ഇരിങ്ങാലക്കുട: സെന്റ് തോമസ് കത്തീഡ്രല്‍ ഇടവകയുടെ ജീവകാരുണ്യ പ്രവര്‍ത്തനങ്ങളുടെ ഒരു ഭാഗമായ സാന്ത്വനഭവന്‍ 15-ാം വയസ്സിന്റെ നിറവില്‍. 2002 ഡിസംബറില്‍ ഇരിങ്ങാലക്കുട ബിഷപ്പ് ജെയിംസ് പഴയാറ്റില്‍ പ്രവര്‍ത്തനമാരംഭിച്ച ഈ സ്ഥാപനം ജന്മനാ ബുദ്ധിമാന്ദ്യം സംഭവിച്ചതും, മാനസ്സിക വൈകല്യമുള്ളതുമായ യുവതികളുടെ ആശ്വാസ കേന്ദ്രമാണ്. 50 അന്തേവാസികള്‍ക്ക് അഭയം നല്‍കാന്‍ കഴിയും വിധത്തിലാണ് സാന്ത്വന സദന്‍ വിഭാവനം ചെയ്തിട്ടുള്ളത്. മാര്‍ പോളി കണ്ണൂക്കാടന്റെ വിശുദ്ധബലിയര്‍പ്പണത്തോടെ സാന്ത്വന സദന്റെ 15-ാം പിറന്നാള്‍ ആഘോഷങ്ങള്‍ക്ക് തുടക്കമാകും. വൈകീട്ട് 5 മണിക്ക് വി.കുര്‍ബ്ബാനയും തുടര്‍ന്ന് പൊതു സമ്മേളനവും നടക്കും. ഇരിങ്ങാലക്കുട രൂപത മെത്രാന്‍ മാര്‍ പോളി കണ്ണൂക്കാടന്‍ ഉദ്ഘാടനം നിര്‍വ്വഹിക്കും. സെക്രട്ടറി സി.ബിന്‍സി റിപ്പോര്‍ട്ട് അവതരിപ്പിക്കും. കത്തീഡ്രല്‍ വികാരി ഡോ.ആന്റു ആലപ്പാടന്‍ അധ്യക്ഷത വഹിക്കുന്ന യോഗത്തില്‍ സാന്ത്വന സദന്‍ കണ്‍വീനര്‍ ടെല്‍സണ്‍ കോട്ടോളി സ്വാഗതവും, മുനി.കൗണ്‍സിലര്‍ അബ്ദുള്‍ ബഷീര്‍, സുപ്പീരിയര്‍ ഷ്വേണ്‍സ്റ്റാട്ട് കോണ്‍വെന്റ് സി.ജോസി, ഭരണസമിതി അംഗം ഡോ.എം.വി. വാറുണ്ണി, അസ്.വികാരി ഫാ. അജോ പുളിക്കന്‍ എന്നിവര്‍ ആശംസകളും, ട്രസ്റ്റി റോബി കാളിയങ്കര നന്ദിയും അര്‍പ്പിച്ചു സംസാരിക്കും.

പുല്ലൂര്‍: പത്ത് വര്‍ഷത്തോളം തരിശായിക്കിടന്ന പൊതുമ്പുചിറ പടിഞ്ഞാറേ പാടത്ത് നുറുമേനി കൊയ്ത ഗ്രീന്‍പുല്ലൂരിന്  ഇത് സ്വപ്‌ന സാഫല്യം. പൊതുമ്പുചിറ പടിഞ്ഞാറേ പാടശേഖരത്തിലെ കര്‍ഷകരുടെ കൂട്ടായ്മയാണ് പുല്ലൂര്‍ സഹകരണ ബാങ്കിന്റെ സഹകരണത്തോടെ കൃഷി ഇറക്കിയത്. 270 പറ നിലത്തില്‍ ജയ ഇനത്തില്‍പ്പെട്ട വിത്താണ് കൃഷിക്കായി ഉപയോഗിച്ചത്. കാലാവസ്ഥാ വ്യതിയാനങ്ങളെയും പ്രകൃതി വൈപരീത്യങ്ങളെയും മറികടന്ന് കൂട്ടായ്മയിലൂടെ ഉയര്‍ന്നു വന്ന കര്‍ഷകരുടെ വിജയഗാഥയാണ് ഗ്രീന്‍ പുല്ലൂര്‍ കൊയ്ത്തുത്സവത്തിലൂടെ രചിക്കപ്പെട്ടത്. ഗ്രീന്‍ പുല്ലൂരിന് കീഴിലുള്ള പൊതുമ്പുചിറ പടിഞ്ഞാറേ പാടശേഖരത്തിലെ കൊയ്ത്തുത്സവം ഇരിങ്ങാലക്കുട എം.എല്‍.എ. കെ.യു.അരുണന്‍ ഉദ്ഘാടനം ചെയ്തു. പാടശേഖര സമിതി പ്രസിഡണ്ട് കെ.യു. ഗോപാലകൃഷ്ണന്‍ അദ്ധ്യക്ഷത വഹിച്ചു. മുരിയാട് ഗ്രാമ പഞ്ചായത്ത് പ്രസിഡണ്ട് സരള വിക്രമന്‍, പുല്ലൂര്‍ സര്‍വ്വീസ് സഹകരണ ബാങ്ക് പ്രസിഡണ്ട് ജോസ്.ജെ. ചിറ്റിലപ്പിള്ളി, ഗ്രാമപഞ്ചായത്ത് സ്റ്റാന്റിംഗ് കമ്മിറ്റി ചെയര്‍മാന്‍ കെ.പി.പ്രശാന്ത്, ബ്‌ളോക്ക് പഞ്ചായത്ത് പ്രസിഡണ്ട് തോമസ് തത്തംപിള്ളി, മുരിയാട് കൃഷി ഓഫീസര്‍ രാധിക കെ.യു., കൃഷി അസിസ്റ്റന്റ് വി.എസ്.സുകന്യ, പാടശേഖര സമിതി സെക്രട്ടറി ജോയ് പി.ഐ., ട്രഷറര്‍ ജോണ്‍സണ്‍ പി.പി., ബാങ്ക് ഭരണ സമിതി അംഗങ്ങളായ ശശി ടി.കെ., സജന്‍ കെ.യു., ബാങ്ക് സെക്രട്ടറി ഇന്‍ചാര്‍ജ് ചാന്ദിനി ഇ.എസ്., മുന്‍ പഞ്ചായത്ത് സ്റ്റാന്റിംഗ് കമ്മിറ്റി ചെയര്‍മാന്‍ ശശിധരന്‍ തേറാട്ടില്‍ എന്നിവര്‍ സംസാരിച്ചു. പാടശേഖര സമിതി ഭാരവാഹികളായ സി.ജെ. ജോസ് സ്വാഗതവും പി.ടി. ജോര്‍ജ്ജ് നന്ദിയും പറഞ്ഞു.

ഇരിങ്ങാലക്കുട: വൈക്കം കഥകളി ആസ്വാദക സംഘം ആദ്യമായി ഏര്‍പ്പെടുത്തിയ കലാമണ്ഡലം വൈക്കം കരുണാകരന്‍നായര്‍ പുരസ്‌കാരം സദനം കൃഷ്ണന്‍കുട്ടി ആശാന് സമ്മാനിക്കും. അഷ്ടമി മഹോത്സവത്തോട് അനുബന്ധിച്ച് വൈക്കം മഹാദേവക്ഷേത്രത്തില്‍ വച്ച് നാളെ (6.12.17) പുരസ്‌കാരം സമ്മാനിക്കും. സുവര്‍ണമുദ്ര, ഫലകം, പൊന്നാട എന്നിവയടങ്ങുന്നതാണ് പുരസ്‌കാരം. തുടര്‍ന്ന് കര്‍ണശപഥം കഥകളിയില്‍ സദനം കൃഷ്ണന്‍കുട്ടി ആശാന്‍ കര്‍ണ്ണനായി അരങ്ങിലെത്തും.