ഇരിങ്ങാലക്കുട: പടിയൂര്‍ മൂഞ്ഞനാടിലെ പൊതുടാപ്പില്‍ ആഴ്ചയില്‍ നാല് ദിവസം കൂടുമ്പോള്‍ വെള്ളമെത്തിക്കാമെന്ന് വാട്ടര്‍ അതോററ്റിയും പടിയൂര്‍ പഞ്ചായത്തും. പെര്‍മിനന്റ് ലോക് അദാലത്തില്‍ മുഞ്ഞനാട് കളപ്പുരയ്ക്കല്‍ ശശീധരന്‍ കെ.ജി. നല്‍കിയ പരാതിയുടെ ഉത്തരവ് നടത്തികിട്ടുന്നതിനായി ഇരിങ്ങാലക്കുട മുന്‍സിഫ് കോടതി മുമ്പാകെ വിധി നടത്ത് ഹര്‍ജി നല്‍കിയിരുന്നു. ഇതിനെ തുടര്‍ന്ന് ഇരിങ്ങാലക്കുട മീഡിയേഷന്‍ സബ് സെന്ററില്‍ നടന്ന ഒത്തുതീര്‍പ്പ് ചര്‍ച്ചയിലാണ് നാല് ദിവസത്തിലൊരിക്കല്‍ വെള്ളമെത്തിക്കാമെന്ന് വാട്ടര്‍ അതോററ്റിയും പടിയൂര്‍ പഞ്ചായത്തും രേഖാമൂലം സമ്മതിച്ചത്. കുടിവെള്ളക്ഷാമം രൂക്ഷമായ മുഞ്ഞനാട് ഭാഗത്ത് വര്‍ഷങ്ങള്‍ക്ക് മുമ്പ് സ്ഥാപിച്ച പൊതുടാപ്പില്‍ ഇതുവരേയും വെള്ളമെത്തിയിരുന്നില്ല. ഇതിനെ തുടര്‍ന്നാണ് 2011 മുതല്‍ ശശീധരന്‍ പെര്‍മിനന്റ് ലോക് അദാലത്തിനെ സമീപിച്ചത്. പരാതി പരിശോധിച്ച അദാലത്ത് പഞ്ചായത്തിനേയും കൂടി ഉള്‍പ്പെടുത്തി നടപടിയെടുക്കണമെന്ന് നിര്‍ദ്ദേശിച്ചിരുന്നു. 2012ല്‍ പെര്‍മിനന്റ് ലോക് അദാലത്ത് 18 മാസത്തിനകം വാട്ടര്‍ അതോററ്റിയും പഞ്ചായത്തും ചേര്‍ന്ന് പ്രദേശത്തെ കുടിവെള്ള പ്രശ്നം പരിഹരിക്കണമെന്ന് ഉത്തരവിട്ടെങ്കിലും നടപടി ഉണ്ടായില്ല. തുടര്‍ന്നാണ് വിധി നടപ്പിലാക്കി കിട്ടാന്‍ ശശീധരന്‍ ഇരിങ്ങാലക്കുട മുന്‍സിഫ് കോടതിയെ സമീപിച്ചത്. ഇരിങ്ങാലക്കുട മീഡിയേഷന്‍ സബ്ബ് സെന്ററില്‍ ഇരുവിഭാഗങ്ങളും നടത്തിയ ചര്‍ച്ചയില്‍ കുടിവെള്ളം ലഭ്യമാക്കാമെന്ന ധാരണയില്‍ ഇരുവിഭാഗങ്ങളും ഒപ്പുവെച്ചു. ധാരണ പ്രകാരം ശശീധരനും പരിസരവാസികള്‍ക്കും നാല് ദിവസത്തിലൊരിക്കല്‍ പൊതുടാപ്പ് വഴി ശുദ്ധജലം ലഭ്യമാക്കാന്‍ വേണ്ട നടപടി കൈകൊള്ളുമെന്ന് വാട്ടര്‍ അതോററ്റി ഉറപ്പ് നല്‍കി. ഏതെങ്കിലും കാരണവശാല്‍ പൊതുടാപ്പുവഴി ശുദ്ധജലം ലഭ്യമാക്കുവാന്‍ വാട്ടര്‍ അതോററ്റിക്ക് സാധിക്കാത്തപക്ഷം പടിയൂര്‍ പഞ്ചായത്ത് സെക്രട്ടറിയെ വാട്ടര്‍ അതോററ്റി വിവരം അറിയിക്കണം. പടിയൂര്‍ പഞ്ചായത്ത് അധികൃതര്‍ കളക്ടറുടെ അനുമതിയോടെ ടാങ്കര്‍ ലോറി വഴിയോ മറ്റ് മാര്‍ഗ്ഗത്തിലൂടേയോ വിധി ഉടമക്കും പരിസരവാസികള്‍ക്കും ആവശ്യമായ ശുദ്ധജലം എത്തിച്ചുകൊടുക്കാന്‍ നടപടിയെടുക്കും. ശശീധരനും പരിസരവാസികള്‍ക്കും ശുദ്ധജലം ലഭ്യമാകുന്നുണ്ടെന്ന് വാട്ടര്‍ അതോററ്റിയും ഗ്രാമപഞ്ചായത്തും ഉറപ്പുവരുത്തുമെന്നും വിധി ഉടമയും എതിര്‍കക്ഷികളും ഒപ്പിട്ട എഗ്രിമെന്റില്‍ ഉറപ്പ് പറയുന്നു. ശശീധരന് പുറമെ എതിര്‍കക്ഷികളായ വാട്ടര്‍ അതോറട്ടി എക്സിക്യൂട്ടിവ് എഞ്ചിനിയര്‍, പടിയൂര്‍ പഞ്ചായത്ത് സെക്രട്ടറി എന്നിവരാണ് ഒപ്പിട്ടിരിക്കുന്നത്. കുടിവെള്ളം രൂക്ഷമായ മുഞ്ഞനാട് പ്രദേശവാസികള്‍ വേനല്‍കാലത്ത് വെള്ളം പണം കൊടുത്ത് വാങ്ങേണ്ടസ്ഥിതിയിലാണ്. കിണറുകളുണ്ടെങ്കിലും ഉപ്പുവെള്ളം കയറി ഒന്നും ഉപയോഗിക്കാന്‍ കഴിയില്ലെന്ന് ശശീധരന്‍ പറഞ്ഞു. നാല് ദിവസത്തിലൊരിക്കലെങ്കിലും വെള്ളം ലഭ്യമായാല്‍ അത് പ്രദേശവാസികള്‍ക്ക് വലിയ ആശ്വാസമായിരിക്കും. നിലവില്‍ 350 രൂപ കൊടുത്താണ് ഓരോ കുടുംബങ്ങളും ആവശ്യത്തിന് കുടിവെള്ളം വാങ്ങുന്നതെന്ന് ശശീധരന്‍ പറഞ്ഞു. വിധി ഉടമക്ക് വേണ്ടി അഡ്വ. സോമസുന്ദരന്‍ ഹാജരായി.

