ഇരിഞ്ഞാലക്കുട : കാലിക്കറ്റ് സര്‍വ്വകലാശാലക്കു കീഴിലുള്ള മികച്ച വിദ്യാര്‍ത്ഥിപ്രതിഭയ്ക്കായി ഇരിഞ്ഞാലക്കൂട ക്രൈസ്റ്റ് കോളേജ് ഏര്‍പ്പെടുത്തിയ 10-ാമത് ഫാ.ജോസ് ചുങ്കന്‍ കലാലയരത്‌ന പുരസ്‌കാരത്തിന് മമ്പാട് എം.ഇ.എസ്.കോളേജ് ബിരുദ വിദ്യാര്‍ത്ഥിനി പി.ഹെന്നയെ തെരഞ്ഞെടുത്തതായി പ്രിന്‍സിപ്പല്‍ ഇന്‍ ചാര്‍ജ്ജ് ഡോ.മാത്യു പോള്‍ ഊക്കന്‍, പുരസ്‌കാര സമിതി കവീനര്‍ പ്രൊഫ.സെബാസ്റ്റ്യന്‍ ജോസഫ് എന്നിവര്‍ അറിയിച്ചു. അക്കാദമിക നിലവാരത്തോടൊപ്പം സാമൂഹിക പ്രതിബദ്ധതയും നേതൃത്വപാടവവും പരിഗണിച്ചാണ് 5005 രൂപയും പ്രശസ്തിപത്രവും നല്‍കുന്നത്.
ഫെബ്രുവരി 28 ബുധനാഴ്ച കേരളകലാമണ്ഡലം ഡീംഡ് സര്‍വ്വകലാശാല വൈസ്ചാന്‍സിലര്‍ ഡോ.ടി.കെ. നാരായണന്‍ പുരസ്‌കാരം നല്‍കും. ഇന്‍ഡോ-അമേരിക്കന്‍ സാംസ്‌കാരിക വിനിമയ പരിപാടിയുടെ ഭാഗമായി അമേരിക്കയിലെ അയോവ കിര്‍ക്ക്‌വുഡ് കമ്മ്യൂണിറ്റി കോളേജില്‍ ഒരു വര്‍ഷത്തെ പഠനം നടത്തിവരികയാണ് ഹെന്ന.
