കൂടല്‍മാണിക്യം ക്ഷേത്രത്തിലെ ഇല്ലംനിറയ്ക്ക് സംഗമേശ്വന്റെ സ്വന്തം ഭൂമിയില്‍ വിളവെടുത്ത നെല്‍കതിരുകള്‍.

955
Advertisement

ഇരിങ്ങാലക്കുട: കൂടല്‍മാണിക്യം ക്ഷേത്രത്തിലെ ഈ വര്‍ഷത്തെ ഇല്ലംനിറയ്ക്ക് സ്വന്തമായി വിളവെടുത്ത നെല്‍കതിരുകള്‍. കൂടല്‍മാണിക്യം കൊട്ടിലാക്കല്‍ പറമ്പില്‍ ഒരേക്കറോളം സ്ഥലത്ത് വിതച്ച നെല്‍കതിരുകള്‍ ഇല്ലംനിറയ്ക്കായി കൊയ്തെടുത്തു. ഏപ്രില്‍ മാസത്തില്‍ കൃഷി മന്ത്രി വി.എസ്. സുനില്‍കുമാറാണ് കൊട്ടിലാക്കല്‍ പറമ്പിലിലെ കരനെല്‍കൃഷിക്ക് വിത്ത് വിതച്ചത്. വര്‍ഷങ്ങളായി ഇല്ലംനിറയ്ക്കാവശ്യമായ നെല്‍കതിരുകള്‍ വര്‍ഷങ്ങളായി പണം കൊടുത്ത് പുറത്തുനിന്നാണ് കൊണ്ടുവരാറുണ്ടായിരുന്നത്. ഇത് ഒഴിവാക്കുന്നതിന്റെ ഭാഗമായിട്ടാണ് യു. പ്രദീപ് മേനോന്‍ ചെയര്‍മാനായ പുതിയ ഭരണസമിതി സ്വന്തമായി നെല്‍കൃഷി ചെയ്യാന്‍ തീരുമാനിച്ചത്. ഇതിനായി തയ്യാറാക്കിയ ഒരേക്കര്‍ സ്ഥലത്ത് മൂന്ന് മാസം മുമ്പാണ് വിത്തിറക്കിയത്. കൂടല്‍മാണിക്യം ക്ഷേത്രത്തിലേയ്ക്കും കൂടല്‍മാണിക്യം കീഴേടമായ അയ്യങ്കാവ് ക്ഷേത്രത്തിലേക്കുമുള്ള നെല്‍കതിരുകള്‍ ചൊവ്വാഴ്ച കൊയ്തെടുത്തു.ദേവസ്വം കമ്മിറ്റി അംഗങ്ങളും കൂടല്‍മാണിക്യം ക്ഷേത്രജീവനക്കാരും ഭക്തജനങ്ങളും ചേര്‍ന്നാണ് മേളത്തിന്റെ അകമ്പടിയോടെ കൊയ്ത്തുത്സവം നടത്തിയത്.കൂടല്‍മാണിക്യം കമ്മിറ്റി മെമ്പര്‍മാരായ ഭരതന്‍ കണ്ടെങ്കാട്ടില്‍, അഡ്വ. രാജേഷ് തമ്പാന്‍, കെ ജി സുരേഷ്, വി എസ് ഷൈന്‍ , ദേവസ്വം അഡ്മിനിസ്‌ട്രേറ്റര്‍ എ എം സുമ എന്നിവര്‍ പങ്കെടുത്തു.