മുരിയാട് : യുവമോര്‍ച്ച മുരിയാട് പഞ്ചായത്തിലെ മുല്ല, കുണ്ടായ് യൂണിറ്റിന്റെ നേതൃത്വത്തില്‍ പൊള്ളുന്ന ചൂടില്‍ ദാഹിച്ചുവലയുന്ന വഴിയാത്രക്കാര്‍ക്കും പക്ഷികള്‍ക്കും വേണ്ടി തണ്ണീര്‍ പന്തല്‍ ഒരുക്കി .യുവമോര്‍ച്ച നിയോജക മണ്ഡലം ഉപാദ്ധ്യക്ഷന്‍ അജീഷ് പൈക്കാട്ട് ഉദ്ഘാടനം നിര്‍വഹിച്ചു . ഇരിങ്ങാലക്കുടയിലെ മുഴുവന്‍ യൂണിറ്റ് അടിസ്ഥാനത്തിലും ഇത്തരത്തിലുള്ള സേവന പ്രവര്‍ത്തനങ്ങളും കുടിവെള്ള ഷാമം പരിഹരിക്കുന്നതിനു വേണ്ടിയുള്ള പദ്ധതികള്‍ നടപ്പിലാക്കുവാന്‍ വേണ്ടി ഭരണ വര്‍ഗ്ഗത്തിന്റെ ശ്രദ്ധ കേന്ദ്രീകരിക്കുന്ന സമരപരിപാടികള്‍ക്കും നേതൃതം നല്‍കും എന്നു യുവമോര്‍ച്ച നിയോജക മണ്ഡലം പ്രസിഡന്റ് അഖിലാഷ് വിശ്വനാഥന്‍ മുഖ്യപ്രഭാഷണത്തില്‍ സംസാരിച്ചു . മുരിയാട് പഞ്ചായത്തിലെ കുടിവെള്ള ക്ഷാമത്തിന് വന്‍ പരിഹാരമുണ്ടാവണ്ട മുടിച്ചിറ നവീകരണത്തിന് നബാര്‍ഡില്‍ നിന്നും പാസായ 1 കോടി 43 ലക്ഷം രൂപ പഞ്ചായത്ത് ഭരണസമിതിയുടെ മെല്ലേ പോക്ക് നയത്തില്‍ ലാപ്‌സായി പോയതായും കൂടാതെ മുല്ലക്കാട് സ്ഥിതി ചെയ്യുന്ന പൊതുകിണറ് ലക്ഷകണക്കിന് രൂപ ചിലവാക്കി കഴിഞ്ഞ വര്‍ഷം നവീകരണം നടത്തിയിട്ടും ആ കിണറില്‍ നിന്നും വെള്ളം കോരിയെടുക്കാന്‍ തുടിക്കാലുകളൊ മോട്ടോര്‍ സംവിധാനമോ ചെയ്തു കൊടുക്കാത്തതായും ആരോപിച്ച് പഞ്ചായത്ത് ഭരണസമിതിക്കെതിരെ പ്രതിഷേധ സമരങ്ങള്‍ യൂണിറ്റ് തലത്തില്‍ നടത്തും എന്നു അദ്ധ്യക്ഷ ഭാഷണത്തില്‍ അരുണ്‍ ഇ ആര്‍ പറഞ്ഞു. മനോജ് നെല്ലിപറമ്പില്‍ ,മധു ടി എസ്, മിഷാദ് ,കൃഷ്ണ രാജ് ,സജിത്ത് ചന്ദ്രന്‍ ,ഷിബു, വിശാഖ് എന്നിവര്‍ നേതൃത്വം നല്‍കി

ഇരിങ്ങാലക്കുട : ഈസ്റ്ററിന്റെ ആഗമനമറിയിച്ച് ക്രൈസ്തവര്‍ ഞായറാഴ്ച ഓശാന ആചരിച്ചു.യേശുദേവന്റെ ജറുസലേം പട്ടണത്തിലേക്കുള്ള വരവിനെ അനുസ്മരിക്കുന്നതാണ് ഓശാന തിരുന്നാള്‍.കഴുതപ്പുറത്ത് എഴുന്നള്ളിയ യേശുവിനെ വസ്ത്രങ്ങള്‍ വിരിച്ചും ഒലിവ് ഇലകള്‍ വീശിയും ജറുസലേം നിവാസികള്‍ വരവേറ്റതിന്റെ അനുസ്മരണമാണ് കുരുത്തോല ഏന്തിയുള്ള ഓശാന ആചരണം. ഇതോടെ അമ്പത് നോമ്പിന്റെ സമാപനം കുറിക്കുന്ന വിശുദ്ധ വാരാചരണത്തിനും തുടക്കമാവും.ഞായറാഴ്ച രാവിലെ ദേവാലയങ്ങളില്‍ ഓശാന തിരുകര്‍മങ്ങളും കുരുത്തോല പ്രദക്ഷിണവും നടന്നു.സെന്റ് തോമസ് കത്തീഡ്രലില്‍ നടന്ന ചടങ്ങുകള്‍ക്ക് ബിഷപ് പോളി കണ്ണൂക്കാടന്‍ മുഖ്യകാര്‍മികനായിരുന്നു.കത്തിഡ്രല്‍ വികാരി ഫാ.ആന്റു ആലപ്പാടന്‍ സഹകാര്‍മ്മികത്വം വഹിച്ചു.

