“*ദേശീയതലത്തിൽ മികവു തെളിയിച്ച കേരളത്തിലെ ഉന്നതവിദ്യാഭ്യാസ സ്ഥാപനങ്ങളെ ആദരിക്കുന്നു*”
*എക്സലൻഷ്യ സെപ്റ്റംബർ 15,16ന് തിരുവനന്തപുരത്ത്
സംസ്ഥാനത്ത് നാക്ക് A++, A+, A ഗ്രേഡുകൾ നേടിയതും NIRF, KIRF റാങ്കിങ്ങിൽ മുന്നിലെത്തിയതുമായ ഉന്നതവിദ്യാഭ്യാസ സ്ഥാപനങ്ങൾക്ക് ‘മിനിസ്റ്റേഴ്സ് അവാർഡ് ഫോർ എക്സെലൻസ്’ നൽകി ആദരിക്കുന്ന എക്സലൻഷ്യ 2025 സെപ്റ്റംബർ 15, 16 തീയതികളിൽ തിരുവനന്തപുരത്ത് നടക്കും. 15ന് ഉച്ചക്ക് 2.30ന് ടാഗോർ തീയേറ്ററിൽ നടക്കുന്ന ചടങ്ങിൽ ബഹു. ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ ബിന്ദു എക്സലൻഷ്യ 2025 ഉദ്ഘാടനം ചെയ്യും.
നാക്ക്, NIRF, KIRF നേട്ടങ്ങൾ കരസ്ഥമാക്കിയ 145 ഉന്നത വിദ്യാഭ്യാസ സ്ഥാപനങ്ങളെയാണ് ‘മിനിസ്റ്റേഴ്സ് അവാർഡ് ഫോർ എക്സലൻസ്’ നൽകി അനുമോദിക്കുക. സംസ്ഥാന ഉന്നതവിദ്യാഭ്യാസ വകുപ്പും സ്റ്റേറ്റ് ലെവൽ ക്വാളിറ്റി അഷുറൻസ് സെൽ കേരളയും (എസ് എൽ ക്യു എ സി കേരള) ചേർന്നാണ് എക്സലൻഷ്യ 2025 ഒരുക്കുന്നത്.
വിവിധ വിഭാഗങ്ങളിലായി പുരസ്‌കാരത്തിന് അർഹത നേടിയ സർവകലാശാലകളുടെ വൈസ് ചാൻസലർമാർ, രജിസ്ട്രാർമാർ, സിൻഡിക്കേറ്റ് അംഗങ്ങൾ, അക്കാഡമിക് കൗൺസിൽ അംഗങ്ങൾ, IQAC ഡയറക്ടമാർ, സർക്കാർ -എയ്ഡഡ്-അൺ എയഡഡ് സ്ഥാപനങ്ങളിലെ മാനേജർമാർ, പ്രിൻസിപ്പൽമാർ, IQAC കോർഡിനേറ്റർമാർ, മാനേജ്മെന്റ് പ്രതിനിധികൾ എന്നിവർ ചടങ്ങിൽ പങ്കെടുക്കും. സംസ്ഥാനത്തെ എല്ലാ ഉന്നതവിദ്യാഭ്യാസ സ്ഥാപനങ്ങളുടെ മേധാവികളും IQAC കോർഡിനേറ്റർമാരും എക്സലൻഷ്യ 2025ൽ പങ്കെടുക്കും.
ഉന്നതവിദ്യാഭ്യാസ പ്രിൻസിപ്പൽ സെക്രട്ടറി ഡോ. ശർമിള മേരി ജോസഫ് അധ്യക്ഷത വഹിക്കുന്ന ചടങ്ങിൽ ബാംഗ്ലൂർ നാക്കിലെ അഡ്വൈസർ ഡോ. ദേവേന്ദർ കാവഡേ മുഖ്യപ്രഭാഷണം നടത്തും. സംസ്ഥാന ആസൂത്രണ ബോർഡംഗം പ്രൊഫ. ജിജു പി അലക്സ് പ്രത്യേക പ്രഭാഷണം നടത്തും. എസ് എൽ ക്യു എ സി കേരളയുടെ എക്സിക്യൂട്ടീവ്, ഗവേണിങ് ബോഡി അംഗങ്ങൾ ഉദ്ഘാടനസമ്മേളനത്തിൽ ആശംസകൾ നേരും. രാവിലെ വിവിധ അക്കാഡമിക് സെഷനുകൾ നടക്കും. ഡോ എം പി രാജൻ, ഡോ. ഷഫീഖ് വടക്കൻ, ശ്രീ. രവീൺ നായർ എന്നിവർ സംസാരിക്കും.
16ന് മാർ ഇവാനിയോസ് കോളേജിലെ ഗിരിദീപം ഓഡിറ്റോറിയത്തിൽ നടക്കുന്ന IQAC കോർഡിനേറ്റർമാരുടെ ശില്പശാലയിൽ സംസ്ഥാനത്തെ മുഴുവൻ IQAC കോർഡിനേറ്റർമാരും പങ്കെടുക്കും. ശില്പശാലയുടെ അവസാനം IQAC കോർഡിനേറ്റർമാർക്കായി ഒരു വാർഷിക പ്രവർത്തനരേഖ പുറത്തിറക്കും.
