ഇരിങ്ങാലക്കുട: തൃശൂരില്‍ നടക്കുന്ന പതിനഞ്ചാമത് അന്തര്‍ദേശീയ ചലച്ചിത്രോല്‍സവത്തിന്റെ ഭാഗമായി ഫിലിം സൊസൈറ്റിയുടെ ആഭിമുഖ്യത്തില്‍ നടത്തുന്ന രണ്ടാമത് ഇരിങ്ങാലക്കുട അന്തര്‍ദേശീയചലച്ചിത്ര മേളയുടെ ഡെലിഗേറ്റ് പാസ്സുകളുടെ വിതരണോദ്ഘാടനം ഫെബ്രുവരി 21 വൈകീട്ട് അഞ്ചിന് ഓര്‍മ്മ ഹാളില്‍ ബ്ലോക്ക് പഞ്ചായത്ത് പ്രസിഡണ്ട് വി.എ മനോജ്കുമാര്‍ നിര്‍വഹിച്ചു . സൊസൈറ്റി രക്ഷാധികാരി പി.കെ. ഭരതന്‍മാസ്റ്റര്‍ അധ്യക്ഷത വഹിച്ച ചടങ്ങില്‍ ഫിലിം സൊസൈറ്റിയുടെയും ഫിലിം ഫെസ്റ്റിവലിന്റെയും ലോഗോകളുടെ പ്രകാശനം നടനകൈരളി ഡയറക്ടര്‍ വേണുജി നിര്‍വഹിച്ചു. മാര്‍ച്ച് 7 മുതല്‍ 11 വരെയുള്ള ദിവസങ്ങളില്‍ മാസ്സ് മൂവീസിലും ഓര്‍മ്മ ഹാളിലുമായി പത്തോളം ഭാഷകളില്‍ നിന്നുള്ള പതിനഞ്ച് ചിത്രങ്ങളാണ് ഫെസ്റ്റിവലിന്റെ ഭാഗമായി പ്രദര്‍ശിപ്പിക്കുന്നത്.