ഇരിങ്ങാലക്കുട : ടൈലിട്ട് നിര്‍മാണം പൂര്‍ത്തീകരിച്ച ഇരിങ്ങാലക്കുട ബസ്സ് സ്റ്റാന്‍ിന് കിഴക്കു വശത്ത് പോസ്‌റ്റോഫീസിനോട് ചേര്‍ന്നുള്ള റോഡില്‍ കൈവരികള്‍ സ്ഥാപിക്കാന്‍ മുനിസിപ്പല്‍ കൗണ്‍സില്‍ തീരുമാനിച്ചതിനെതിരെ ഓട്ടോറിക്ഷ തൊഴിലാളികള്‍ രംഗത്ത്. കഴിഞ്ഞ ദിവസം ചേര്‍ന്ന മുനിസിപ്പല്‍ കൗണ്‍സില്‍ യോഗത്തില്‍ റോഡ് ടൈല്‍ വിരിക്കുന്നതുമായി ബന്ധപ്പെട്ട് പുതുക്കിയ എസ്റ്റിമേറ്റ് അംഗീകരിക്കുന്നതിടയിലാണ് റോഡിന്റെ കിഴക്കു ഭാഗത്ത് ഫുട്പാത്തില്‍ കൈവരി നിര്‍മ്മിക്കണമെന്ന നിര്‍ദ്ദേശം ഉയര്‍ന്നു വന്നത്. കൈവരി സ്ഥാപിക്കുന്നതിനെ യു. ഡി. എഫ്, എല്‍. ഡി. എഫ്. അംഗങ്ങള്‍ തത്ത്വത്തില്‍ അംഗീകരിക്കുകയായിരുന്നു. എന്നാല്‍ ബി. ജെ. പി. അംഗം സന്തോഷ് ബോബന്‍ ഈ നിര്‍ദ്ദേശത്തെ എതിര്‍ത്തിരുന്നു. കൈവരികള്‍ സ്ഥാപിക്കുന്നതോടെ ഇവിടെ ഓട്ടോ സ്റ്റാന്‍ഡ് അനുവദിക്കാന്‍ കഴിയില്ലെന്നും ഇത് വികസനത്തിന്റെ പേരില്‍ തൊഴിലാളികളെ റോഡിലേക്ക് ഇറക്കി വിടുന്ന സാഹചര്യം ഒരുക്കുമെന്നും സന്തോഷ് ബോബന്‍ ചൂണ്ടിക്കാട്ടി. കൗണ്‍സില്‍ തീരുമാനം അറിഞ്ഞതോടെ ശനിയാഴ്ച രാവിലെ ഓട്ടോറിക്ഷ തൊഴിലാളികള്‍ ഒന്നടങ്കം ചേംബറിലെത്തി ചെയര്‍പേഴ്‌സണ്‍ നിമ്യ ഷിജുവിന് നിവേദനം നല്‍കുകയായിരുന്നു. തങ്ങളുടെ ഉപജീവന മാര്‍ഗ്ഗം ഇല്ലാതാക്കുന്ന തീരുമാനം പുനപരിശോധിക്കണമെന്നാണ് ഓട്ടോറിക്ഷ തൊഴിലാളികളുടെ ആവശ്യം. ഇക്കാര്യത്തില്‍ ചര്‍ച്ച നടത്തി തീരുമാനം എടുക്കാമെന്ന് ചെയര്‍പേഴ്‌സണ്‍ നിമ്യ ഷിജു തൊഴിലാളി പ്രതിനിധികളെ അറിയിച്ചു. പുതിയ ട്രാഫിക് അഡൈ്വസറി തീരുമാനം പ്രകാരം നഗരത്തില്‍ ഇനി പുതിയ ഓട്ടോറിക്ഷ പേട്ടകള്‍ അനുവദിക്കാനാകില്ലെന്ന് തൊഴിലാളികള്‍ ചൂണ്ടിക്കാട്ടുന്നു. ഈ സാഹചര്യത്തിലാണ് നിലവിലുള്ള പേട്ട നിറുത്തലാക്കാനുള്ള നീക്കത്തിനെതിരെ ശക്തമായ സമരപരിപാടികളുമായി രംഗത്തു വരുമെന്ന് തൊഴിലാളികള്‍ ചൂണ്ടിക്കാട്ടുന്നത്. കൗണ്‍സില്‍ തീരുമാനത്തിനെതിരെ എ. ഐ. ടി. യു. സി. യും, ബി. ജെ. പി. യും രംഗത്തു വന്നിരുന്നു. പത്താം നമ്പര്‍ ഓട്ടോ സ്റ്റാന്‍ഡ് നിറുത്തലാക്കാനുള്ള നീക്കം ഓട്ടോ തൊഴിലാളികളോട് കാണിക്കുന്ന അനീതിയാാണന്ന് എ. ഐ. ടി. യു. സി. പ്രസ്താവനയില്‍ കുറ്റപ്പെടുത്തി. ഈ റോഡിലെ തന്നെ ബസ്സ് സ്റ്റാന്‍ഡ് കെട്ടിടത്തിലെ അനതിക്യത കയ്യേറ്റങ്ങള്‍ക്ക് നേരെ നഗരസഭ കണ്ണടക്കുകയാണന്ന ആക്ഷേപവും ഉയര്‍ന്നിട്ടുണ്ട്. നഗരസഭ ബസ് സ്റ്റാന്‍ഡ് ബില്‍ഡിംഗില്‍ കടയുടമകള്‍ നടത്തിയിട്ടുള്ള 2 മീറ്ററോളം അനധികൃത കയ്യറ്റം ഒഴിവാക്കി ജനങ്ങള്‍ക്ക് സുഗമമായി സുരക്ഷയോടെ നടക്കുവാനായി നടപ്പാത ഒരുക്കുവാന്‍ കഴിയാത്ത നഗരസഭ ഓട്ടോറിക്ഷാ തൊഴിലാളികളോട് കാണിക്കുന്ന നിക്ഷേതാത്മക നടപടിക്ക് കടുത്ത വില നല്‍കേണ്ടി വരുമെന്ന് സി പി എം കൗണ്‍സിലര്‍മാര്‍ പറഞ്ഞു.

