ക്രൈസ്റ്റിൽ അന്താരാഷ്ട്ര ഭൗമശാസ്ത്ര സെമിനാർ സമാപിച്ചു.

Advertisement

ഇരിങ്ങാലക്കുട: ക്രൈസ്റ്റ് കോളേജിലെ ജിയോളജി & എൻവയോൺമെന്റൽ സയൻസ് വിഭാഗം, ബ്രിട്ടനിലെ എക്‌സെറ്റർ, ദക്ഷിണാഫ്രിക്കയിലെ സുളു ലാൻഡ് എന്നീ സർവ്വകലാശാലകളുമായി ചേർന്ന് കേന്ദ്ര ഭൗമശാസ്ത്ര മന്ത്രാലയത്തിന്റെ പിന്തുണയോടെ അന്താരാഷ്ട്ര ജിയോ സയൻസ് കൊളോക്യം സംഘടിപ്പിച്ചു. നവംബർ 10 മുതൽ 13, നവംബർ 27, ഡിസംബർ 1,2 എന്നിങ്ങനെ മൂന്ന് ഘട്ടങ്ങളായി നടത്തിയ പരിപാടിയിൽ പതിനാല്‌ രാജ്യങ്ങളിൽ നിന്നുള്ള പ്രശസ്തരായ ശാസ്ത്രജ്ഞർ പ്രബന്ധങ്ങൾ അവതരിപ്പിക്കുകയും, ഇരുപത്തൊൻപത് അന്താരാഷ്ട്ര വിദ്യാഭ്യാസ സ്ഥാപനങ്ങളിൽ നിന്നായി ഇരുനൂറിലധികം പേർ പങ്കെടുക്കുകയും ചെയ്തു.വിവിധങ്ങളായ ഗവേഷണരംഗങ്ങളിൽ അന്താരാഷ്ട്രതലത്തിൽ പ്രശസ്തരായ നിരവധി ശാസ്ത്രജ്ഞർ ആനുകാലികപ്രസക്തിയുള്ള വിഷയങ്ങളെപ്പറ്റി ചർച്ച ചെയ്തു. ഡോ. ആൻജലോ ഗലഗോ സാല, ഡോ. സജിൻകുമാർ, ഡോ. ലിന്റോ ആലപ്പാട്ട്, പ്രൊഫ. വെട്രി മുരുകൻ എന്നിവർ മൂന്ന് ഘട്ടങ്ങളെ പരിചയപ്പെടുത്തി.കേരളത്തിൽ ഉണ്ടായിക്കൊണ്ടിരിക്കുന്ന വെള്ളപ്പൊക്കം- സ്വീകരിക്കേണ്ടുന്ന മുൻകരുതലുകൾ, തടയുന്നതിനുള്ള മാർഗ്ഗങ്ങൾ, പ്രകൃതിയുടെ പരിസ്ഥിതി വ്യവസ്ഥയെ അതിന്റെ പച്ചപ്പോടെ നിലനിർത്തുന്നതിന്റെ പ്രാധാന്യം എന്നിവയെപ്പറ്റിയും ഐക്യരാഷ്ട്ര സംഘടന പ്രതിനിധി ഡോ. കരേൻ സെഡ്‌മെയർ പ്രതിപാദിച്ചു.പ്രിൻസിപ്പൽ ഫാ. ഡോ. ജോളി ആൻഡ്രൂസിന്റെ അധ്യക്ഷതയിൽ ചേർന്ന യോഗത്തിന് ഡോ. ലിന്റോ ആലപ്പാട്ട് സ്വാഗതമാശംസിച്ചു. പ്രൊഫ. ജ്യോതിരഞ്ജൻ എസ്. റേ (Director, National Centre for Earth Science Studies) ഉദ്ഘാടനകർമ്മം നിർവഹിച്ചു. ഫാ. ജേക്കബ് ഞെരിഞ്ഞാമ്പിള്ളി ( മാനേജർ, ക്രൈസ്റ്റ് കോളേജ്), പ്രൊഫ. നോക്കുതല വിൻഫ്രഡ് കുനുനേ (ഡീൻ, സുളുലാൻഡ് യൂണിവേഴ്സിറ്റി) എന്നിവർ ആശംസകളർപ്പിച്ചു. പ്രൊഫ. വെട്രിമുരുകൻ (സുളുലാൻഡ് യൂണിവേഴ്സിറ്റി) നന്ദി പറഞ്ഞു.