ഇരിങ്ങാലക്കുട: ക്രൈസ്റ്റ് എൻജിനീയറിങ് കോളേജിൻ്റെ വാർഷിക കലാമേളയായ ‘ തിലംഗ് 2023’ ശ്രദ്ധേയമായി. സാഹിത്യം, പെയിൻ്റിംഗ്, സംഗീതം, നൃത്തം, പ്രഭാഷണം എന്നിങ്ങനെ വിവിധ വിഭാഗങ്ങളിൽ മുപ്പത്തി നാല് മത്സര ഇനങ്ങളായിരുന്നു മേളയിൽ അരങ്ങേറിയത്. കലാമേളയുടെ ഔപചാരിക ഉദ്ഘാടനം പ്രശസ്ത യുവ വയലിനിസ്റ്റും 2022 ലെ ഓൾ ഇന്ത്യ കോൺബ്രിയോ വയലിൻ കോംപെറ്റീഷൻ വിജയിയുമായ മാർട്ടിന ചാൾസ് നിർവഹിച്ചു. മാർട്ടിന ചാൾസ് അവതരിപ്പിച്ച വയലിൻ പ്രകടനം ഉദ്ഘാടന സമ്മേളനത്തിന് മിഴിവേകി. എക്സിക്യൂട്ടീവ് ഡയറക്ടർ ഫാ. ജോൺ പാലിയേക്കര സി എം ഐ അധ്യക്ഷത വഹിച്ചു. ജോയിൻ്റ് ഡയറക്ടർമാരായ ഫാ. ജോയി പയ്യപ്പിള്ളി, ഫാ. ആൻ്റണി ഡേവിസ് വൈസ് പ്രിൻസിപ്പൽ ഡോ. വി ഡി ജോൺ എന്നിവർ സംബന്ധിച്ചു. അധ്യാപകരായ കെ ടി ജിനു, കാതറിൻ ജെ നേരേവീട്ടിൽ, ആർട്സ് സെക്രട്ടറി നിർമൽ ഡേവിഡ്, സ്റ്റുഡൻ്റ്സ് യൂണിയൻ അംഗങ്ങൾ എന്നിവർ പരിപാടികൾക്ക് നേതൃത്വം നൽകി.