ഇരിങ്ങാലക്കുട : നഗരസഭയുടെ 2018 – 2019 സാമ്പത്തിക വര്‍ഷത്തെ പൊതു ബജറ്റ് നഗരസഭ വൈസ് ചെയര്‍പേഴ്‌സണ്‍ രാജേശ്വരി ശിവരാമന്‍ നായര്‍ അവതരിപ്പിച്ചു. 51.20 കോടി രൂപ വരവും, 47.88 കോടി രൂപ ചിലവും, 3 .32 കോടി നീക്കിയിരിപ്പും കണക്കാക്കുന്ന ബജറ്റാണ് ശനിയാഴ്ച ചേര്‍ന്ന കൗണ്‍സിലില്‍ അവതരിപ്പിച്ചത്.കൃഷിയ്ക്കായി 80 ലക്ഷം രൂപയാണ് ബഡ്ജറ്റില്‍ വകയിരിത്തിയിരിക്കുന്നത്.കണ്ടാരംത്തറ ലിഫ്റ്റ് ഇറിഗേഷന്‍,പനോലിതോട് ആഴം കൂട്ടല്‍,തറയ്ക്കല്‍ ലിഫ്റ്റ് ഇറിഗേഷന്‍,തളിയകോണം ലിഫ്റ്റ് ഇറിഗേഷന്‍ തുടങ്ങിയവയ്ക്ക് 20 ലക്ഷവും നെല്‍കൃഷിയ്ക്ക് 25 ലക്ഷവും,തെങ്ങ്,വാഴ,ജാതി, കൃഷിയ്ക്ക് 15 ലക്ഷവും കാര്‍ഷിക മോട്ടോര്‍ പമ്പ് സെറ്റ് സ്ഥാപിയ്ക്കല്‍ കൃഷിഭവനുകളുടെ സംരക്ഷണം എന്നിവയ്ക്ക് 20 ലക്ഷവും ബഡ്ജറ്റില്‍ വകയിരിത്തിയിട്ടുണ്ട്.മൃഗസംരക്ഷണ മേഖലയില്‍ 40 ലക്ഷം രൂപയും നഗരത്തില്‍ പ്ലാസ്റ്റിക്ക് കിറ്റുകളുടെ ഉപയോഗം കുറയ്ക്കുന്നതിനായി തുണി സഞ്ചി പേപ്പര്‍ ബാഗ് നിര്‍മ്മാണ യൂണിറ്റ് ആരംഭിക്കുന്നതിനായി 3 ലക്ഷം രൂപ വകയിരുത്തി.കൂടാതെ സംരംഭക ക്ലബിനും,ഗ്രൂപ്പ്,വ്യക്തിഗത സംരംഭങ്ങള്‍ എന്നിവയ്ക്ക് വേണ്ടി 3 ലക്ഷം രൂപയും വകയിരുത്തി.അംഗനവാടി പോഷകാഹാര പദ്ധതിയ്ക്ക് 27 ലക്ഷം രൂപയും ശാരിരിക മാനസിക വെല്ലുവിളി നേരിടുന്നവര്‍ക്ക് സ്‌കോളര്‍ഷിപ്പായി 25 ലക്ഷം രൂപയും വയോമിത്രം പരിപാടിയ്ക്ക് 10 ലക്ഷം രൂപയും ജനറല്‍ ആശുപത്രിയില്‍ ജെറിയാട്രിക് വാര്‍ഡ് നിര്‍മ്മിക്കുന്നതിന് 20 ലക്ഷവും അംഗനവാടികള്‍ക്കായി 10 ലക്ഷം രൂപയും ബഡ്ജറ്റില്‍ വകയിരുത്തി.വീടില്ലാത്തവര്‍ക്ക് വീട് നിര്‍മ്മിക്കുന്നതിനായി 3.5 കോടി രൂപയുംആരോഗ്യ മേഖലയിലേയ്ക്ക് 1.5 കോടി രൂപയും മാലിന്യ സംസ്‌ക്കരണത്തിന് 20 ലക്ഷം,ക്രിമിറ്റോറിയം നിര്‍മ്മാണത്തിന് 50 ലക്ഷം,പച്ചക്കറി മാര്‍ക്കറ്റ് നവീകരണത്തിന് 5 ലക്ഷം എന്നിങ്ങെ ഫണ്ട് വകയിരുത്തിയിട്ടുണ്ട്.