കാട്ടൂര്‍: സംസ്ഥാന സഹകരണ വകുപ്പ് കടുത്ത ചൂടിനെ അതിജീവിക്കുവാന്‍ നടപ്പിലാക്കുന്ന തണ്ണീര്‍ പന്തല്‍ പദ്ധതിയുടെ ഭാഗമായി കാട്ടൂര്‍ സര്‍വ്വീസ് സഹകരണ ബാങ്ക് മാര്‍ക്കറ്റ് റോഡില്‍ ആരംഭിച്ചീട്ടുളള സൗജന്യ തണ്ണീര്‍ പന്തല്‍ മുകുന്ദപുരം സഹകരണ സംഘം അസിസ്റ്റന്‍റ് രജിസ്ട്രാര്‍ ജനറല്‍ ബ്ലിസണ്‍ ഡേവീസ് ഉദ്ഘാടനം ചെയ്തു. ബാങ്ക് പ്രസിഡന്‍റ് ജോമോന്‍ വലിയവീട്ടില്‍ അദ്ധ്യക്ഷത വഹിച്ചു.സംസ്ഥാനം ഇതുവരെ അഭിമുഖീകരിക്കാത്ത അത്യുഷ്ണമാണ് അനുഭവിക്കുന്നത്. പ്രളയ കാലത്തും, കോവിഡ് കാലത്തും ജനങ്ങളെ സഹായിക്കുവാന്‍ സഹകരണ പ്രസ്ഥാനങ്ങള്‍ മുന്‍ നിരയില്‍ തന്നെ ഉണ്ടായിരുന്നു. ഉഷ്ണ തരംഗം, സൂര്യാഘാതം എന്നിവയുടെ സാധ്യത മുന്‍നിര്‍ത്തി സാമൂഹിക ഉത്തിരവാദിത്ത്വം എന്ന നിലയിലാണ് കാട്ടൂര്‍ മാര്‍ക്കറ്റ് റോഡില്‍ തണ്ണീര്‍ പന്തല്‍ ബാങ്ക് ആരംഭിച്ചിട്ടുളളത്.ബാങ്കിന്റെ തണ്ണീര്‍ പന്തലില്‍ സംഭാരം,തണുത്ത വെളളം അത്യാവശ്യം ഒ.ആര്‍.എസ് എന്നിവ കരുതിയിട്ടുണ്ട്. വേനല്‍ കാലം മുഴുവന്‍ തണ്ണീര്‍ പന്തല്‍ നിലനിര്‍ത്തുമെന്നും പ്രസിഡന്‍റ് അറിയിച്ചു. ഡയറക്ടര്‍മാരായ കെ.കെ.സതീശന്‍, പ്രമീള അശോകന്‍, സഹകരണ വകുപ്പ് ഉദ്യോഗസ്ഥര്‍ എന്നിവര്‍ പങ്കെടുത്തു സംസാരിച്ചു. ബാങ്ക് സെക്രട്ടറി ടി.വി.വിജയകുമാര്‍ സ്വാഗതവും ഡയറക്ടര്‍ എം.ജെ.റാഫി നന്ദിയും പറഞ്ഞു.
