്‍വാദം നടക്കും. കത്തീഡ്രല്‍ സിഎല്‍സിയുടെ ആഭിമുഖ്യത്തില്‍ ഏറ്റവും ഉയരം കൂടിയ പിണ്ടിക്കും കെ സി വൈ എമ്മിന്റെ നേതൃത്വത്തില്‍ ഏറ്റവും കൂടുതല്‍ ഭംഗിയുള്ള അലങ്കാരപിണ്ടിക്കും മത്സരം നടത്തുന്നുണ്ട്. 150 ഓളം പിണ്ടികളാണു മത്സരത്തില്‍ രജിസ്റ്റര്‍ ചെയ്തിരിക്കുന്നത്. തിരുനാളിനെത്തുന്നവര്‍ക്ക് അമ്പ് എഴുന്നള്ളിക്കുന്നതിനു പ്രത്യേക സംവിധാനം ഏര്‍പ്പെടുത്തിയിട്ടുണ്ട ്. ക്രമ സമാധാന പാലനത്തിനും ഗതാഗത നിയന്ത്രണത്തിനും വിപുലമായ ക്രമീകരണങ്ങളാണു പോലീസിന്റെ നേതൃത്വത്തില്‍ സജ്ജമാക്കിയിട്ടുള്ളത്.

ഇരിങ്ങാലക്കുട : ദനഹാ തിരുനാളിനോടനുബന്ധിച്ച് നടക്കുന്ന വലിയങ്ങാടി അമ്പ് ഫെസ്റ്റിവലിന്റെ ഭാഗമായുള്ള ബഹുനില അലങ്കാര ഗോപുരത്തിന്റെ സ്വിച്ച് ഓണ്‍ കര്‍മ്മം ഇരിങ്ങാലക്കുട എം.എല്‍.എ കെ.യു. അരുണന്‍ മാസ്റ്റര്‍ നിര്‍വ്വഹിച്ചു. സ്ട്രീറ്റ് ഇല്ല്യൂമിനേഷന്‍ സ്വിച്ച് ഓണ്‍ കര്‍മ്മം നഗരസഭാ ചെയര്‍പേഴ്‌സണ്‍ നിമ്യ ഷിജുവും ആശിര്‍വാദകര്‍മം ഫാ. ജോണ്‍ പാലിയേക്കരയും നിര്‍വഹിച്ചു.വലിയങ്ങാടി അമ്പ് ഫെസ്റ്റിവലിന്റെ ഭാഗമായി ഠാണാ മുതല്‍ ബസ് സ്റ്റാന്‍ഡ് വരെ മെയിന്‍ റോഡില്‍ ബള്‍ബ് കൊണ്ട് അലങ്കരിക്കുകയും 50 അടിയിലും ഉയരത്തില്‍ അലങ്കാര ഗോപുരവും നിര്‍മ്മിച്ചിട്ടുണ്ട്. വലിയങ്ങാടി അമ്പ് ഫെസ്റ്റിവല്‍ ജനുവരി 6 ന് വൈകീട്ട് 7ന് എം പി ഇന്നസെന്റ് ഉദ്ഘാടനം ചെയ്യും.തുടര്‍ന്ന് സ്ട്രീറ്റ് ഫെസ്റ്റിവലും അരങ്ങേറും.

ഇരിങ്ങാലക്കുട : അഖിലേന്ത്യ അന്തര്‍സര്‍വകലാശാല വനിത ബാസ്‌കറ്റ്‌ബോള്‍ ചാമ്പ്യന്‍ഷിപ്പില്‍ ഇരിങ്ങാലക്കുട സെന്റ് ജോസഫ്‌സ് കോളജ് കിരീടം ചൂടി. മത്സരത്തില്‍ ഭാരതിയാര്‍ യൂണിവേഴ്‌സിറ്റിയെ പരാജയപ്പെടുത്തി നേടിയ വിജയത്തില്‍ അഞ്ചു താരങ്ങളും ടീം മാനേജരും കോച്ചും സെന്റ് ജോസഫ്‌സ് കോളജിന്റെ സ്വന്തമായിരുന്നു. ടീം മാനേജര്‍ തുഷാര ഫിലിപ്പ്, കോച്ച് പി.സി. ആന്റണി, വിമ്മി വര്‍ക്കി, കെ.സി. ലിതാര, അലീന സെബി, സ്‌നേഹ സെബാസ്റ്റ്യന്‍ എന്നിവരാണു കലാലയത്തിന്റെ അഭിമാനങ്ങളായി മാറിയത്. യൂണിവേഴ്‌സിറ്റിയില്‍ വോളിബോളിലും ബാസ്‌കറ്റ് ബോളിലും സ്ഥിരം കുത്തക നിലനിര്‍ത്തുകയാണു ഡോ. സ്റ്റാലിന്‍ റാഫേല്‍ നേതൃത്വം നല്‍കുന്ന കായിക വിഭാഗം. പ്രിന്‍സിപ്പലും അധ്യാപകരും റെയില്‍വേ സ്റ്റേഷനില്‍ ചെന്ന് താരങ്ങളെ ആനയിച്ചു. തുടര്‍ന്ന് കലാലയത്തില്‍ അനുമോദനയോഗം നടന്നു. സിസ്റ്റര്‍ ക്രിസ്റ്റി, ഡോ. സ്റ്റാലിന്‍ റാഫേല്‍, ചീഫ് കോച്ച് പി.സി. ആന്റണി, മാനേജര്‍ തുഷാര, അശ്വതി ജയശങ്കര്‍, ഡോ. കെ.എല്‍. മനോജ്, യൂണിയന്‍ ചെയര്‍പേഴ്‌സണ്‍ നസ്‌റിന്‍ എന്നിവര്‍ പ്രസംഗിച്ചു.

ഇരിങ്ങാലക്കുട : ദനഹതിരുന്നാളിനോട് അനുബദ്ധിച്ച് സെന്റ് തോമസ് കത്തിഡ്രല്‍ ദേവാലയത്തിലെ ദീപാലങ്കാരം സ്വീച്ച് ഓണ്‍ ചെയ്തു.ഇരിങ്ങാലക്കുട ഡി വൈ എസ് പി ഫേമസ് വര്‍ഗ്ഗീസ് സ്വീച്ച് ഓണ്‍ നിര്‍വഹിച്ചു.കത്തിഡ്രല്‍ വികാരി ഫാ.ആന്റു ആലപ്പാടന്‍ അദ്ധ്യക്ഷത വഹിച്ചു.യോഗത്തില്‍ ഇലുമിനേഷന്‍ കണ്‍വീനര്‍ ഷാജു പാറേക്കാന്‍ സ്വഗതവും തിരുന്നാള്‍ കമ്മിറ്റി ജനറല്‍ കണ്‍വീനര്‍ സിജു എടത്തിരുത്തിക്കാരന്‍ നന്ദിയും പറഞ്ഞു.അസി.വികാരിമാരായ ഫാ.ടിനോ മേച്ചേരി,ഫാ.ലിജോണ്‍ ബ്രഹ്മകുളം,ഫാ.അജോ പുളിക്കന്‍ എന്നിവരും പള്ളി ട്രസ്റ്റിമാരായ പ്രൊഫ.ഇ ടി ജോണ്‍ ഇല്ലിക്കല്‍,റോബി കാളിയങ്കര,ലോറന്‍സ് ആളൂക്കാരന്‍,ഫ്രാന്‍സിസ് കോക്കാട്ട് എന്നിവര്‍ നേതൃത്വം നല്‍കി. പൂര്‍ണ്ണമായും ഡിജിറ്റലായാണ് ഇത്തവണ ദീപാലങ്കാരം ഒരുക്കിയിരിക്കുന്നത്.ജനുവരി 6 ാംതിയ്യതി വൈകീട്ട് 4.30 ന് മാര്‍ പോളി കണ്ണൂക്കാടന്റെ മുഖ്യകാര്‍മ്മികത്വത്തില്‍ ലദീഞ്ഞ്, പ്രസുദേന്തി വാഴ്ച്ച , ആഘോഷമായ പൊന്തിഫിക്കല്‍ ദിവ്യബലി, നൊവേന, പള്ളി ചുറ്റി പ്രദക്ഷിണം, രൂപം എഴുന്നള്ളിക്കല്‍, നേര്‍ച്ചവെഞ്ചിരിപ്പ് എന്നിവയുണ്ടായിരിക്കും. തിരുനാള്‍ ദിനമായ 7 ാം തിയ്യതി ഞായറാഴ്ച രാവിലെ 10 മണിയോടെ ആഘോഷമായ തിരുനാള്‍ കുര്‍ബാനയ്ക്കു രൂപത വികാരി ലാസര്‍ കുറ്റിക്കാടന്‍ മുഖ്യ കാര്‍മ്മികത്വം വഹിക്കും. റൂബി ജൂബിലിയോടനുബന്ധിച്ച് കത്തീഡ്രല്‍ ഗായകസംഘത്തിന്റെ നേതൃത്വത്തില്‍ 40 അംഗ ഗായകസംഘമായിരിക്കും തിരുനാള്‍ കുര്‍ബാനയ്ക്കു ഗാന ശുശ്രുഷ നിര്‍വ്വഹിക്കുന്നത്.ഉച്ചകഴിഞ്ഞ് 3 മണിക്ക് തിരുനാള്‍ പ്രദക്ഷിണം ആരംഭിച്ച് വൈകീട്ട് 7.00 മണിക്ക് പള്ളിയില്‍ എത്തിച്ചേരും. തുടര്‍ന്ന് പരിശുദ്ധ കുര്‍ബാനയുടെ ആശീര്‍വാദം. ജനുവരി 9 തിങ്കളാഴ്ച്ച മരിച്ചവരുടെ ഓര്‍മ്മദിനമായി ആചരിക്കുന്നു. ദനഹാത്തിരുനാളിന്റെ തത്സമയ സംപ്രേക്ഷണം ഇരിങ്ങാലക്കുട ഡോട്ട് കോമില്‍ തിരുന്നാള്‍ തത്സമയ സംപ്രേഷണം ഉണ്ടായിരിക്കുന്നതാണ്.

