ഇരിങ്ങാലക്കുട : ഡല്‍ഹിയിലെ നാഷണല്‍ സ്‌കൂള്‍ ഓഫ് ഡ്രാമയുടെ ആഭിമുഖ്യത്തില്‍ ഇന്ത്യയൊട്ടുക്ക് സംഘടിപ്പിച്ചു വരുന്ന തിയ്യേറ്റര്‍ ഒളിമ്പിക്‌സില്‍ കൂടിയാട്ടം ആചാര്യന്‍ വേണുജി നവരസ സാധനയെ കുറിച്ച് നടത്തിയ സോദാഹരണ പ്രഭാഷണത്തിന് നാടക പണ്ഡിത സദസ്സിന്റെ അഭിനന്ദനം. ലോകപ്രശസ്ത സംസ്‌കൃത പണ്ഡിതന്‍ കമലേഷ് ദത്ത ത്രിപാഡി ഉദ്ഘാടനം ചെയ്ത സമ്മേളനത്തില്‍ പ്രശസ്ത നാട്യനിരൂപകന്‍ സുനില്‍ കോത്താരി അദ്ധ്യക്ഷത വഹിച്ച സെമിനാറിലാണ് വേണുജി അഭിനയത്തോടുകൂടിയ പ്രഭാഷണം നിര്‍വ്വഹിച്ചത്. നവരസങ്ങളും പഞ്ചേന്ദ്രിയങ്ങളുമായിട്ടുള്ള ബന്ധവും സ്ഥായീഭാവങ്ങളുടെ ലോകധര്‍മ്മിയായിട്ടുള്ള വ്യഭിചാരീഭാവങ്ങളുമാണ് വേണുജി വിശദീകരിച്ചത്. മാര്‍ച്ച് 23 ന് ഭോപ്പാലിലെ ഭാരത് ഭവനില്‍ ആയിരുന്നു ഈ സമ്മേളനം. പ്രശസ്ത നാട്യാചാര്യര്‍ റീത്ത ഗാംഗുലി, അലോക് ചാറ്റര്‍ജി എിവര്‍ ചര്‍ച്ചയില്‍ പങ്കെടുത്തു.
Advertisement