കുടിവെള്ള പദ്ധതികള്‍ക്കായി 50 ലക്ഷം രൂപയും ബൈപാസ് റോഡ് പൂതംകുളം മുതല്‍ ബ്രദര്‍ മിഷന്‍ റോഡ് വരെ ദീര്‍ഘിപ്പിക്കുന്നതിന് 10 ലക്ഷം രൂപയുംടൗണ്‍ ഹാളിന്റെ പ്രതിധ്വനി ഒഴിവാക്കുന്നതിന് 15 ലക്ഷം രൂപയും നഗരസഭ കെട്ടിടങ്ങളുടെ അറ്റകുറ്റ പണികള്‍ക്ക് 20 ലക്ഷം രൂപയും പാര്‍ക്ക് നവീകരണത്തിന് 20 ലക്ഷം രൂപയും ബഡ്ജറ്റില്‍ വകയിരുത്തിയിട്ടുണ്ട്.ബെപ്പാസ് റോഡില്‍ എല്‍ ഇ ഡി സ്ഥാപിക്കുന്നതിന് 25 ലക്ഷം രൂപയും എല്ലാ വാര്‍ഡുകളിലെ തെരുവ് വിളക്കുകള്‍ മാറ്റി സ്ഥാപിക്കുന്നതിന് 50 ലക്ഷം രൂപയും വിദ്യാഭ്യാസ സ്ഥാപനങ്ങളുടെ വികസനത്തിനായി 1 കോടി 21 ലക്ഷം രൂപയും വനിതകളുടെ ക്ഷേമത്തിനായി 1 കോടി രൂപയും ഭരണ നിര്‍വഹണനത്തിനായി 40 ലക്ഷം രൂപയും ചാത്തന്‍ മാസ്റ്റര്‍ ഹാളിനായി 1 കോടി രൂപയും മറ്റ് പട്ടിക ജാതി ഭവന പദ്ധതികള്‍ക്കായി 1 കോടിയും ഇത്തവണത്തേ ബഡ്ജറ്റില്‍ വകയിരുത്തിയിട്ടുണ്ട്.6.37 കോടി രൂപ മുന്നിരിപ്പും 42.49 കോടി വരവും അടക്കം 48.86 കോടി ആകെ വരവും 43.38 കോടി ചെലവും 5.47 കോടി നീക്കിയിരുപ്പും വരുന്ന 2017-2018 ലെ പുതുക്കിയ ബഡ്ജറ്റും 5.47 കോടി ഓപ്പണിംങ്ങ് ബാലന്‍സും 45.72 കോടി രൂപ വരവും കൂടി 51.20 കോടി രൂപ മെത്തം വരവും 47.88 കോടി രൂപ ചിലവും 3.32 കോടി രൂപ നീക്കിയിരിപ്പും പ്രതിക്ഷിക്കുന്ന 2018-2019 ലെ ഇരിങ്ങാലക്കുട നഗരസഭാ ബഡ്ജറ്റാണ് സഭയുടെ അംഗീകരാത്തിനായി സമര്‍പ്പിച്ചിരിക്കുന്നത്.

ഇരിങ്ങാലക്കുട : ഭഗത് സിംഗ് രക്തസാക്ഷി ദിനത്തോടനുബന്ധിച്ച് ഡി.വൈ.എഫ്.ഐ. ഇരിങ്ങാലക്കുട ബ്ലോക്ക് കമ്മിറ്റി നടത്തിയ ടൂവീലര്‍ റാലിയും അനുസ്മരണ സമ്മേളനവും സംഘടിപ്പിച്ചു.ഡി.വൈ.എഫ്.ഐ ജില്ലാ പ്രസിഡണ്ട് കെ.വി.രാജേഷ് സമ്മേളനം ഉദ്ഘാടനം ചെയ്തു. ഡിവൈഎഫ്‌ഐ ജില്ലാ സെക്രട്ടറിയറ്റംഗം ആര്‍.എല്‍ ശ്രീലാല്‍ ബ്ലോക്ക് സെക്രട്ടറി സി ഡി സിജിത്ത്, പി.സി.നിമിത, വി.എ.അനീഷ്, ആര്‍.എല്‍.ജീവന്‍ലാല്‍, പി.കെ.മനുമോഹന്‍. എന്നിവര്‍ നേതൃത്വം നല്‍കി