ഇരിങ്ങാലക്കുട: നിര്‍ധനരായ രോഗികളെ സഹായിക്കാന്‍ തുക കണ്ടെത്തുവാനായി ഐ പി എല്‍ ക്രിക്കറ്റ് നടത്തി മാതൃകയാകുകയാണ് ഇരിങ്ങാലക്കട ലോര്‍ഡ്‌സ് ക്ലബ്. ടൂര്‍ണ്ണമെന്റിലുടെ കിട്ടിയ തുക 33 നിര്‍ധന കടുംബങ്ങളിലെ രോഗികള്‍ക്ക് ഇരിങ്ങാലക്കുട മുനിസിപ്പല്‍ ചെയര്‍പേഴ്‌സണ്‍ നിമ്യാഷിജു വിതരണം ചെയ്തു. ചടങ്ങില്‍ കൗണ്‍സിലര്‍ സോണിയ ഗിരി, പ്രസിഡണ്ട് രഞ്ജിത്ത് മേനോന്‍ , സെക്രട്ടറി ഉണ്ണി എന്നിവര്‍ സംസാരിച്ചു. കഴിഞ്ഞ 5 വര്‍ഷമായി ക്രിക്കറ്റ് ടൂര്‍ണ്ണമെന്റ് നടത്തി 15 ലക്ഷത്തിലധികം രൂപ നിര്‍ധനരായ രോഗികള്‍ക്ക് ചികിത്സാ ഇനത്തില്‍ സഹായിച്ചിട്ടുണ്ട്. പ്രസിഡണ്ട് രഞ്ജിത്ത് മേനോന്‍. സെക്രട്ടറി ഉണ്ണി തുടങ്ങിയവരുടെ നേതൃത്വത്തില്‍ 30 ഓളം ചെറുപ്പക്കാരാണ് ചാരിറ്റി പ്രവര്‍ത്തനങ്ങള്‍ നടത്തുന്നത്. രാത്രി ഫ്‌ലഡ് ലൈറ്റിലാണ് മത്സരങ്ങള്‍ നടക്കുന്നത്. 6 ഓവറാണ് മത്സരം കേരളത്തിലെ വിവിധ ടീമുകള്‍ പങ്കെടുത്ത ടൂര്‍ണ്ണമെന്റില്‍ തൃശൂര്‍ എ വണ്‍ സ്റ്റാര്‍ ചാമ്പ്യന്മാരായി. ചികിത്സാ സഹായ രംഗത്ത് വേറിട്ട രീതിയില്‍ തുക സ്വരൂപിച്ച് മാതൃക കാട്ടുകയാണ് ലോര്‍ഡ്‌സ് ക്ലബിലെ ചെറുപ്പക്കാര്‍.

ഇരിങ്ങാലക്കുട: സംസ്ഥാന സ്‌കൂള്‍ കലോത്സവത്തിന് കൃഷി വകുപ്പിന്റെ നേതൃത്വത്തില്‍ വിഷരഹിത പച്ചക്കറികള്‍ നല്‍കി. ഇരിങ്ങാലക്കുട ബ്ലോക്ക് പരിധിയിലെ ആറ് കൃഷി ഭവനുകളില്‍ നിന്നും ശേഖരിച്ച പച്ചക്കറികള്‍ കലോത്സവ നഗരിയിലേക്ക് അയച്ചു. ഇരിങ്ങാലക്കുട കൃഷി അസി. ഡയറക്ടറുടെ ഓഫീസ് പരിസരത്ത് നടന്ന പരിപാടിയില്‍ പച്ചക്കറി കയറ്റിയ വാഹനം പ്രൊഫ. കെ.യു. അരുണന്‍ എം.എല്‍.എ. ഫല്‍ഗ് ഓഫ് ചെയ്തു. ബ്ലോക്ക് പ്രസിഡന്റ് വി.എ. മനോജ്കുമാര്‍ അധ്യക്ഷനായിരുന്നു. കൃഷി അസിസ്റ്റന്റ് ഡയറക്ടര്‍ സുശീല ടി., കൃഷി വകുപ്പ് ഉദ്യോഗസ്ഥര്‍, അഗ്രോ സര്‍വ്വീസ് സെന്റര്‍ ഭാരവാഹികള്‍ എന്നിവര്‍ പങ്കെടുത്തു.