ഭിന്നശേഷി സൗഹൃദ സംസ്ഥാനമാക്കി കേരളത്തെ മാറ്റുക എന്ന ലക്ഷ്യത്തോടെ നിരവധി പ്രവര്ത്തനങ്ങളാണ് സര്ക്കാര് നടത്തുന്നതെന്ന് ഉന്നതവിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ:ആര്.ബിന്ദു. ഇരിങ്ങാലക്കുട മണ്ഡലത്തിലെ ഭിന്നശേഷി വിഭാഗത്തില്പ്പെട്ടവർക്ക് ഏകീകൃത തിരിച്ചറിയല് കാര്ഡ് നല്കുന്നതിനുള്ള മെഡിക്കല് ബോര്ഡ് ക്യാമ്പ് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
സംസ്ഥാനത്തെ മുഴുവന് ഭിന്നശേഷിക്കാര്ക്കും സമ്പൂര്ണ തിരിച്ചറിയല് കാര്ഡ് നല്കാനാണ് സാമൂഹ്യനീതി വകുപ്പിന്റെയും കേരള സാമൂഹ്യ സുരക്ഷാ മിഷന്റെയും നേതൃത്വത്തിൽ ഇത്തരം ക്യാമ്പുകള് സംഘടിപ്പിക്കുന്നത് എന്ന് മന്ത്രി ആർ.ബിന്ദു പറഞ്ഞു. ഭിന്നശേഷി വിഭാഗത്തില്പ്പെട്ട എല്ലാവര്ക്കും ഏകീകൃത തിരിച്ചറിയല് കാര്ഡ് ലഭ്യമാക്കുന്ന ആദ്യത്തെ മണ്ഡലമായി മാറാനുള്ള തയ്യാറെടുപ്പിലാണ് ഇരിങ്ങാലക്കുട മണ്ഡലം. മണ്ഡലത്തിലെ ഏഴാമത്തെ ക്യാമ്പാണ് ഇതെന്നും മന്ത്രി പറഞ്ഞു. ഡോക്ടര്മാരുടെ സേവനം ഒറ്റക്കുടക്കീഴില് ലഭ്യമാകുന്നത് ഭിന്നശേഷി വിഭാഗക്കാര്ക്ക് സഹായകരമാകുമെന്നും മന്ത്രി പറഞ്ഞു. സാമൂഹിക അവബോധത്തിനും ഭൗതിക പശ്ചാത്തലത്തിലും മാറ്റങ്ങള് സൃഷ്ടിച്ചുകൊണ്ട് കേരളത്തിലെ ഭിന്നശേഷിക്കാര്ക്ക് ഒന്നാമത്തെ പരിഗണന നല്കുന്നതിന് സാമൂഹ്യനീതി വകുപ്പ് നിരവധി പ്രവര്ത്തനങ്ങള് നടത്തിവരുന്നുണ്ടെന്നും മന്ത്രി കൂട്ടിച്ചേര്ത്തു.
ഇരിങ്ങാലക്കുട പുല്ലൂർ സെന്റ് സേവ്യേഴ്സ് ഐ.ടി.ഐയിൽ നടന്ന പരിപാടിയില് മുരിയാട് ഗ്രാമപഞ്ചായത്ത് പ്രസിഡന്റ് ജോസ്. ജെ.ചിറ്റിലപ്പിള്ളി അധ്യക്ഷത വഹിച്ചു. ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് ലളിത ബാലൻ വീശിഷ്ടാതിഥിയായി. കേരള സാമൂഹ്യ സുരക്ഷാ മിഷന് റീജ്യണല് ഡയറക്ടര് ഡോ.പി.സി സൗമ്യ,ജില്ലാ സാമൂഹ്യനീതി ഓഫീസർ കെ.ആർ. പ്രദീപൻ, കേരള സാമൂഹ്യ സുരക്ഷാ മിഷന് ജില്ലാ കോര്ഡിനേറ്റര് കെ.പി സജീവ്, മുരിയാട് ഗ്രാമപഞ്ചായത്ത് വാർഡ് മെമ്പർ എ. പി. സേവ്യർ, ജനപ്രതിനിധികൾ, തുടങ്ങിയവര് പങ്കെടുത്തു.
ഉദ്ഘാടന ചടങ്ങിനുശേഷം വിവിധ വകുപ്പ് ഡോക്ടമാരുടെ നേതൃത്വത്തില് ക്യാമ്പ് നടത്തി.
