കോവിഡ് 19 പ്രതിരോധത്തിന്റെ ഭാഗമായി തൃശ്ശൂര്‍ ജില്ലയിൽ നിരീക്ഷണത്തിൽ കഴിയുന്നവരുടെ എണ്ണം 11314 ആയി:ജില്ലയിൽ ഇന്ന് പോസറ്റീവ് കേസുകൾ ഇല്ല

കോവിഡ് 19 പ്രതിരോധത്തിന്റെ ഭാഗമായി തൃശ്ശൂര്‍ ജില്ലയിൽ നിരീക്ഷണത്തിൽ കഴിയുന്നവരുടെ എണ്ണം 11314 ആയി. വീടുകളിൽ 11285 പേരും ആശുപത്രികളിൽ 29 പേരുമാണ് നിരീക്ഷണത്തിലുളളത്. ചൊവ്വാഴ്ച (മാർച്ച് 24) 8 പേരെ ആശുപത്രിയിൽ പ്രവേശിപ്പിച്ചു. 23 പേരെ വിടുതൽ ചെയ്തു. ജില്ലയിൽ ഇന്ന് പോസറ്റീവ് കേസുകൾ ഇല്ല. 33 സാമ്പിളുകളുടെ ഫലം വന്നതിൽ എല്ലാം നെഗറ്റീവാണ്. ഇതു വരെ 483 പേരുടെ സാമ്പിളുകൾ അയച്ചതിൽ 433 പേരുടെ ഫലം വന്നു. 43 പരിശോധനഫലങ്ങൾ ലഭിക്കാനുണ്ട്.ജില്ലാ കൺട്രോൾ സെല്ലിലേക്ക് 738 അന്വേഷണങ്ങൾ ലഭിച്ചു. പരിശീലനം ലഭിച്ച സൈക്കോ-സോഷ്യൽ കൗൺസിലർമാർ വഴിയുളള കൗൺസലിങ് തുടരുകയാണ്. കോവിഡ് 19 പ്രതിരോധപ്രവർത്തനങ്ങളുടെ ഭാഗമായി ആരോഗ്യവകുപ്പ്, പോലീസ്, ജില്ലാഭരണകൂടം എന്നിവയുടെ സംയുക്താഭിമുഖ്യത്തിൽ ശക്തൻ തമ്പുരാൻ പച്ചക്കറി-മീൻ-മാംസ മാർക്കറ്റുകളിൽ രാവിലെ 6 മുതൽ പരിശോധന തുടങ്ങി. ചരക്കുമായി എത്തിയ 106 ഇതരസംസ്ഥാന ഡ്രൈവർമാരെയും ക്ലീനർമാരെയും പരിശോധിച്ച് ബോധൽക്കരണ ക്ലാസ്സ് നൽകി. തേനി, മേട്ടുപാളയം, പൊളളാച്ചി, സത്യമംഗലം, ഉളിയംപട്ടി, പുലിമേട്, കോയമ്പത്തൂർ എന്നിവിടങ്ങളിൽ നിന്നുളള വാഹനതൊഴിലാളികൾക്കാണ് പരിശോധനയും ക്ലാസ്സും നടത്തിയത്. വിവിധ സന്നദ്ധസംഘടനകളുടെ സഹായവും ക്ലാസ്സുകൾക്ക് ഉണ്ടായിരുന്നു