ക്രൈസ്റ്റ്കോളേജ് ഫിസിക്സ് ഗവേഷണ വിഭാഗത്തിന് അന്തര്‍ദ്ദേശീയ അംഗീകാരം

350

ഇരിങ്ങാലക്കുട:റോമില്‍ സെപ്തംബര്‍ 16 മുതല്‍ 19 വരെ നടന്ന ‘മെറ്റാമെറ്റീരിയല്‍സ് 2019’ അന്തര്‍ദ്ദേശീയ കോണ്‍ഗ്രസ്സില്‍  ഇന്ത്യയില്‍ നിന്ന് തെരഞ്ഞെടുക്കപ്പെട്ട 11 പ്രബന്ധങ്ങളില്‍ 8 എണ്ണവും ഇരിങ്ങാലക്കുട ക്രൈസ്റ്റ്കൊളേജ് ഫിസിക്സ് ഗവേഷണ കേന്ദ്രത്തിലെ ഗവേഷകരുടെ കണ്ടെത്തലുകള്‍ക്ക്. ആദ്യമായാണ് ഈ അപൂര്‍വ്വ ബഹുമതി ഒരു കോളേജിലെ ഗവേഷണ കേന്ദ്രത്തിന് ലഭിക്കുത്.ഭൂകമ്പം ഉള്‍പ്പെടെയുള്ള വ്യത്യസ്ത ചലനങ്ങള്‍ അപഗ്രഥിക്കാന്‍ കഴിയുന്ന സെന്‍സറുകള്‍, തരംഗദൈര്‍ഘ്യത്തിന്റെ ആയിരത്തില്‍ ഒരു അംശം മാത്രമുള്ള വസ്തുക്കളെ തിരിച്ചറിയാന്‍ കഴിയുന്നതും അത്യന്താധുനിക വൈദ്യശാസ്ത്രത്തില്‍ ഉപയോഗിക്കപ്പെടാന്‍ കഴിയുന്നതുമായ ബയോമെഡിക്കല്‍ ഇമേജിംഗ് ടെക്നിക്, നാനോ സാങ്കേതികവിദ്യയുടെ മേഖലയിലേക്കും കണ്ടക്ടിംഗ് പോളിമര്‍ ശാഖയിലേക്കും മെറ്റാമെറ്റിരിയല്‍സിന്റെ പ്രയോഗസാധ്യതകളിലേക്ക് വെളിച്ചം വീശുന്നതുമായ പഠനങ്ങള്‍ തുടങ്ങിയവ വിവരിക്കുന്ന ഗവേഷണ പ്രബന്ധങ്ങളാണ് സെമിനാറില്‍ അവതരിപ്പിച്ചത്. നിലവിലുള്ളതിനേക്കാള്‍ പതിനായിരം മടങ്ങ് കമ്പ്യൂട്ടേഷന്‍ വേഗത ലഭ്യമാക്കുന്നതിന് മെറ്റാമെറ്റീരിയല്‍സിന്റെ ഉപയോഗം,വയര്‍ലസ് സാങ്കേതിക വിദ്യകളായ വൈഫൈ, ബ്ലൂടൂത്ത്, വൈ-മാക്സ്, തുടങ്ങിയവയിലേക്ക് മെറ്റാമെറ്റീരിയല്‍ സാങ്കേതികവിദ്യയുടെ പ്രയോഗം, തുടങ്ങിയ മേഖലകളില്‍ ക്രൈസ്റ്റ്കോളേജ് ഗവേഷകരുടെ പഠനങ്ങള്‍ ഫിസിക്സ് കോണ്‍ഗ്രസ്സില്‍ സവിശേഷ ശ്രദ്ധ പിടിച്ചുപറ്റി.ഭാവിയിലെ ശാസ്ത്ര പുരോഗതിയില്‍ സുപ്രധാനമായ സ്വാധീനം ചെലുത്താന്‍ പോകുന്ന മെറ്റാമെറ്റിരിയല്‍ ശാസ്ത്രശാഖയുടെ പ്രാരംഭകരില്‍ പ്രമുഖനായ ഡോ.ജോ പെന്‍ട്രി തുടങ്ങിയ ശാസ്ത്രജ്ഞന്‍മാര്‍ ക്രൈസ്റ്റ് കോളേജിലെ ഗവേഷകരുടെ ഗവേഷണ ഫലങ്ങളെ പ്രത്യേകംഅഭിനന്ദിച്ചു. സെമിനാറില്‍ പങ്കെടുക്കുന്ന ഗവേഷക സംഘം ഞായറാഴ്ച തിരിച്ചെത്തും.

Advertisement